Services Diocésains >

Animation Spirituelle >

TWUMVIRIZE IRYO IMANA ITUYAGIRA- UMUNSI MUKURU W'UBUTATU BWERANDA (NA PatiriVénuste NIYONTORE)

Muri iryaminsi, Musa yabariye ishengero ry'Abanyisraeli, ati:

«Emwe, murabaririkiza ivyabaye kera na rindi mutarabaho, kuva kuri wa musi nyene Imana yarema abantu kw'isi, kuva ku mpera y'ijuru gushika ku yindi: mbe hari igihwanye n'iki kintu gihambaye, canke hari abigeze bumva igihwanye na co? Mbega, hari abandi bantu bigeze bumva ijwi ry'Imana nzima rivugira hagati mu muriro, nkuko mwebwe mwaryumvise, bagaheza bakaragama? Canke hari Imana yindi yaje kwitorera no gukura ingabo hagati mu yindi ntara, ikazikurayo mu kuzigerageza no mu gukoresha ibimenyetso, ibitangaro, intambara, ukuboko gukomeye kandi kuramvuye, be n'ibimenyetso vy'agacamutwe, nk'ivyo vyose Umukama Imana yanyu yabakoreye mu Misiri muvyibonera?

Ni uko rero uyu munsi ni mumenye kandi muzirikane mu mutima, ko Umukama ari we Mana y'ijuru n'isi kandi ko ata wundi atari we. Ni muzigame rero ya mabwirizwa yiwe mbahaye uyu munsi, kugira ngo mwe n'abana banyu bazovuka hanyuma muze muhirwe muri ca gihugu Umukama Imana yanyu abahaye ubutisubirako.» 

Ncuti zanje: Abarongowe na Mutima w'Imana bose ni bo bana b'Imana. Na kare, ntimwaronse umutima w'abashumba ngo musubire kwama mu bwoba, ariko mwaronse umutima w'abana barezwe mu nzu udutuma tuvuga tuti: «Abba! Dawe!». Mutima we nyene ubwiwe ni we afasha umutima wacu kwemeza yuko turi abana b'Imana. Ko turi abana, turi n'abaragwa: abaragwa b'Imana n'abatorana iragi hamwena Kristu, dusanzwe dusangiye na we kubabara, tuzosangira n'ubuninahazwa nyene.

Muri irya misi, ba bigishwa cumi n'umwe bagiye i Bugalile ku musozi Yezu yari yabagenekereje. Bamubonye baramupfukamira, yamara harimwo abakekereza. Yezu abegereye, arababarira ati: «Naronse ubukuru bwose kw'isi no mw'ijuru. Gende rero mwigishe abantu bose, mubabatize kw'izina rya Data n'irya Mwana n'irya Mutima-Mweranda, mubigishe gukora ivyo nabategetse vyose. Nanje ndi kumwe namwe ubutakibavirira gushika ku muhero w'isi.»

Kuri uyu musi w'Imana, aho turiko duhimbaza umusi mukuru w'Ubutatu bweranda, turahimbaza tukongera tukazirikana ikinyegezwa c'Imana imwe rudende mu Butatu bwayo Bweranda: Data,Mwana na Mutima-Mweranda. Tuvuga ko ari ikinyegezwa kuko kirengeye ivyo dushobora gutegera n'ugutahura dukoresheje ubwenge bwacu bwonyene. Nkako, imvugo dukoresha yose ntishikana ku nsiguro ishitse y'akaranga k'Imana. Biragoye gutegera ko hoba Umuntu umwe muri batatu dukoresheje ubushobozi bw'ubwenge bwacu bwonyene. Ariko, si ukuvuga ko ivyo tudategera atari vyo. Tumurikiwe n'Umuco w'ukwemera, turabitahura.

IMANA-DATA MU MURYANGO W'UBUTATU BWERANDA NI IMANA UMUREMYI W'IJURU N'ISI, NTITUYIBANGIKANYE 

Ijambo ry'Imana dushikirijwe kuri uyu musi rirabigaragaza, kuko iyo Mana yo nyene ubwayo yatwihishuriye ko ari Imana imwe-muryango wa Data, Mwana na Mutima-Mweranda. Mu gisomwa ca mbere twumvise ko iyo Mana imwe ari yo nsa yamye hafi y'igihugu cayo Israëli, ikagitora, ikagitonesha, ikongera ikagiriranira isezerano na co. Ntiyigeze ihemukira abana bayo, n'aho bo batasiba kuyitera akagere.

