Yaba Patiri Yohani Batista NIJIMBERE canke Furera SUPERIYO, bose barahamagariye abaririmbiramana kumenya gutandukanya indirimbo zo mu nkuka y'imisa n'izo mu biteramo
Mu ntubero y'ukwibutsa abaririmbiramana inyifato ibereye n'indirimbo zihwanye n'amasabamana ya Ekleziya Katolika, inyigisho zerekeye umuziki n'indirimbo bigenewe amasabamana zararonkejwe abaserukira abandi muri Paruwase Muvyeyi w'ikigongwe yo mu Kanyosha. Izo nyigisho zatanzwe kuri uyu wa gatandatu igenekerezo rya 29 Nyakanga, n'ibiro vya Diyoseze bijejwe ubutumwa bw'inyigisho ndoramana n'amasabamana (Catéchèse et Liturgie), zikaba zatanzwe na Patiri Yohani Batista NIJIMBERE hamwe na Furera Superiyo NIBIGIRA, bajejwe ubutumwa bw'inyigisho ndoramana n'amasabamana muri Diyoseze nkuru ya Bujumbura.
Mu nyigisho yiwe, Patiri Yohani Batista NIJIMBERE yagize ati: «Umuziki n'ubuhinga ni bumwe mu buryo bwo guserura akari ku mutima, umuntu ari wenyene canke ari kumwe n'abandi. Iyo biroreshejwe mu masabamana ya Ekleziya, uwo muziki utegerezwa kuba ndoramana». Patiri Yohani Batista, yisunze inyigisho y'umweranda Augustino, yabandanyije asigura ko indirimbo ari igikorwa c'urukundo, ati: «Ntushobora kuririmba udakunda Imana.» Ni kwo kumenyesha abaririmbiramana baje mu nyigisho ko indirimbo y'amasabamana itegerezwa kugaragaza ukwemera, umuziki na wo ugategerezwa kwisunga amasabamana kugira ngo bifashe abakristu gusenga neza. Mu gihe umuziki ukoreshejwe nabi na ho ngo uba uhumanye, ni ko Patiri Yohani Batista yavyemeje. Ni ho yaca ahanura abaririmbiramana ati: «Kirazira kuvangavanga umuziki wa Ekleziya Katolika n'uwo mu yandi madini; umuziki ukoreshwa muri Ekleziya ni umuziki w'umudiho wa Gregoriyene.»
Ikindi Patiri Yohani Batista yagarutseko ni uko ngo abaririmbiramana bategerezwa kumenya ko indirimbo zose zirimwo amajambo y'Imana zitagenewe kuja mu masabamana, ko hari izo mw'isengero n'izo mu biteramo canke mu bindi bisabisho. Kukaba nkako, ngo uwuririmvye neza aba asenze kabiri, ni ko yavuze, rero ngo n'uwuvuza icuma ategerezwa kumenya ko ico aba ashaka gushikako ari ugufasha abakristu gusenga. Patiri Yohani Batista yarashimitse ati: «Inkuka ya misa ni ikoraniro; muri ico gihe nta ndorerezi ibaho, abakristu bose bararirimba, bagakoma amashi. Rero, baba abaririmbiramana canke abacuraranzi, bategerezwa kumenya ko atari bo bonyene bari mw'isengero, ni co gituma boririmba indirimbo zizwi n'abakristu, kandi ntibabarenze urwamo.» Patiri Yohani Batista yarangije abibutsa kandi ko bategerezwa kumenya ibiringo vy'imisa n'indirimbo bijanye.
Muri izo nyigisho, yaba Patiri Yohani Batista NIJIMBERE canke Furera SUPERIYO, bose barahamagariye abaririmbiramana kumenya gutandukanya indirimbo zo mu nkuka y'imisa n'izo mu biteramo, hanyuma imbere y'ugufata ko indirimbo iyi canke iriya yoririmbwa mu mwanya w'inkuka ya misa, bakabanza kuraba ko ibikwiye koko, ari na kwo basuzuma ko amajambo ayigize abereye. Haranabajijwe ibibazo bitari bike bijanye n'ukuntu abaririmbiramana boronka indirimbo zikosowe neza.
Inyigisho zasozerewe ku majambo y'ubukengurutsi. Patiri Lambert NISHIMAGIZWE, umwibutsamana w'imihari n'imigwi muri Paruwase Kanyosha, yarakengurukiye abatanze inyigisho hamwe n'abaririmbiramana baserukira abandi bitavye izo nyigisho. Yarangije ijambo ryiwe agahamagarira abaririmbiramana kuzirikana inyigisho baronse, kuzizizigama no kuzisangiza abo baserukiye kugira ngo zizogire ico zibunguye mu butumwa bwabo bw'uguhimbaza amasabamana. Abaririmbiramana na bo nyene barakengurutse cane kuri izo nyigisho baronkejwe, bakipfuza ko bozironswa kenshi, kuko ngo zizobagirira akamaro mu butumwa bwabo bwo kuninahaza Imana mu Nkuka ya misa. Abo baririmbiramana bavuye aho biyemeje ko bagiye kugerageza guhindura inyifato zimwe zimwe bahora bagira mu kutamenya. Ngo inyifato zose zidahuye n'amasabamana bagiye kuziheba. Ngo haba mu kuvuza ivyuma ku rugero rurenze, canke mu gutunganya indirimbo mu midiho inyuranye n'iyibereye inkuka ya Misa, ngo ivyo vyose bazobikosora, bisunze inyigisho bahawe.
Ibiro vya Diyoseze bijejwe ubutumwa bw'inyigisho ndoramana n'amasabamana (Catéchèse et Liturgie), nk'uko izina ry'ivyo biro rivyerekana, bifise ibisata bibiri, ic'ukuremesha inyigisho ndoramana be n'ic'amasabamana. Ivyo biro bigira ku civugo ngo «Umubivyi yaritoye aja kubiba» (Mariko 4,3). Ukuremesha inyigisho ndoramana n'amasabamana bishimikira ahanini ku kumenya ijambo ry'Imana n'ukwemera kwa Ekleziya, na cane cane ku kubigendera.
Gonzalve NTASHIMIKIRO, Paruwase Kanyosha