Abagize umugwi w'ubutumwa bushasha witiriwe «Abacamanza ba Mukama menyekana» barerekanywe, ku wa kane igenekerezo rya Ruheshi, mu Gasengero kari mu kigo c'ababikira Bene Tereziya, i Bujumbura, muri Paruwase Mikaheli Mweranda. Ibikorwa vyatanguye kw'isaha icumi n'imwe z'umugoroba, bikaba vyari bigizwe n'ukumenyekanisha icese abakristu indwi bashinzwe ubwo butumwa (muri bo umwe akaba yari yafatiriwe uwo musi), be n'inyigisho zifasha gutegera ubutumwa bwabo.

Inyigisho ya mbere yavuga ku butungane n'amategeko hisunzwe ijambo ry'Imana, Bibiliya, yashikirijwe na Patiri Calliope Bazitwinshi, ajejwe igisata c'ubutumwa bwa Bibiliya Nyeranda. Iyindi na yo yavuga ku muhamagaro n'ubutumwa bw'umukristu w'umulayike bushingiye ku mategeko ya Ekleziya, ikaba yashikirijwe na Patiri Agathon Gahungu, ku bwa Sentare y'Ekleziya ku rwego rwa Diyoseze Nkuru ya Bujumbura.

Abatanze inyigisho baboneyeho gusigura ukuntu umukristu nyawe yokwigenza mu gihe bibaye ngombwa ko amatati afitaniye na mwenewabo vyoba ngombwa ko ashirwa imbere y'intahe ngo habe uguca urubanza, avyifashemwo nk'umwana w'Imana nyene. Mu kiganiro batanze, abasaserdoti Calliope BAZITWINSHI hamwe na Agathon GAHUNGU baramenyesheje ko mu kwitwarira umuvukanyi, hari inyifato ibereye umuntu yogira, nk'umukristu. Ku bwabo ngo ma yobanza kwitura Sentare y'Ekleziya, imbere y'uko afata ingingo y'ugutumbera muri sentare ya Leta.

Mu gusigura igituma umukristu yobanza kwitura Sentare y'Ekleziya, imbere y'uko afata ingingo y'ugutumbera muri sentare ya Leta, Patiri Calliope Bazitwinshi yabanje kwisunga ijambo ry'Imana riri mu gitabu Umutumwa Paulo yandikiye abaromani (Rom.3,23-24). Mw'ibaruwa umutumwa Paulo yandikiye abaromani, ngo arabuza abakristu kuja kurondera ubutungane muri sentare zikoreramwo abatubaha Imana, na rirya ngo abakristu ari bo batorewe kuzocira imanza amahanga. Na none ngo abakristu bagize ico bapfa, bohanurana hagati yabo. Ku bwa ngingo, mbere ngo ntibaba bakwiye no kuja mu mitongano. Ariko bishitse bagatata, ngo ni aho Paulo avuga ko batotegerejwe kuja muri sentare zidashira Imana imbere.

Uwo musaserdoti yabaye n'uwubabazwa n'ukubona abakristu bitwa ko bazi Imana, ba bandi botegerejwe gusangira akabisi n'agahiye, ugasanga iyo batase baca bafata imisi n'imisi birirwa baraburana, kuva muri sentare y'intango gushika muri gasamburamanza, kandi betegerejwe kwitura umucamanza akurira bose, Yezu Kristu. Patiri Calliope BAZITWINSHI aranaduga ku rugero rwo hejuru rw'ugutegera ubutungane, ko itegeko nyaryo rirangukira mu rukundo, ngo ni ho rifasha abantu kubana mu mahoro n'urukundo. Abivuga yisunze ikete Paulo yandikiye abanyagalati (Gal.5,13-15). Ngo umuntu ashikira ubutungane nyabwo iyo ashizemwo ugukunda Imana n'abantu.

Umugwi mushasha w'ubutumwa bwitiriwe «Abacamanza ba Mukama menyekana» rero ni umwe mu migwi y'ubutumwa bw'abakristu b'abalayike uzoba ujejwe gutunganyiriza abakristu b'Abakatolika bazoba. Abashikirijwe icese ku wa kane ni indwi (ariko umwe muri bo akaba atari yaje kubw'ugufatirirwa). Bazorangurira ubutumwa bwabo mu gisata ca Sentare ya Ekleziya ikukira Diyoseze Nkuru ya Bujumbura. Mama Mariya Lusiya KAYANDAKAZI ni we abitwiganira, aho anatubwira ko bategerezwa kuba ari abakristu bize ivy'amategeko y'igihugu kandi babifitiye n'impapuro z'umutsindo, ariko kandi bakaba baranaronkejwe n'inyigisho ndoramana mu vy'amategeko ya Ekleziya.

Inyigisho za mbere ku bategurirwa ubwo butumwa zatanguye gutangwa mu mwaka w'2012. Zitangwa mu myaka ibiri, i Banga, mu misi 40 igabuyemwo impera z'indwi zishika 16. Izo nyigisho zishimikira ku vyigwa vya Bibiliya na Teolojiya. Bimwe mu vyigwa bishimikirwako ni nk'ibitabu vya Musa, ivy'abahanuzi, ivy'amateka ya Bene Israeli, ivy'Inkuru Nziza ya Yezu Kristu, ivy'amabaruwa yanditswe n'umutumwa Paulo, ivyahishuriwe umutumwa Yohani, amazaburi, n'ibindi bitabu vyinshi birimwo inyigisho za Ekleziya, na cane cane ibishimikira ku butungane bunywanisha kandi bushingiye ku kuri n'urukundo.

Claver KAYOYA, Paruwase yitiriwe Mikaheli Mweranda