Iyo mana imwe Mudahemuka ni yo twumvise Musa ariko asubira kwibutsa igihugu c'Israeli cama cavyiyobagije: «Mumenye kandi muzirikane mu mutima ko Umukama ariwe Mana y'ijuru n'isi kandi ko ata wundi atari we». Nta kuyibangikanya canke kuyivanga n'ibindi bigirwamana kuko urukundo rwayo ruyituma yama irondera kwiyegereza abantu bose. 

Ubunywanyi bw'intacika dusanga mu Butatu bweranda, Imana yamye ishaka kubwunga n'abantu, kandi bwaragaragaye bimwe bishitse mu kwigira umuntu kwa Yezu Kristu umwana wayo w'ikinege, we «Gashusho k'Imana itaboneka» (Kolosi.1,15). Ubwo bunywanyi bukomoka kuri yo kuko ari Imana muryango wa Data na Mwana na Mutima-Mweranda. Kugira ngo twinjizwe mu muryango w'abana bayo,  Yezu ahaye itegeko abigishwa biwe ryo kubatiza «kw'Izina rya Data, n'irya Mwana n'irya Mutima-Mweranda». Turaheza tukabona ko muri Yezu Kristu ariho duhishurirwa ico kinyegezwa c'Ubutatu bweranda. Ni we atumenyesha ko afise Se yamurungitse kandi ko be na se bagize umwe (Yohani 10,30). Yaraduhishuriye ko hari Se tutabona n'amaso yacu, mugabo abonekera muri Mwana yaturungikiye, araheza mbere aranatwigisha kumwambaza muri ca gisabisho ca "Dawe wa twese". 

Uwo YezuKristu nyene niwe yaduhishuriye uruhara rwa Mutima-Mweranda. Mu buzima bwiwe yama avuga ko agenzwa n'uwo Mutima aho yavuga ati: "Mutima w'Umukama ari kuri jewe" (Luka 4, 18). Igihe yari mu kuva kuri iyi si ngo asubire kwa se na ho, yaratomoye ko abatumwa biwe bagiye kuronka Mutima-Mweranda azorungikwa na Data na Mwana "Mutima-Mweranda Data azorungika kw'izina ryanje ni we azobigisha vyose" (Yoh 14,26); gutyo tuba turahishuriwe ko Mutima-Mweranda ahuza Data na Mwana nk'agahivu k'ubumwe n'urukundo.

Bavukanyi, n'ubwo hari abangushi bakunda kuvuga bihenda ko Imana tuvuga ari imwe n'aho tuyisenga kwinshi duciye mu nzira zitandukanye, ukwemera Imana nk'Ubutatu budatana mu ndagano ni akaranga twebwe abakristu b'aba Katolika twisangije. Turemera ko Imana Data, Imana Mwana n'Imana Mutima-Mweranda banganya iteka ry'ukuba umuryango umwe, n'aho umwe umwe wese afise akaranga kiwe. Erega, ubwo bumwe bwa Mana-Muryango, turashobora no kubutegera twisunze igitabu c'Amamuko, aho haba igikorwa c'irema, kuko cabaye muri ubwo bumwe nyene: "Tugire umuntu, tumwishushanyeko, ase natwe" (Amamuko 1,26). 

Ntihagire uwutwihendako, na yindi mana dushobora kwita Dawe, nta yindi mana yitwararika umuntu, nta yindi mana dushobora kunywana na yo ku bwa Yezu Kristu Umwana wayo mu bumwe bwa Mutima-Mweranda, atari Imana Data, Umuremyi w'ijuru n'isi, ibiboneka n'ibitaboneka.

Kuri uyu musi uri hejuru w'Ubutatu bweranda, nidutegere rero ko ibatisimu yatwinjije ku buryo budasanzwe muri uyo muryango w'Ubutatu Bweranda. Erega n'ubundi, ntitwirengagize ko igihe umuntu atari bwiyambure agashusho k'Imana yari yaremwe ashusha n'abagize uwo muryango. Ntitwoheza rero ngo twanjanjwe kuri iryo teka twatewe. Kwinjira muri ubwo bunywanyi na vyo bitugira abantu babushitse, tukaba ingoro y'Ubutatu bweranda. Yezu ati: "Uwunkunda, na Data azomukunda, duheze tuze iwe tumugireingoro yacu" (Yoh.14,23).

Mu guhimbaza uyu Musi mukuru rero bavukanyi, nimuze dukengurukire iyo Mana yatwinjije muri ubwo bunywanyi bw'urukundo, kandi twebwe twatorewe kwinjira muri iryo sezerano duhimbarwe, duheze tubone kuba ivyabona vy'urwo rukundo Imana idushakako.

Dans la même rubrique