Ibisata >

Imirwi y'itorwa >

Abihebeye Imana bo mu gisagara ca Bujumbura mw'ihimbazwa ry'umusi mukuru mpuzamakungu ugira uwa 25 wahariwe ubuzima-bwihevyi

Ikindi, ngo ni akaryo k'ugukenguruka ku ngabirano zitandukanye Imana yabashizemwo, be no ku vyiza Imana ikora ibaciyeko. Uwo musi kandi ngo ni uw'ukugira ngo abakristu bamenye, bazirikane, kandi batangarire iryo banga ry'agatangaza, kuko ngo ari umuhamagaro udasanzwe.

Afatiye ku bisomwa vy'ijambo ry'Imana vy'uwo musi musi na ho, Patiri Félix Fupi yabwiye abihebeye Imana ko ibikorwa Yezu yakoze abibandanya abaciyeko, haba mu kwigisha ijambo ry'Imana, eka mbere no mu mashure. «Urukundo rw'Imana rwabashitse rubwiriza gusohoka, bikabonekera mu bikorwa bitandukanye bakora: ukwigisha, be n'ukwitwararika abaro, abarwayi, abafise ingwara zo mu mutwe, n'abandi», ni ko yabandanije asigura ubutumwa bw'abihebeye Imana.

Araheza yibutsa ko ubuzima bwabo bushingiye ku bunywanyi bafitaniye na Yezu, be no ku gisabisho, eka mbere no ku muhamagaro w'urukundo udasanzwe wigaragaza mu butumwa bwabo.

Kuri uwo musi mukuru, uwaserukiye uwurongoye urunani rw'imiryango mu Burundi (ASUMA), Furera Spério Niragira mw'ijambo yashikirije yabanje kubipfuriza yubire nziza yongera aributsa icivugo cawo, ari co c'iki: «Umuvukano n'ubugenzi mu mubano no mu kibano». Yamenyesheje ko icatumye batora ico civugo ngo ngo ari uko bazirikanye neza ikete rya Papa yise «Fratelli tutti» ryo ku wa 3 Gitugutu 2020.

Muri iryo jambo, yarababwiye ati: «Iyi yubire iduha ubutumwa; umwe wese atumwe mu mubano iwe no mu muryango wiwe, azirikane neza ico cose cubaka umubano, kigakomeza umuvukano, akaranga k'umuryango, n'ubutumwa muri Ekleziya, akirwanire, kandi agihagararire!» Yasavye abo bihebeye Imana ko boraba neza ko uwo muvukano utsimbataye mu kuraba ko ata tugwi-tugwi, canke ukugira abandi abaja, ahubwo ko hariho ugusangira igisabisho n'imfungurwa n'abavukanyi basangiye ubutumwa.

Twaravuganye na Mama Marie Antoinette Nkurunziza wo mu muryango wa Bene Tereza, maze aratuyagira uko yiyumva kubona we na bagenzi biwe baje kuzirikana ubuzima bw'ihevyi babayemwo. Yavuze ahimbawe cane kubona iyo myaka yose bamaze bazirikana ku buzima-bwihevyi, na rirya ngo yiyeguriye Imana akiri muto.

Ni ko ngo ntarashikana iyo myaka, ariko ngo arazirikana ko ategerezwa gusa na Yezu. Akaba ngo yizigiye ko Yezu azomufasha gukora nka We no gusa na We. Akaba yamenyesheje ko anezerewe no kubona yasubiye kuja mu Ruziba, kuko ngo yahaheruka mu mwaka w'1994, mu gihe hari ingwano, none ubu akaba yasanze hasigaye hari Abakristu benshi, n'isengero yagutse.

Na we Mama Mariya Devota Niyonzima, umubikira mushasha wo mu muryango w'Abigeme b'Umugabekazi w'ikigongwe, ku bwiwe ngo yarahimbawe n'ukubona Abihebeyimana benshi baje muri uwo musi mukuru. Yamenyesheje ko ngo vyamuteye intege kwiyumva muri iryo banga, n'aho amaze amezi atanu gusa. Akaba asaba urwaruka kwinjira muri iryo banga ry'ukwihebera Imana. Ikindi ngo yarahimbawe cane no gukora ibikorwa vy'ikigongwe.

Eka n'abihebeye Imana b'Abafurera na bo baratuyagiye uko biyumva kuri uwo musi mukuru wabo. Ni nk'umufurera wo mu muryango wa Yezu Mwungere Mwiza, yatubwiye ko uguhimbaza uwo musi mukuru bimwibutsa indagano z'ubwerentegerwa, ubugamburutsi n'ubworo yaraganye. Kubwiwe ngo uguhimbaza uwo musi mukuru biraheza kikamunagura, maze agashobora kwama ivyama vyiza, kandi agashingira intahe Yezu Kristu, akamubera icabona.

Tubibutse ko uwo musi mukuru uhimbazwa co kimwe n'umusi w'iherezwa rya Yezu mw'isengero, kw'igenekerezo rya 02 Ruhuhuma. Ukaba watangujwe na Nyenubweranda Umweranda Papa Johani Paulo-VI, mu mwaka w'1996. Aho muri paruwase Ruziba, uwo musi mukuru ukaba wasozerewe mu kwiginana, bahimbawe cane.

Odrade Kaze, CEDICOM 

Mu mumugwi umwe

Aleluya. Kristu yarazutse; umuco wiwe waratuboneshereje, twebwe yacunguje atnaraso yiwe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 52-59)

Muri irya misi,

Abayuda baja mu gaharira, bavuga bati: «Uwo ashobora ate kuduha umubiri wiwe ngo tuwufungure?» Yezu arababwira rero ati: «Ni ukuri ni ukuri ndabibabwiye: mudafunguye umubiri w’Umwana w’umuntu, ntimunywe n’amaraso yiwe, nta buzima muzogira. Uwufungura umubiri wanje akanywa n’amaraso yanje, arafise ubuzima budahera. Nanje rero nzomuzura ku musi w’imperuka. Na none umubiri wanje ni imfungurwa y’ukuri, amaraso yanje na yo ni inyobwa y’ukuri. Uwufungura umubiri wanje akanywa n’amaraso yanje, aba muri jewe, nanje nkaba muri we. Nk’uko Data Nyenubuzima yantumye ari we ambeshaho, ni ko n’uwumfunguye ndamuha ubuzima. Uyo rero ni wo mukate wamanutse uva mw’ijuru. Ntumeze nk’umwe basokuru banyu bafunguye, hanyuma bagapfa. Uwuzofungura uyo mukate azoramba mu myaka yose.»

Ivyo Yezu yabivuze yigishiriza mw’isinagoga i Kafaranawumi.