Diyoseze >

Abandi bepiskopi >

Ugushimira Musenyeri w'Inarabibonye Evariste Ngoyagoye mu birori vy'ugusozera ukwezi kwa Bikira Mariya ku musozi wa Siyoni Gikungu

Ubushimwe bwatanzwe bwari bugizwe n'ibintu vyinshi. Abari mu mihari n'imigwi y'ubutumwa baramugabiye ikanzu y'isutani. Abanyeshure bari muri za kaminuza na bo baramuhaye isanamu iriko amashusho yabo bari kumwe na we, yanditseko ngo «Imana ni yo mizero yanje.» N'abakristu bashengerera ku Kirimba ca Bikira Mariya bo ku musozi Siyoni wo mu Gikungu na bo nyene ntibatanzwe, baramuhaye isanamu izomwibutsa ubutumwa yaranguriye ku Kirimba, yanditseko ngo «Imana nzima ni yo mizero yacu», bongera baramugabira ikimenyetso ca kabiri, gihambaye, inka buka, idoshe, yigendera. Uwundi yahawe akaganuke ni Umwepiskopi mushasha wa Diyoseze, Musenyeri Gerevasi Banshimiyubusa, ariko kubera ko wewe yari yagiye kurangurira ubutumwa ahandi, akaba yarakakiriwe n'icariho ciwe muri Diyoseze, Musenyeri Anatole Ruberinyange.  

Harashikirijwe amajambo menshi rero yo gushikiriza ubushimwe. Umuhuzabikorwa mu Butumwa bw'ibikorwa vy'Abalayike muri Diyoseze "CDAL", Patiri Arcade Nitunga ni we yugururiye abandi mu gukenguruka ivyiza Musenyeri Evariste Ngoyagoye yakoreye abakristu b'abalayike bo muri Diyoseze Nkuru ya Bujumbura mu myaka 21 yamaze ayihagarikiye. Mw ijambo yashikirije, Patiri Arcade yarerekanye uruhara rukomeye uwo mwepiskopi yagize, kuva igihe yatangura kurongora Diyoseze Nkuru ya Bujumbura, na rirya yatanguye ubutumwa bw'Umwungere mu bihe bitoroshe, aho hari mu mwaka w'1997, igihe c'intambara. 

Ku bwa Patiri Arcade, ngo bimwe mu vyo bibukirako Musenyeri Evariste Ngoyagoye ni ukwegeranya  urwaruka rwari rusa nk'urwashwiragiye, mu gihe hirya no hino mu gisagara hari imirwi itari mike yarwana, na vyo ivyo gusenga bikaba vyari umugani iwabo. Uwo Mwepiskopi rero ngo yarabaye umuvyeyi mwiza mu kubaragiza neza inkoni y'ubwungere, itari inkoni y'icuma, ariko riho ijambo ry'Imana. Musenyeri Evariste Ngoyagoye ngo yaraberetse inzira nziza ya Kristu, arafasha urwaruka gutera ruja imbere mu Bumenyi no muvy'Imana. Mu kubishimangira, Patiri Arcade yaravuze ati: «Ntimwigeze murambirwa, n'ubwo ari benshi babitura. Mwaritwararitse ibikorwa vy'abalayike mu mice yose igize igisata cabo. Mu makoraniro atandukanye y'urwaruka, mwararwitwararitse.» 

Musenyeri Evariste Ngoyagoye, ngo hari n'iyindi migwi myinshi yafashije kubaho no kurangura ubutumwa. «Kubwiwe, twaramenye imihari mishasha (Communautés nouvelles) nka "Communauté Emmanuel, Neo Catéchuménat, uw'abanaguwe muri Mutima-Mweranda (Renouveau Charismatique), n'iyindi, mw'ihangiro rimwe ko Kristu yomenyekana» (PatiriArcade Nitunga). Nk'abanaguwe muri Mutima-Mweranda ngo barakomerejwe caneukwemera kwabo, gutyo baramenyesha inkuru nziza, bamurikiwe n'uwo Mutima nyene,gushika n'aho Uburundi buterwa iteka ryo gutunganya amakoraniro mpuzamakungu, hatibagiweamakoraniro yagiye aratunganyirizwa mu kigo c'abafurera n'ababikira ciyemeje ibikorwavy'urukundo c'i Bujumbura (Foyer de charité). Musenyeri Evariste Ngoyagoyeazwiko ko ari we yatanze uruhusha ko haza abashikiriza b'Inkuru Nziza bavuye mumahanga. 

