«Furera Fiacre NTAHOMVUKIYE, uno musi uri hejuru turiko turamusezera dushima ko yasozereye ubuzima neza akiri mw'ibanga yemereye Imana ryo kuyihebera» (Fr. Athanase Nakintije)
Inyuma y'ukwitaba Imana kwiwe giturumbuka, Furera Fiacre NTAHOMVUKIYE, mu gitondo c'uyu wa gatanu igenekerezo rya 25 ukwo kwezi nyene, yashinguwe rukristu mw'itongo ry'abihebeye Imana rya Seminari Nkuru ya Bujumbura. Ukumusezera ubwa nyuma ku baryango, abavukanyi mu vy'ubutumwa, incuti n'abagenzi vyabereye ku buruhukiro bwo ku bitaro vyitiriwe Umwami Khaled mu gisagara ca Bujumbura. Inkuka ya Misa yo kumuhereza Imana ngo imwakire nk'ishikanwa mu bwami bwayo yabereye kw'Isengero yo kuri Katedrale Regina Mundi. Na kwo ukumushingura kwabereye mw'itongo ry'abitaba Imana barayihebeye riri mu kibanza c'Iseminari Nkuru ya Bujumbura.
Fiacre NTAHOMVUKIYE yahora ari umufurera wo
mu muryango w'Abagenzi b'Umusalaba, akaba arengutse i Bukama mu gihe yari arongoye umubano w'abafurera wo mu Carama, muri Paruwase Kinama, Diyoseze Nkuru ya Bujumbura. Yitavye Imana kw'igenekerezo rya 22 Nzero 2019,
inyuma y'indwara y'igihe gito. Umuvukanyi wiwe mu vy'ubutumwa, Furera Athanaze Nakintije, mw'ijambo yashikirije abari baje ku maziko, yabamenyesheje ko Furera Fiacre NTAHOMVUKIYE, imbere gato y'ugucikana kwiwe, yafashwe bukumbi avuye ku rugendo, ariko agashima ko yafashwe ari mu biwe, mu bavukanyi, bagashobora kumwegeranya. Yanamenyesheje ko abo bagenzi biwe bamugumye hafi amasaha indwi yose, bariko baramusabira. Mbere ngo yaranaronse n'isakramentu ry'isigwa ry'abarwaye mu minota mirongo itatu imbere y'uko acikana.
Furera Fiacre NTAHOMVUKIYE rero, ngo n'ubwo yigiriye, ngo n'ubwo kandi urupfu rwiwe rusize umubabaro abanyamuryango kubw'amaraso no kubw'ubutumwa, ngo yamara mw'ijuru ntibakekeranya ko akanyamuneza ari kenshi, kuko ngo arengukanye icegeranyo ciza c'ubutumwa yaranguye. Fr. Athanase Nakintije yamudondoye, yagize ati: "Furera Fiacre NTAHOMVUKIYE, uno musi uri hejuru turiko turamusezera dushima ko yasozereye ubuzima neza akiri mw'ibanga yemereye Imana ryo kuyihebera". Yongeyeho ko icamuraza ishinga ngo kwari ugutera imbere mu vyerekeye umutima n'umubiri, ayo majambere ngo akaba yaranayipfuriza n'umuryango yarimwo, ngo ni ko yakunda kuvyivugira.
Igiha cane ivyizigiro abavukanyi ba Furera Fiacre NTAHOMVUKIYE, ari na co ahanini bafatirako mu kwemeza ko aruhutse mu mahoro, ngo iteka yari yaratewe n'Umukama ry'ukwama na ntaryo amwihereza imisi yose mw'isakramentu ry'Ukaristiya. Eka mbere ngo yaraniteguriye neza urugendo rwiwe mu guhabwa kenshi isakramentu ry'Ikigongwe. Ntibibagiye kumushimagiza ku bantu yafashije gusozera ubuzima bwabo neza, na rirya mu butumwa yari yaratoranye harimwo n'ugufasha abarwaye.
Furera Fiacre NTAHOMVUKIYE, mwene Déogratias Ntahomvukiye na Martienne Ndimukanyari, yitavye Imana yari yavutse kw'igenekerezo rya 7 Nyakanga 1977, i Nyabututsi. Yabatijwe akiri umwana, kw'igenekerezo rya 15 Ruheshi 1978, inyuma y'amezi make avutse. Yahawe isakramentu ry'urusangi rwa mbere kw'igenekerezo rya 15 Ruheshi 1986, akomezwa muri Mutima-Mweranda kw'igenekerezo rya 30 Ruheshi 1991. Yinjiye mu muryango w'abihebeye Imana bo mu muryango w'Abagenzi b'Umusalaba mu mwaka wa 1996, kw'igenekerezo rya 14 Gitugutu.
Mu vy'amashure na vyo, ay'intango yayize kuva mu mwaka wa 1984 gushika 1991, kw'ishure ry'intango ry'i Nyabututsi. Ayisumbuye yayize kuva mu mwaka w'2005 gushika mu w'2012, kw'ishure "Institut Secondaire Polyvalent", mu gisata c'ubuhinga bw'imashini nyabwonko (Informatique de Maintenance), aho yaronkeye urupapuro rw'umutsindo rwo ku rugero A2. Amashure ya kaminuza yayize kuva mu mwaka w'2017, urupfu rukaba ari rwo ruyahagaritse.
Mu vy'ubutumwa bwo gukora mu murima w'Umukama na bwo, yarafashije abarwayi nk'umurwaza wabo, kuva mu mwaka w'1996 gushika mu mwaka w'1998. Yaciye abandanyiriza ubutumwa mu gisata c'ugufasha mu vy'ukubarira impuzu, kuva mu mwaka w'1999. Mu w'2000, yaciye ahabwa amabanga y'ukuba mu ndongozi z'umuryango, ariko abandanya yongera abandanya n'ubutumwa yahorana, gushika mu mwaka w'2005, ari na ho Umuryango wamurungika kwiga ya mashure yisumbuye n'aya kaminuza. Hagati aho, mu mwaka w'2002 ni ho yatura Yezu ubuzima bwiwe mu muryango w'Abagenzi b'Umusalaba.
Mu muryango w'ubutumwa rero, Furera Fiacre NTAHOMVUKIYE yigiriye bamubona nk'akanyenyeri kamurikira abandi, bafatiye ku ngabirano z'ubwenge n'ubwitonzi, be no ku gatima atahengeshanya kubereka ko kwitwararika iterambere ry'abandi, n'ukwerekana ko ari kw'isi ariko asa n'uwutababaye ivyo kw'isi, bakaba basenze basaba ko aho agiye mw'ijuru ku Mana yobasabira na bo izo ngabirano, kandi ko Umukama yobongera abandi bafurera bafise bene izo ngabirano.
Michel NIBITANGA, CEDICOM