Vikariya >

Mikaheli Mweranda >

Nyenicubahiro Musenyeri Gerevazi Banshimiyubusa yarasangiye igisabisho c'inkuka y'imisa n'abakristu bo muri Paruwase Mikaheli Mweranda

Nyenicubahiro Musenyeri Gerevazi Banshimiyubusa yari kumwe na patiri Prosper Bigirimana, Icegera ca Patiri Mukuru, be na Bertin Betu Hemedy arangurira ubutumwa mu bitaro, kumwe n'abandi basaserdoti batatu b'abashitsi.

Mu nsiguro y'Ijambo ry'Imana, Umwepiskopi Mukuru yaribukije abakristu igihe binjiyemwo c'Ikarema. Ubona ko wari uw'Imana ugira kabiri wo mu gihe c'Ikarema. Yatumiriye abakristu kugira ukwemera nk'ukwa Sokuru wacu Ibrahimu.

Musenyeri Gerevazi Banshimiyubusa yaribukije ko Ibrahimu amaze kuronka umwana mu busaza, Imana ya mubwiye ko aja kumutangako ishikanwa, na we aravyemera, afata umuhungu wiwe Izahaki, aja kumutanga, nk'uko Imana yari yabimusavye.

Ariko Imana ibonye ukwemera kwa Ibrahimu, ngo yaciye irungika intama itangwako inkuka mu gishingo c'umwana wiwe Izahaki.

Ni ho rero ngo Ibrahimu yaciye abona intama, amahembe yayo yafashwe n'igisaka, aca aba ari yo atangako ishikanwa mu kibanza c'umwana wiwe.

Uwo Mwepiskopi Mukuru kandi, mu nsiguro yiwae, yaranafatiye no ku Nkuru Nziza yasomwe uwo musi, aho yibukije ingene Yezu yajanye n'abatumwa biwe batatu, ari bo Petero, Yakobo na Yohani, bakabona ubuninahazwa bw'Imana bubatwikira, gushika n'aho boca bipfuza kuhaguma, bakahaca insago, bakigumiraho.

Inyuma y'insiguroy'ijambo ry'Imana, inkuka yamisa yaciye ibandanya nk'uko bisanzwe.

Claver Kayoya, Paruwase Mikaheli Mweranda 

Mu mumugwi umwe

Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)

Muri irya misi,

Bumvise aya majambo Yezu yavuze ati: «Uwurya umubiri wanje akanywa n’amaraso yanje arafise ubuzima budahera.», benshi mu bigishwa biwe bavuga bati: «lyo mvugo iratugumiye, ni nde yoyemera?» Yezu yamara aca aramenya mu mutima wiwe ko abigishwa biwe bavyidogera, arababwira ati: «Ivyo birabatirimutsa? Hari akantu nimwabona Umwana w’umuntu aduze iyo ahora… Umutima ni wo ubeshaho, umubiri nta co umara. Amajambo nababwiye ni umutima n’ubuzima. Yamara muri mwebwe, harimwo bamwe batemera.» Na none Yezu kuva mu ntango yari azi abatemera n’uwari kumugusrisha. Arongera ati: «Ni co gituma ndababwiye ko ata woza iwanje, Data atabimuhaye.» Kuva ubwo, benshi mu bigishwa biwe baciye biyonjorora, ntibaba bakimugendanira.

Yezu rero abwira bamwe cumi na babiri ati: «Namwe, mushaka kwigira?» Simoni Petero aramwishura ati: «Mukama, turi bwirukire nde wundi? Ko ari wewe ufise amajambo y’ubuzima budahera. Tweho twaremeye kandi turazi ko uri Umweranda w’Imana.»