Ku wa kabiri itariki 2 Ndamukiza, abahurukiye
mu mugwi w'Abanaguwe muri Mutima-Mweranda bo muri Paruwase yitiriwe umweranda Guido
Maria Conforti yo mu Kamenge baragize amatora y'Umusuku mushasha, kuko uwahahora
yari arangije ibiringo bibiri bitegekanijwe n'amategeko. Abanyamuryango batanu ni
bo bashikirijwe abatora ngo bihitiremwo Umusuku, abantu 115 bakaba ari bo bari
bitavye ayo matora.
Uwari ahagarikiye ayo matora ni uwaserukiye Abanaguwe
muri Mutima-Mweranda ku rwego rwa Diyoseze, Bienvenu NTIMIRWA, aherekejwe n'Umusuku
wo kuri Paruwase yitiriwe Umweranda Mikaheli, hamwe n'uwahora ari Umusuku wo
muri Paruwase yo mu Kinama. Ku rwego rwa
Paruwase hakaba hari haje patiri Philbert ajejwe imihari n'imigwi y'ubutumwa,
hamwe n'umukuru w'urwego mpuzamihari n'imigwi y'ubutumwa muri iyo Paruwase
nyene.
Tubamenyeshe ko mu mazina atanu yari yatanzwe n'urwego
nyobozi rwahahora ngo hatorwemwo Umusuku, umusore yitwa Olivier NDAYISHIMIYE ari
we yatowe, ku majwi 48, akaba azomara ikiringo c'imyaka itatu asukurira bagenzi
biwe.
Napoléon SIMBANDUMWE, Paruwase Kamenge
Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.
Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)
Muri irya misi,
Bumvise aya majambo Yezu yavuze ati: «Uwurya umubiri wanje akanywa
n’amaraso yanje arafise ubuzima budahera.», benshi mu bigishwa biwe bavuga
bati: «lyo mvugo iratugumiye, ni nde yoyemera?» Yezu yamara aca aramenya mu
mutima wiwe ko abigishwa biwe bavyidogera, arababwira ati: «Ivyo
birabatirimutsa? Hari akantu nimwabona Umwana w’umuntu aduze iyo ahora… Umutima
ni wo ubeshaho, umubiri nta co umara. Amajambo nababwiye ni umutima n’ubuzima.
Yamara muri mwebwe, harimwo bamwe batemera.» Na none Yezu kuva mu ntango yari
azi abatemera n’uwari kumugusrisha. Arongera ati: «Ni co gituma ndababwiye ko
ata woza iwanje, Data atabimuhaye.» Kuva ubwo, benshi mu bigishwa biwe baciye
biyonjorora, ntibaba bakimugendanira.
Yezu rero abwira bamwe cumi na babiri ati: «Namwe, mushaka kwigira?» Simoni
Petero aramwishura ati: «Mukama, turi bwirukire nde wundi? Ko ari wewe ufise
amajambo y’ubuzima budahera. Tweho twaremeye kandi turazi ko uri Umweranda
w’Imana.»
Â