Ni kw'idominika yahariwe Yezu Umwungere Mwiza, ku w'Imana igenekerezo rya 12 Rusama, umusi Ekleziya ihimbazako umusi mpunzamakungu wo gusabira itorwa, aho urwaruka ruri mu mugwi w'itorwa rwari rwaje ruva mu maparuwase atandukanye yo muri Diyoseze Bujumbura ngo ruzirikane ku muhamagaro warwo. Ivyo birori vyari vyatewe iteka n'Umwepiskopi Mukuru wa Diyoseze, Musenyeri Gerevazi Banshimiyubusa, ari na we yarongoye Inkuka ya Misa, ari kumwe n'uwaserukiye abamisiyonari, Patiri Ruben MACIAS, be n'abihebeye Imana batandukanye, bikaba vyabereye muri Paruwase Kanyosha.

Ihimbazwa nyezina ry'uwo musi ryatanguye ku wa gatandatu igenekerezo rya 11 Rusama, ku nyigisho z'imisi ibiri zari zategekanirijwe urwo rwaruka, aho rwashikirijwe urutonde rw'imiryango y'abihebeye Imana irangurira ubutumwa muri Diyoseze Nkuru ya Bujumbura, bukeye na ho, ku w'imana, rugasomerwa ijambo rya Nyenubweranda Papa Fransisko ry'uwo musi.

Itangazamakuru rya CEDICOM ryaregereye rumwe mu rwaruka rwari rwaje muri izo nyigisho be n'iryo himbazwa ry'uwo musi mpuzamakungu w'itorwa. Ku bwa Olivier NSENGIMANA, yaje ava muri Paruwase Munanira, ngo bahungukiye vyinshi: «Turatahura ko umuhamagaro wacu, ubwa mbere ari uwo kuba beranda, hanyuma ubwa kabiri kumwitaba, haba mu kwinjira mu buzima bwihevyi, haba mu kwubaka ingo rukristu, ingo nyeranda».

Urwo rwaruka rwaremeje kandi ko uwo musi wari ukenewe cane, kuko ngo bahungukiye n'abagenzi benshi bava mu maparuwase atandukanye, co kimwe n'imiryango yabakiriye, bagaheza bagaterana intege. Na bo abagenzi babo batashoboye gushika mu nyigisho, ngo bagiye kubasabikaniriza ku vyo bigishijwe. Ngo baragerageje kwandika ivyo bigishijwe, bakaba bazobibasigurira nk'uko babironse.

Twararonse kandi n'ivyiyumviro vy'abamaze guhamagarwa, bakongera bakitaba; abo twaganiriye ni Furera Elvis HAKIZIMANA wo mu muryango w'abafurera bene Paulo, na Mama Alice NDIZEYE wo mu muryango wa bene Bernadeta. Baratuyagiye igituma ari nkenerwa ko uwuhamagawe abanza gutohoza umuhamagaro wiwe, kuko kenshi usanga uwuhamagawe. Furera Elvis HAKIZIMANA avuga ko uwuhamagawe, ikibanza kumugora ari ukumenya ico uwumuhamagara, Umukama, amushakako.

Mama Alice NDIZEYE wewe yongerako ko itorwa rikenera kuvomererwa. Ku bwiwe ngo bica mu gisabisho, kugira ngo uwahamagawe agume yumva akajwi k'Umukama kamwongorera. Ngo araheza akabona buke buke itorwa ryiwe aho rihagaze. Uwo mubikira wewe ngo yatanguye kuja mu mugwi w'itorwa akiri moto, akiri mu mwaka wa gatanu w'amashure y'intango. Ngo ni ho yigiye ivy'ugutohoza ku muhamagaro wiwe. Ngo baranabona n'abihebeye Imana bava mu miryango itandukanye, ngo baguma baza kubasigurira ibijanye n'itorwa n'ukwinjira mu muhamagaro.

Baba abo bihebeye Imana, yaba Umwepiskopi mukuru wa Diyoseze nkuru ya Bujumbura, bose bagarutse ku ruhara rw'umuryango, haba mu kurerera abana mu buzima rukristu, haba kubakundisha igisabisho.

Musenyeri Gerevazi Banshimiyubusa wewe yarongeyeko ko ibibondo abavyeyi bafise ari umurima w'isangi basangiye n'Imana, ari na co gituma yabasavye ko umusi Imana yododora iwabo ngo ibasabe umutumwa mw'ibanga iryo ari ryo ryose, ngo ntibaze barote batambama imbere, ngo ntibahave bayibuza gukiza abo yokijije iciye kuri uwo mwana.

Ku rwaruka narwo, yararumenyesheje ko umwe wese afise ibanga Imana yamugeneye. Yagize ati: «Nta n'umwe yapfuye kuvuka gutyo gusa Imana itamuzi, umuntu wese yaje kuri iyi si Imana imufiseko umugambi». Yarashimitse cane ku bantu baburizamwo ubuzima bw'abandi, aho yamenyesheje mbere ko ukugira ibintu nk'ivyo kuba ari ukwifatira mu gahanga Imana iba yagomba kugira ico ibatumye. Ahubwo rero, urwaruka ngo rwotohoza riho kw'ibanga Imana yaruhamagariye, kugira ngo ntirujane nyabahururu, ruhave rwitaba nyaringa. Ngo ntibarabe amagara make, ahubwo rumenye ko Yezu Umwungere mwiza aruhamagara aruzi, azi ivyo umwe umwe wese ashoboye n'ivyo adashoboye.

Ekleziya y'i Bujumbura rero, kumwe n'iyo kw'isi yose, ihimbaje umusi mpuzamakungu wahariwe itorwa ku ncuro igira 56 iri kumwe na Patiri Ruben MACIAS, umumisiyonari wo mu muryango w'abasaveriyano amaze imyaka 25 muri iryo banga na 18 mu butumwa mu Burundi, akaba asaba abakristu b'abarundi kugumya ibanga, n'ukwirinda abahanuzi b'ibinyoma, ahubwo ngo bahange amaso Imana n'umwana wayo Yezu Kristu, kuko Imana ari yo Nkuru. Ku vyerekeye urwaruka ruri mu mugwi w'itorwa, arusaba gutohoza ko itorwa ryabo atari indoto, ahubwo ari umuhamagaro.

Michel NIBITANGA, CEDICOM