Kardinali Laurent Mosengwo yitavye Imana afise imyaka 81, urupfu rwiwe rukaba rwababaje abatari bake, haba iwabo muri mu gihugu ca RDC canke irya n'ino kw'isi

Ni amakuru y'umubabaro iyandikiro ry'ikigo ca Diyoseze Nkuru ya Bujumbura, CEDICOM, gikesha umuhora ngurukanabumenyi w'ikinyamakuru «Vatican News» co ku cicaro c'Ekleziya Katolika. Ni amakuru amenyesha urupfu rwa Nyakwigendera Kardinali Laurent Monsengwo, aturuka mu gihugu kibanyi ca Republika iharanira intwaro rusangi ya Congo (RDC), amakuru amenyesha ko yitavye Imana kuri uyu w'Imana igenekerezo rya 11 Mukakaro 2021. Urwo rupfu rukaba rwabereye mu gihugu c'ubufaransa mu gisagara citwa Versailles.

Urupfu rwa Nyakwigendera Kardinali Laurent Monsengwo rwatangajwe na Nyakubahwa Kardinali Fridolin Ambongo, Umwepiskopi Mukuru wa Diyoseze Nkuru ya Kinshasa, ari na we yamukoreye mu ngata igihe yaja mu karuhuko k'iza bukuru. Ivyo akaba yabitangaje ku muhora w'urubuga ngurukanabumenyi Twitter. Yamenyesheje ko n'ubwo vyari bisanzwe bizwi ko arwaye, urupfu rwiwe rwakiranwe umubabaro mwinshi. Yagize ati: «Ndi n'umubabaro mwinshi wo kwandikira umuryango w'abakatorika aho uherereye hose, ndabamenyesha urupfu rwa Kardinali Laurent Monsengwo».

Mu kiganiro yagiraniye n'ikinyamakuru «Vaticans news», Nyakubahwa Kardinali Fridolin Ambongo yaragarutse ku butwari bw'uwo Mwungere w'inararibonye w'Ekleziya y'i Kinshasa, we ngo atako atagize ngo ahagararire ineza, gushika n'aho ngo yari yararahiye ko n'ubwo kwoba uguheba ubuzima bwiwe yobigira, ngo ashobore kwubaka Isi yuzuye ukuri.

Araheza Kardinali Fridolin Ambongo agira ati: «Umuryango w'Ekleziya Katolika wo muri Congo urahejeje kubura [...] Umukristu, Umuntu yemera Imana kandi yubaha Umuntu, akubaha n'agateka kiwe». Ku bindi ngo vyamuranze yaravuze kandi n'ukwitangira abandi mu kwigisha hose Inkuru Nziza, be n'uharanira ukuri n'umuvukano hagati y'abantu. Nyakubahwa Fridolin Ambongo, mu vyamukoze ku mutima vy'umwihariko ngo ni ukwo kuntu Nyakwigendera Kardinali Laurent Monsengwo asezeye isi mu gihe ngo ata misi myinshi yari iheze amubonye ari kumwe na bagenzi be mu nama y'Abepiskopi Katolika yabaye mu kwezi kw'indwi, ngo hari haheze indwi imwe gusa.

Uwo musubirizi wiwe mu bwungere bwa Diyoseze Nkuru y'i Kinshasa akaba yasozereye ico kiganiro agira ati: «Ni akababaro kenshi ku bakristu bo muri Congo kuko yabagumye hafi n'aho yari yamaze gukukuruka mu mabanga yiwe y'ubw'episkopi...! Yagumanye imigenderanire mwiza na bo ndetse no mu kibano naho n'igihe amagara yaramukitse». Araheza ashikiriza ijambo isi yoguma yibukirako Nyakwigendera Kardinali Laurent Monsengwo, arivuga muri aya majambo: «Nimba wizeye Kristu, usenga, ubwirizwa kwitwararika bene wanyu, ukiyibagira, ugaheza rero ukabakorera ico ushoboye cose, kugira ngo bashobore kubaho neza».


Nyakwigendera Kardinali Laurent Monsengwo yavutse mu mwaka w'1939, yatirwa mu busaserdoti mu mwaka w'1963, na bwo ubwepiskopi abwatirwamwo mu mwaka w'1980, ku muhezagiro wa Nyenubweranda Papa Yohani Paulo II. Mu nyuma z'aho yarajejwe n'ayandi mabanga atandukanye, nk'ukuba Umwepiskopi samuragwa wa Diyoseze Inongo, Umwepiskopi Mukuru wa Diyoseze Nkuru ya Kisangani, be n'Umwepiskopi Mukuru wa Diyoseze Nkuru ya Kinshasa. Yararongoye kandi n'inama y'Abepiskopi Katolika bo muri Afrika no muri Madagascar.

Yinjiye mu karuhuko k'iza bukuru mu kwezi kwa Gitugutu 2018, ariko arahava aduzwa mu mabanga y'ubukardinali, kw'itariki 20 Munyonyo 2020, abuhawe na Papa Benedicto XVI, gutyo aba yinjijwe mu rwego rw'inama y'abakardinali, urwego rubahuza n'Umwungere w'Ekleziya kw'isi. Yarabaye kandi n'umwe mu bagize urwego mpanuzwajambo rwa Nyenubweranda Papa Fransisko.

Mu bijanye n'ivyigwa, Nyakwigendera Kardinali Laurent Monsengwo yari yaranonosoye cane ivyigwa ntohozamana n'ivya Bibiriya (Théologien Bibliste), ku buryo ari we munya Afrika wa mbere yaronse urupapuro rw'umutsindo rwo ku rwego rwa gatatu (Doctorat) mu vyerekeye inyandiko nyeranda, kw'ishure rikuru ry'i Roma (Institut Biblique Pontifical de Rome). Mu buzima bw'igihugu yari azwi cane nk'imvugakuri ku vyaba biriko biraba mu gihugu ciwe.

Ego cane, vyari bizwi ko Nyakubahwa Kardinale Laurent Mosengwo, amagara yari agize imisi amukitse, kandi ko vyabandanya vyanka, kuva mu ntango z'ukwezi kwa Mukakaro, ari na vyo vyatumye amurungikwa kuvurwa mu gihugu c'Ubufaransa bidatevye. Ariko urupfu rwiwe rworwo rwamushikiye kuri uyu w'Imana, si ivy'imbeshere, ruragoye kwakira. Kandi nta nkeka ko rwarababaje cane abatari bake. Yitavye Imana afise imyaka 81. Ikiziga ciwe kizoshikanwa mu gihugu c'amavukiro mu misi ya vuba, kugira ngo ashinguranwe iteka mw'isengero ya Paruwase mvyeyi ya Diyoseze, Katedrale y'i Kinshasa. Umukama niyakire umushaha w'uwo musavyi wiwe!

Vyasomwe na Michel Nibitanga, CEDICOM
Vyahinduwe mu Kirundi na Trinide Dusabe, uwimenyereza muri CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga