Abendera ariko araduzwa: irya Republika y'Uburundi, iry'ubumwe bw'Abarundi n'iry'umuryango w'ubumwe bwa Afrika yo mu buseruko©Ifoto na Bernard NDABINENGESERE
Isabukuru igira iya 57 Igihugu c'Uburundi kimaze cikukiye yarahimbajwe, ku wa mbere itariki ya 1 Mukakaro 2019. Mu ntara ya Bujumbura (intara izwi kw'izina rya Bujumbura Rural), ibirori vyabereye ku murwa mukuru w'iyo ntara, ku kibuga c'umupira kiri ku mutumba Bibare, muri Komine Isare. Ivyo birori vyari vyatewe iteka na Buramatari w'Intara ya Bujumbura, Umupfasoni Nadine GACUTI, ari kumwe n'umucance wiwe, abarongoye igisirikare n'igipolisi mu ntara, n'abandi banyacubahiro barongoye ubuzi n'amashirahamwe bitandukanye.
Ibirori
vy'uguhimbaza iyo sabukuru y'ukwikukira kw'Uburundi ku rwego rw'Intara ya
Bujumbura vyatangujwe n'ugushira ingori z'amashurwe ku cibutso c'ukwikukira
kiri ku cicaro c'iyo ntara. Ibendera ry'igihugu rimaze kuduzwa, haciye
hakurikira igisabisho, hanyuma hakurikira urugendo rw'agakura bita Défilé mu
rurimi rw'igifaransa.
Abasirikare bari
kuri Délilé © Ifoto na Bernard NDABINENGESERE
Mu bagize urwo rugendo, imbere hari abari mu muhari Gatolika wa CHIRO, hanyuma abaserukira ama Komine nka yose mu ntara ya Bujumbura, abarongoye ubuzi n'amashirahamwe atandukanye, amakoperative SAGWE yo ku mitumba yose igize Komine Isare ukwo ari 16, abigisha bari bashajije n'umwambaro mushasha, abari mu mugwi w'umupira w'amaguru uzwi kw'izina rya Wasps FC, abanyeshure bo mu mashure mato mato n'ayisumbuye, harimwo n'Ishure ryisumbuye rya Gahabwa ryabiryoheje, aho na Buramatari yarangije abaha agashimwe.
Abandi
bari muri urwo rugendo ni abatwara amapikipiki, aho berekanye ubuhinga butari
buke. Mu kugaragaza umunezero w'ukwigina intahe y'ukwikukira batwara
amapikipiki mu bugenegene budasanzwe. Bamwe bayagirako bayahagazeko, abandi na
bo bakayagirako bagerekeranye, n'utundi tugenegene tutari duke berekanye.
Bamwe mu
bagendesha amapikipiki © Ifoto na Bernard
NDABINENGESERE
Défilé y'abasirikare n'abapolisi ni yo yasozereye umwanya w'urugendo, aho wabona ko abenegihugu bayirorerana igishika cinshi kuko umugwi w'abasirikare n'abapolisi watambukana ubuhinga budasanzwe. Eka mbere barerekanye n'ubundi buhinga, nk'urukino rw'indwano rwitwa Karate. Iyo défilé irangiye, abavuza ingoma ni bo baciye buguruye intambo n'utugenegene tw'inkino. Abavuza ingoma batamba berekana ubuhinga bwabo, nk'ugutambisha ingoma ntoyi na nini bazifatishije amenyo.
Abavuzi
b'ingoma bo muri Komine ya Isare © Ifoto na Bernard NDABINENGESERE
Musitanteri
wa Komine Isare, ari na yo yari yakiriye ivyo birori, amaze kudondora ikomine
arongoye, yarahaye ikaze abitavye urwo rubanza bose, agirako amenyesha ko abenegihugu
arongoye bari ku kivi, kandi ko umutekano mw'ikomine arongoye ukwiye. Yaramenyesheje
ariko ko intambamyi zitabuze. Intambamyi nyamukuru yashikirije ni uko ibarabara
rishika ku murwa mukuru w'intara ritifashe neza.
Musitaneteri
wa Komine Isare, Gilbert NIYONKURU, ariko atanga ikaze © Ifoto na Bernard NDABINENGESERE
Twarashoboye kwumviriza intahe y'umwe mu babayeho mu gihe c'abakoloni, umutama yitwa Marcel. Uyu mutama ngo yariho igihe igihugu kitari bwikukire. Yavuze muri make uko igihugu casinzikajwe na ba Kavamahanga. Ngo barabategeka ibikorwa vy'akavunamafyigo, bakongera bakabakubita ibimoko. Ikindi, abo bazungu ngo baragatoza ku nguvu amagi, amasoro, ibitungwa bimeze neza, n'ibindi, bakaja kuvyifungurira ataco babahaye.
Ku bw'umutama Marcel, ngo n'ubwo abazungu baje bacanishamwo abenegihugu, bakagirako bakanabahekura mu kwica imboneza z'abarundi, nk'Umuganwa Ludoviko RWAGASORE n'izindi ncungu z'igihugu zagandaguwe ico gihe c'uguharanira intahe y'ukwikukira, abarundi bobo ngo bokwifatanira mu nda.
Umutama
yariho mu gihe c'abakoloni © Ifoto na Bernard
NDABINENGESERE
Ijambo nyamukuru ry'uwo musi ryashikirijwe n'Umupfasoni Nadine GACUTI, Buramatari w'intara ya Bujumbura. Afatiye ku civugo c'uwo musi cavuga kiti: «Dutsimbataze intahe y'ukwikukira mu gushira mu ngiro ibwirizwa twitoreye», yasavye abenegihugu kubungabunga iyo ntahe y'ukwikukira bagabiwe n'Imana Mushoboravyose, abasaba kandi kwama bafatanye mu nda, ngo bibuke iyo bavuye.
Buramatari w'Intara ya Bujumbura, Nadine GACUTI, ashikiriza ijambo nyamukuru ry'uguhimbaza isabukuru ya 57 Uburundi bumaze buronse intahe y'ukwikukira © Ifoto na Bernard NDABINENGESERE
Yaragize
n'ico avuga ku barongoye imigambwe, hejuru y'ugufatana mu nda nk'abasangiye
igihugu, akaba yaranabasavye kwama bisunga amategeko, na cane cane ko bimirije amatora.
Ba Musitanteri na bo yabasavye guhagarara magabo ngo amatora azogende neza
cane. Atumirira abenegihugu kwitaba n'uguhimbaza imisi mikuru ibiri bimirije
guhimbariza mu makomine, ari yo uw'ugufashanya n'ugushigikirana uzoba mu mpera
z'ukwezi kwa Mukakaro, be n'uwahariwe iterambere ry'amakomine uzoba mu ntango za
Myandagaro.
Yarangije
atanga ubushimwe ku bitanze gusumvya abandi. Abahawe udushimwe ni umukuru wa
zone Gatumba ku bw'integuro y'ivyo birori, ishure ryisumbuye rya Gahabwa muri
Komine Isare be n'abatwara Sentare y'intara ya Bujumbura ku bwa défilé iteye
igomwe bagize. Na we uwurongoye indero muri Komine Isare yahawe agashimwe kubw'uko
abigisha arongoye bari bitavye défilé ku bwinshi, kandi bashonesheje umwambaro
mushasha usa. Ntiyibagiye gushimira n'abasirikare n'abapolisi ku bw'uko baryoheje
Défilé.
Abatwa bo mu mugwi ndangakaranga "TUZAMURANE" bariko bariginta intahe y'ukwikukira kw'igihugu cabo; aha bariko batambana na Buramatari © Ifoto na
Bernard NDABINENGESERE
Ivyo birori vyarangiriye ku ntambo y'umugwi ndangakaranga «TUZAMURANE» w'abatwa aho Buramatari, Musitanteri wa Komine Isare n'uwurongoye Sentare y'Intara bakaba barabinezererewe cane gushika n'aho baja gutambana na bo. Izo ntambo ziheze, hakaba haciye haba ugufata ifoto y'umuryango y'abakorera mu biro vy'intara, ama Komine yose n'amazone bo mu ntara bari aho.
Bernard
NDABINENGESERE, mw'Isare, ku bwa Paruwase Rushubi
Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.
Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)
Muri irya misi,
Bumvise aya majambo Yezu yavuze ati: «Uwurya umubiri wanje akanywa
n’amaraso yanje arafise ubuzima budahera.», benshi mu bigishwa biwe bavuga
bati: «lyo mvugo iratugumiye, ni nde yoyemera?» Yezu yamara aca aramenya mu
mutima wiwe ko abigishwa biwe bavyidogera, arababwira ati: «Ivyo
birabatirimutsa? Hari akantu nimwabona Umwana w’umuntu aduze iyo ahora… Umutima
ni wo ubeshaho, umubiri nta co umara. Amajambo nababwiye ni umutima n’ubuzima.
Yamara muri mwebwe, harimwo bamwe batemera.» Na none Yezu kuva mu ntango yari
azi abatemera n’uwari kumugusrisha. Arongera ati: «Ni co gituma ndababwiye ko
ata woza iwanje, Data atabimuhaye.» Kuva ubwo, benshi mu bigishwa biwe baciye
biyonjorora, ntibaba bakimugendanira.
Yezu rero abwira bamwe cumi na babiri ati: «Namwe, mushaka kwigira?» Simoni
Petero aramwishura ati: «Mukama, turi bwirukire nde wundi? Ko ari wewe ufise
amajambo y’ubuzima budahera. Tweho twaremeye kandi turazi ko uri Umweranda
w’Imana.»
Â