Muvyaranze uwo mutama Albert harimwo ingabirano yo gusenga, y´urukundo no kwegeranya abana, akanavyitangira rwose, ndetse akanavyihebera

Ni umubabaro mwinshi, kuva kw'itariki 2 Nyakanga 2021 aho urupfu rw'umushingantahe akaba umukristu, n´umusomyi w´Ijambo ry´Imana muri paruwase katedrale Regina Mundi Albert Ntakimazi rumenyekaniye. Bamwe mubo twaganiriye baratubwiye Albert uwo ari we, ivyaranze ubuzima bwiwe n'iragi yabasigaranye.

Patiri Bonaventure Gisanintore ari mu muryango w'abafurera Bene Yozefu b´i Burundi, yasangira igisabisho n´umuhisi Albert yaratwiganiye uko yari azi uwo muhisi mu gihe babanye basangira igisabisho. Patiri Bonaventure Gisanintore yatumenyesheje ko ivyaranze ubuzima bw´uyo muhisi ari cane cane igisabisho, urukundo, ubugamburutsi n´ukwitangira cane ibibondo vyiwe yari atunze, ndetse akanabitangarira cane. Patiri Gisanintore ntiyibagiye gutera akamo uwo wese yogira umutima w'urukundo kubandanya igikorwa uwo muhisi yari yaratanguye mu kurera izo mpfumvyi zihejeje kubura umurezi n´umuvyeyi ariwe yari azitwararitse.

Célestin Nibigira, Umwe mu bana yareze yaratwiganiye mu ncamake nawenyene Albert uwo ari we. Yatubwiye ko, umushingantahe Albert yavuka mu ntara ya Kayanza, akaba yatanguye igikorwa co kurera abana mu mwaka 2002, abarereye mu nyakabiga. Céléstin Nibigira yatubwiye kandi ko Albert yari umuvyeyi wabo koko kuko yabitwararika mukubaba hafi muri vyose. Yongeye ati: « Na jewe ni umuvyeyi wanje kuko ndi muba mbere yareze. Twabanye n'uwo muvyeyi kuva mu kwezi kw´indwi 2003 gushika n'ubu kandi yambereye koko umuvyeyi kuva mu buto bwanje gushika n'ubu nari niga muri Kaminuza. »


Spès Caritas Nisubire, umwe mu bakozi bakoreye muri ico kigo kirerewemwo abana b´impfuvyi imyaka itari mike, yatwiganiye ko muvyaranze uwo mutama Albert harimwo ingabirano yo gusenga, y´urukundo no kwegeranya abana, akanavyitangira rwose, ndetse akanavyihebera mu kudashinga urugo rwiwe agahitamwo kurera abo bana. « Muvyo, nzomwibukirako uwo Mushingantahe n?umubano mwiza yari afise mu kibano ».

Uwo mushingantahe Albert asize abana 72 muri iryo rerero ryitiriwe Umushaha Mweranda wa Yezu na Bikira Mariya be n´abakozi 8 naho ku vyerekeye aho yakura ivyo kubagaburira, ngo ntaho yari  yasahirizwa n´abagiraneza bo ngaha i burundi canke mu mahanga nk´uko vyashikirijwe n´abo bose twagiye turaganira. Ikibazo abo bompi bagumye bibaza ni: « Ninde agiye kwitwararika ivyo bibondo bihejeje kubura nuwo bari basigaranye nk´umuvyeyi? ».

Ivyiyumviro

Rondera

Urutonde rw'Imisa

Mwoba mufise ico mubaza?

Tanga