Muri ukwo kwipfurizanya umwaka mushasha mwiza w'2021 hagati y'abasaserdoti-banyamuryango ba «UCI», ivyo birori vyari bihagarariwe na Patiri Déo Bizimana, icegera c'uwuserukira iryo shirahamwe ku rwego rwa Diyoseze ya Bujumbura akaba n'Umunyamabanga mukuru w'iryo shirahamwe ku rwego rw'igihugu c'Uburundi. Ni mu gihe uwuserukira «UCI» muri Diyoseze ya Bujumbura yari yafatiriwe n'ubundi butumwa,
Nk'uko vyamenyeshejwe na Patiri Déo Bizimana,
Ishirahamwe «UCI» ni ishirahamwe ry'abasaserdoti rihurikiyemwo ab'imvukira zo mu Burundi. «UCI» ni impfunyapfunyo y'izina ry'igifaransa ry'iryo shirahamwe, mu ndome zose rikaba ryitwa
«Union du Clergé Incardiné». Ishirahamwe «UCI» rero rikaba ari rimwe mu mashirahamwe asanzwe yemewe n'amategeko agenga Ekleziya Katolika, haba mu Burundi canke kw'isi yose.
Mu Burundi, amashirahamwe nk'ayo yatanguye inyuma y'aho hari hatanguye kuboneka abasaserdoti b'imvukira zo mu Burundi, barangurira ubutumwa mu gihugu c'amavukiro yabo, ngo bunganire igikorwa c'abasaserdoti b'Abamisiyonari, bizwi ko bobo baburangurira mu bihugu bitandukanye baba barungitswemwo, nk'uko ari na bo bazanye ubwo butumwa mu Burundi. Ryatanguranye n'igenwa ry'amadiyoseze ya mbere, Bujumbura, Gitega, na Ngozi, ari na ho rero umuntu yoheza agategera igituma amashirahamwe nk'ayo y'abasaserdoti yagiye kuvuka hagati na hagati mu kinjana ca 20.
«UCI» rero si ishirahamwe rya vuba, kuko ryatanguye mu mwaka w'1952 aho ryatanguye ryitwa «Union Apostolique et Culturelle des Prêtres Burundais» (UACPB). Mu nyuma ryarahinduye izina, mu mwaka w'1972, ryitwa «Union Apostolique du Clergé Burundais» (UACB), hanyuma «Union du Clergé Murundi» (UCM).
Ariko kubera ko vyahavuye biboneka ko kugira ngo ube umusaserdoti arangurira ubutumwa mu Burundi kandi urabwa n'Umwepiskopi wo mu Burundi bidasigura ko utegerezwa kuba uri Umurundi, kuko hariho n'abasaserdoti bakukira amadiyoseze yo mu Burundi, bakarabwa n'Abepiskopi bo Burundi ariko ari abanyamahanga, ni ho iryo shirahamwe ryahavuye rifata izina ryugurukiye bose, ryitwa rero izina ry'ubu, ari ryo «UCI».
Muri ivyo birori vy'ukwipfurizanya umwaka mwiza rero w'2021 hagati y'abasaserdoti bagize ishirahamwe «UCI», mugenzi wacu Anicet Nduwayezu arangurira ubutumwa muri Paruwase Mubimbi ku bw'ikigo ca Diyoseze Nkuru ya Bujumbura c'ukumenyesha amakuru (CEDICOM), yaraganiriye na Patiri Déo Bizimana; yamumenyesheje ko iryo shirahamwe ryitunganije neza, kuko rifise abanyamuryango barenga 140, rikaba rifise n'imigambi itari mike y'ukwiteza imbere, haba ku mutima canke mu kurondera ibitunga abasaserdoti.
Uwo musaserdoti yaravuze kandi no ku kuntu iryo shirahamwe riringaniza amahwaniro. Mw'ishiyahamwe «UCI». Mu bisanzwe ngo bagira inama zisanzwe gatatu mu mwaka, kandi bakabukanya aho baja: Nko mu ntango y'umwaka barahurira mu ntara y'ubutumwa ya Buhonga ngo bipfurizanye umwaka mushasha, bagahurira muri paruwase baba badaherutse guhwaniramwo, canke babona ko bikenewe ko ari ho boja. Mu ntara y'ubutumwa ya Muramvya ngo bahahwanira mu kwezi kwa Ruheshi. Na ho mu ntara z'ubutumwa z'i Bujumbura bakaba bahahurira mu nama zidasanzwe ziba mu kwezi kwa Gitugutu canke mu kwa Kigarama.
Tubamenyeshe ko inama nk'izo z'abasaserdoti bagize ishiyahamwe «UCI» zama zabaye buri mwaka. Iyo mu mwaka uheze ikaba yari yabereye muri Paruwase ya Mutumba. Tubamenyeshe kandi ko mu mahwaniro nk'ayo kaba ari n'akaryo k'ukuzirikana kw'ibanga basangiye ry'ubuherezankuka, nk'imvukira zo mugihugu, kugira ngo bigire hamwe ukuntu bofashanya kwinagura.