Diyoseze >

Abasaserdoti bacu >

Inkuru y'umubabaro: Diyoseze Nkuru ya Bujumbura yaraye ibuze umusaserdoti wayo, Musenyeri Jean Louis Nahimana yarengutse i Bukama

None Musenyeri Jean Louis Nahimana yari nde?

Jean-Louis Nahimana yari mwene Maso meza na Mamy (amatazirano y'abari baramuvyaye). Yavukiye i Rennes (mu gihugu c'Ubufaransa) mu mwaka w'1964. Se wiwe yitwa Joseph Nahimana (batazira Maso meza) w'ubwenegihugu bw'Uburundi, na ho nyina wiwe akitwa Régine Niwebasa, umuganwakazi w'Umunyarwandakazi, batazira Mamy. Ego, nyina yari umuganwakazi, kuko yakomoka mu nda y'abami, abami bo mu Rwanda rwo ku ntwaro ya cami, neza na neza muri bene Kimenyi w'i Gisaka, bumwe mu bwami bwari bugize Urwanda imbere y'uko bwiyunga nka Repubulika. Mu vy'umutima na ho,uwo muvyeyi akaba yari umukristu, kuko Mamy mbere yari yabatijwe ku musi avuka.

Turiko tuvuga Musenyeri Jean-Louis Nahimana uwo yari we, ntidusiga inyuma n'ukuntu vyashitse akavuka ku bavyeyi badasangiye ubwenegihugu. Kuko mu kuvuga se w'Umurundi na nyina w'Umunyarwandakazi bica bitudugana i Ngozi, aho abo bavyeyi bahurijwe n'Imana mu buto bwabo ngo bahuze umuhamagaro wahavuye ukomokamwo uwo musaserdoti w'Umukama. Aho na ho hari ku bitaro vy'i Ngozi, vyafashwa n'ababikira bo mu muryango wa bene Mariya, aho Mamy yari yaje nk'umuganga yimenyereza, avuye iwabo mu Rwanda aho yari ahejeje ivyigwa vyiwe. Amaze kuharonka akazi, yahavuye abengukwa na Maso meza, umwe mu bari bafise uburongozi kuri ivyo bitaro, urukundo rwabo ruraheza ruvyara ukwubakana.

Mu ruvyaro rwa Maso meza na Mamy harabonetsemwo abana umunani, muri bo Jean Louis Nahimana akaba yagira uwa gatanu, avukana na bane ba mbere bakuru biwe bavukiye mu Burundi, ari bo Gloriose, Souavis, Spéciose na Antoinette. Jean-Louis Nahimana na Immaculée na bo ni bo bavukiye i Buraya, aho abo bavyeyi bari bararungitswe n'igihugu c'Uburundi mu kazi. Babiri bandi ba nyuma na bo bakaba bibarukiwe mu Burundi, inyuma y'aho uwo muryango watahuka mu mwaka w'1966: Aimable na Dieudonné, umuhererezi.

Ikibabaje, abo bana ntibashoboye kugira amahirwe y'ukurerwa na se wabo, kuko yahavuye agandagurwa bidatevye mu bwicanyi bwabaye mu gihugu; yagandaguwe mu mwaka w'1969, baba babaye batyo impfuvyi za se. Ngivyo mbere ivyatumye uwo muryango uca wibera mu gisagara ca Bujumbura, ari na ho benshi bari bazi Musenyeri Jean Louis Nahimana nk'umunyagisagara. Umuryango wa Mamy umaze gucibwa umutwe (kwicirwa serugo) n'ukunyagwa urukombamazi, waciye uza mu gisagara ca Bujumbura gutangura ubuzima bushasha. Babutanguriye mu Kamenge, Mamy n'impfuvyi ziwe umunani.

Ariko aho hose, Mamy nk'umukristu w'intwari n'indanga, ntiyigeze acika intege mw'ibanga ryiwe ry'ukurera ibibondo Imana yamuragije. Yaragumije riho ibanga ry'ubuvyeyi, aragumya mbere n'indagano ziwe z'ibatisimu, akaba yarangwa n'ukwemera n'ukwizigira, be n'igisabisho. Araheza arerera abana biwe mu rukundo rw'Imana n'abantu. Bari baranamutaziriye «Umusukukazi w'Imana», kuko hejuru y'ukuzigama ukwemera, yarigisha n'abandi ijambo ry'Imana. Mbere akaba yarshitse n'aho atanga itongo ryiwe ryo mu Kamenge, arigabira Paruwase Kamenge ngo hubakwemwo agasengero. Nta nkeka mbere ko n'iyo ndero ari yo Jean-Louis Nahimana yavomyemwo umuhamagaro wamushikanye ku kwihebera Imana, agahava akaba umusaserdoti. 

