Muri iyi ndwi, turatumiriwe kwihweza Yezu abambwe muri abo bose barenganywa, bahohoterwa mu buryo bwinshi; nitwihweze Umusalaba mu kwemera, duteramane na Yezu, we yatanze ubuzima bwiwe ku bwacu

Kuri uyu w'Imana igenekerezo rya 28 Ntwarante 2021, turatanguye indwi nyeranda. Mu gihe Yezu yasengana amaganya menshi i Getsemani, yabwiye abigishwa biwe Petero, Yohani na Yakobo ati: «Numva ndi n'amaganya menshi nk'uwushaka gupfa. Nimugume ngaha duteramane!» (Mariko 14,34). Umukama arashaka ko duteramana na we mu nzira y'Umusalaba!

Muri iyi karema nyene, twari dutumiriwe guhinduka, gutsinda akaranda k'ubugunge, ko kwihambirira ku vyacu tukica amatwi mu bigoye abandi. Ugutsinda ako gatima bitwerekeza ku nyifato yo guhinduka mu ntumbero yo guhimbaza neza umusi mukuru wa Pasika.

Turi mu gihe ciza c'ukugira ingendo nshasha, co kugumana na Yezu yitanga ku musalaba. Dutumiriwe gufatanya na Yezu inzira y'i Golgota, inzira irimwo abantu benshi bari mu magorwa kubera ibicumuro, kubera inzigo, urwanko, agakengerwe, ubunyakamwe.

Turatumiriwe kwihweza Yezu yabambwe; ntitwiyobagize ingene yababaye bimwe bitavugwa, ingene yitanze gushika n'aho yemera kwitangako inkuka, akicwa ataco azira. Ntitwiyobagize ko hari abantu benshi babambwe ku misalaba y'ubuzima bwabo kubera abandi.

Muri iyi ndwi, turatumiriwe kwihweza Yezu abambwe muri abo bose barenganywa, bahohoterwa mu buryo bwinshi, baguma bacinyizwa bakama inyuma y'abandi, ntibigere batera imbere. Twegere Yezu yabambwe aho hose duca, mu misozi n'ibisagara tubamwo, mu miryango yacu, mu mazu tubamwo.

«Nimugume ngaha duteramane»! Duteramane na Yezu musi y'Umusalaba, duteramane na We i Golgota, ni ukuvuga aho hose harangwa abahohoterwa ku bw'ubugunge n'ububisha bw'abandi. Ivyo tubona ntibitume twihebura, canke ngo turwanishe inabi iyindi nabi.

Nitwihweze Umusalaba mu kwemera. Duteramane na Yezu yatanze ubuzima bwiwe ku bwacu. Mu kwihweza Umusalaba, twemeze ko ari wo wadukijije, ko muri wo hari intsinzi y'ivyo vyose vyugarije isi.

Urukundo rwatumye Yezu yitanga ku Musalaba ni rwo rwarokoye isi. Urwo rukundo, n'urw'uwitanze ngo turonke ubuzima; n'urw'uwagiriye ikigongwe agaha amahoro abamusinzikaje; n'urw'uwiremetse ibicumuro vyacu ngo turonke ubuzima, ngo tugirirwe ikigongwe, ngo turonke amahoro.

Umusalaba wa Yezu nutubere inzira y'ubukiriro, inzira yonyene ishobora guhindura ikibi kiri mu mitima n'ibikorwa vy'abantu. «Nimugume ngaha duteramane!»

Marie Rose Ngendakumana, CEDICOM 

Ivyiyumviro

Rondera

Urutonde rw'Imisa

Mwoba mufise ico mubaza?

Tanga