Haravuzwe kandi n'uw'ubutumwa bw'ingo n'imiryango. Ngo yaranaronkeje abubatse igisata kibajejwe. Abanyeshure bo muri za kaminuza na bo nyene barahaweabibutsamana babafasha  mu gukomeza ukwemera kugira ngo baroranye ivyigwa nkaburabwenge na nkomezamutima. Ikindi cavuzwe mu gushima ni imiryango mishasha («Chemin neuf», «Communauté de l'Emmanuel» n'iyindi). Musenyeri Evariste Ngoyagoye kandi ngo yaritwararitse n'igisata c'ubutungane n'amahoro, na co kikaba gihurikiyemwo abalayike batari bake, harimwo n'abari munzego zitandukanye z'igihugu c'Uburundi. 

Mw'ijambo yafashe na we, uwahoze ari Umwungere wa Diyoseze Nkuru ya Bujumbura, Musenyeri w'Inararibonye, Evariste Ngoyagoye, ahejeje gukenguruka no gushima amajambo n'ingabire zitandukanye yahawe, no kumenyesha ko «Bamufyinishije na we agahimbarwa», ni koyavuze, yaciye abishura mu ryungane rimwe gusa, ngo «Nakoze ico nategerezwa», ivyanejereje abari aho, nk'uko uwo ari we wese yashobora kubisoma mu maso yabo. Yarongeye arashima kandi n'iritazirano bamuhaye ngo «Inararibonye», kukongo na Musenyeri Stanislas Kaburungu yaryemeye, ari na we mukuru muvy'ikiringo c'imyaka arimwo. 

Yaribukije kandi ko mu mwaka w'1997 n'uw'1998 habonetse ubumwe bukomeyemu mihari n'imigwi y'urwaruka n'aho hari mu gihe kitoroshe cane cane akabikesha  ikigo «Foyer de la charité» c'i Bujumbura. Musenyeri Evariste Ngoyagoye yarasiguye ukuntu yakoranye na Patiri MukuruOttoman yari mu kigo c'aba Schoenstatt muri ico gihe, ari ho bubaka iyo Nsengero. Ntiyibagiye no kwerekana igikorwa c'igisata c'abalayike muri Diyoseze kuko benshi batari bwategere ibijanye n'icogisata.

Twobamenyesha ko abari aho, mw'ijwirya Patiri Arcade ajejwe gutunganya ubutumwa bw'abalayike, bamwemereye ko n'ubu nyene bazokwama bamugamburukira, kuko ngo «N'ubwo yaruhutse, azokwama ari Umusaserdoti».

Mu mumugwi umwe

Aleluya. Kristu yarazutse; umuco wiwe waratuboneshereje, twebwe yacunguje amaraso yiwe. Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Yohani (6, 30-35)

Muri irya misi,

Abayuda babwiye Yezu bati: «Ikimenyetso ukoze none ni ikihe ngo tubone, duheze twemere? Uza gukora iki? Basokuru bacu barariye mana mu gahinga, nk’uko vyanditswe ngo: “Yarabagaburiye umukate uvuye mw ijuru”.» Yezu arababwira ati: «Ni ukuri ni ukuri ndabibabwiye: Musa ntiyabahaye umukate uvuye mw’ijuru; Dawe ni we abaha umukate w’ukuri uvuye mw’ijuru, kuko umukate w’Imana ari wo umanuka uva mw’ijuru ukazanira abantu ubuzima.» Baramubwira rero bati: «Mukama, urakoze, uraduha uwo mukate.» Yezu arabishura ati: «Jewe ndi wa mukate w’ubuzima; uwunyegereye ntazoba agisonza, kandi uwunyemeye ntazoba akinyoterwa.»