Musenyeri Jean-Louis Nahimana intwari yakoreye Ekleziya, igihugu n'amakungu

Musenyeri Jean-Louis Nahimana yatiwe mw'ibanga ry'ubusaserdoti mu mwaka w'1992. Inyuma yaho yagiye arashingwa ubutumwa butandukanye muri Ekleziya yo mu Burundi. Yarabaye Patiri mukuru w'amaparuwase ya Muramvya, Nyakabiga, Katedrale Regina Mundi, Mutima w'Ubwitonzi na Kinama.

Mu bisata bikukira Diyoseze na vyo, yarabaye icariho (icegera) c'Umwepiskopi Mukuru wa Diyoseze Nkuru ya Bujumbura (2005-2009), mu nyuma na ho aba Umunyamabanga Nshingwabikorwa w'igisata ca Diyoseze kijejwe ubutumwa bw'Ubutungane n'Amahoro (CDJP-Bujumbura, acikanye yari agikorera.

Yararungitswe kandi mu vyigwa, mu kiringo c'imyaka ine, mu Bufaransa. Agarutse, yarizewe n'igihugu, arashingwa kuyobora umugwi w'igihugu ujejwe kuvugana ukuri n'ukunywanisha abarundi (CVR), kuva muri Kigarama 2014 gushika muri Kigarama 2018, ari na we yabaye umuyobozi wawo wa mbere. Benshi bakaba bamwibukira ku kuntu yama avuga ko ata wukwiye gukoresha ukuri kuzoba kumenyekanye mu vy'ukwihora, ahubwo mu vy'ugusubiza hamwe.

Umuco wa Musenyeri Jean Louis Nahimana warakwiye isi yose gushika n'aho n'amakungu amugomwa, kuko acikanye yaheruka kugenwa mu bahinga icumi bosubiyemwo kwihweza ubukoloni bwagiriwe Afrika, kumwe na bagenzi biwe nka Dr Zana Mathieu Etambala, Dr Gillian Mathys, Pr Elikia M'Bokolo, na Anne Wetsi Mpoma. 

Imisi ya nyuma ya Musenyeri Jean Louis Nahimana

Amagara ya Musenyeri Jean Louis Nahimana yagiye kumuhinduka neza na neza inyuma y'aho yagenwa ngo abe Patiri mukuru wa paruwase Kinama. Yaguma ku musego, ku buryo abakristu ba paruwase yiwe bamubonye gake kabaho, ahereza inkuka y'imisa. 

Ariko rero intore ipfana ibanga, uwo musaserdoti yarashoboye kubasezera mu nkuka y'imisa y'igiteramo ca Noeli, ku mugoroba wo ku wa kane igenekerezo rya 24 Kigarama 2020, mbere aranabatekerera impanuro ko batohava basamazwa n'ibirori vya Noeli ngo bahave bibagira gutegurira Umukama abavukiye ikibanza kimubereye. Kumbure yoba yarabaye imvugo batashotse bategera; vyagiye gusaba ko acikana ngo umuntu abe yotegera ko kumbe wewe yariko abura ko yamaze kumutegurira ikibanza, none Kristu akaba yiyakiriye uwo mugeni wiwe.

Musenyeri Jean Louis Nahimana aratwikebanuye rero, asanze abavyeyi biwe bari baramaze kumwitangira imbere, Maso meza na Mamy, mbere uyu wa nyuma wewe hakaba hari haheze igihe gito cane amusezeye, kuko yari yitavye Imana ku wa 19 Munyonyo 2019. Nguwo rero na we ku wa 07 Nzero 2021 arabahambije. Umukama Yezu yavutse ngo acungure isi, namubere Umucunguzi, amuhanagure amosozi yose yaririye ngaha kw'isi, amwambike urugori yamuteguriye!

Michel Nibitanga, CEDICOM

Mu mumugwi umwe

Aleluya. Kristu yarazutse; umuco wiwe waratuboneshereje, twebwe yacunguje atnaraso yiwe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 52-59)

Muri irya misi,

Abayuda baja mu gaharira, bavuga bati: «Uwo ashobora ate kuduha umubiri wiwe ngo tuwufungure?» Yezu arababwira rero ati: «Ni ukuri ni ukuri ndabibabwiye: mudafunguye umubiri w’Umwana w’umuntu, ntimunywe n’amaraso yiwe, nta buzima muzogira. Uwufungura umubiri wanje akanywa n’amaraso yanje, arafise ubuzima budahera. Nanje rero nzomuzura ku musi w’imperuka. Na none umubiri wanje ni imfungurwa y’ukuri, amaraso yanje na yo ni inyobwa y’ukuri. Uwufungura umubiri wanje akanywa n’amaraso yanje, aba muri jewe, nanje nkaba muri we. Nk’uko Data Nyenubuzima yantumye ari we ambeshaho, ni ko n’uwumfunguye ndamuha ubuzima. Uyo rero ni wo mukate wamanutse uva mw’ijuru. Ntumeze nk’umwe basokuru banyu bafunguye, hanyuma bagapfa. Uwuzofungura uyo mukate azoramba mu myaka yose.»

Ivyo Yezu yabivuze yigishiriza mw’isinagoga i Kafaranawumi.