Mw'ireresi yerekanywe, Padiri Laurent Fabre (uwatanguje umuryango «Chemin Neuf»), arerekana neza ingene mu mashengero atandukanye harimwo ibihuza abemera Kristu, ivyo asigura ko biruta kure ibibatandukanya
Kuva kw'igenekerezo rya cumi n'umunani gushika ku rya 25 Nzero uko umwaka utashe, Ekleziya yo kw'isi yose irahimbaza indwi yahariwe ubumwe bw'abemera Kristu. Ni muri iyo ntumbero Paruwase Yohani Batista Mweranda yo mu Gihosha, yifadikanije n'umuryango wa Chemin Neuf, yatunganije inyigisho kuri uyu wa kabiri, igenekereko rya 22 Nzero, ngo isubire ikabure iyo nzira y'ubumwe bw'abakristu Ekleziya yishinze.
Izo nyigisho zabereye mu nyubakwa za Paruwase, kuva igihe c'isaha icumi n'imwe n'igice z'umuhingamo, zikaba zatanzwe mu buryo bubiri. Inyigisho ya mbere yatanzwe na Musenyeri Gabriel BAREGENSABE, aho yasiguye kahise k'Ekleziya, ufatiye ku bihe bikuru bikuru vyayiranze.
Muri iyo kahise, ngo haribonekeje amacakubiri yasambuye ubumwe bw'abemera Kristu, haba mu kinjana ca kane kubera inyigisho za Arius, mu kinjana c'icumi na rimwe aho Ekleziya Katolika y'i Roma yatandukana n'iy'i Konstantinople, hakavuka abaortodokse. No mu kinjana c'icumi na gatandatu nyene, ngo haravutse amashengero y'abaprotestanti yiyonkoye kuri Ekleziya Katorika.
Muri iyo nyigisho harerekanywe ariko ingene muri bino bihe hariko haraba igeragezwa ry'ukwunga ubumwe hagati y'amashengero, uhereye ku makuru makuru nka yose, harimwo n'Ekleziya Katorika nyene. Ayo mashengero ngo ariko arakora uko ashoboye kwose ngo agarukane ubumwe hagati y'abemera Kristu.
Inyigisho ya kabiri yatanzwe mu buryo bw'ireresi. Iyo reresi yitwa «Vérité réconciliéé» mu rurimi rw'igifarana, bisigura ngo «Ukuri kunywanye». Muri iyo reresi, harerekanywe uwatatanguje «Chemin Neuf», umuryango usanzwe ushira imbere ubumwe bw'abemera Kristu. Padiri Laurent Fabre yawutanguje, arerekana neza ingene mu mashengero atandukanye harimwo ibihuza abemera Kristu, ku bwiwe ngo ivyo bikaba biruta kure ibibatandukanya.
Abakristu bo muri Paruwase zo mu gisagara ca Bujumbura rero bama bifatanya n'abakristu bo mu yandi mashengero atandukanye yemera Kristu, maze bakagira umusi umwe mu mwaka, bagahurira hamwe muri iyo ndwi, kugira ngo basabire hamwe ubwo bumwe bw'abemera Kristu.
Tubamenyeshe ko uyu mwaka hari haramukiwe ishengero ry'aba Batista ngo ribe ari ryo ryakira ibikorwa vyo gushikiriza Imana ico gisabisho, kuri uyu wa gatanu igenerezo rya 25 Nzero. Icivugo c'uyu mwaka akaba ari «Urarondera ubutungane nyabutungane kugira ngo ubeho».
Guy Darcy IRADUKUNDA, Paruwase Gihosha