Ibirori vyabereye mu kigo Foyer de Charité c'i Bujumbura, bikaba vyari vyatewe iteka n'Umwepiskopi Mukuru w'inararibonye, Nyenicubahiro Musenyeri Evariste Ngoyagoye, ari kumwe n'abasaserdoti bigeze gusangira ubutumwa n'urwaruka rwo muri uwo mugwi «WIGORE» bakiri abanyeshure

Urwaruka ruhurikiye mu mugwi «WIGORE» rwarahimbaje yubile y'imyaka 25 uwo mugwi umaze urangura ubutumwa, aho hari ku musi w'Imana igenekerezo rya 29 Nyakanga 2019. Ibirori vyabereye mu kigo Foyer de Charité c'i Bujumbura, bikaba vyatangujwe n'Inkuka ya misa yaherejwe n'Umwepiskopi Mukuru w'inararibonye, Nyenicubahiro Musenyeri Evariste Ngoyagoye, ari kumwe n'umusaserdoti yaragijwe ico kigo, Patiri Amand KANA, Patiri Jérémie BUKENE arongoye igisata ca Diyoseze gishinzwe ubutumwa bw'abalayike, n'abandi basaserdoti bigeze kuba barangurira ubutumwa muri uwo mugwi «WIGORE» bakiri abanyeshure.

 

Ijambo ry'intangamarara n'ugutanga ikaze ku batumire ryashikirijwe n'uwo arongoye ikigo «Foyer de Charité». Patiri Amand KANA yaciye abwira abatumire n'ishengero ryari ryanje muri ivyo birori icari kibakoranije, ko ari ukwigina yubile y'imyaka 25 mu mugwi «WIGORE» barangura ubutumwa bw'ugufasha abababaye. Yagize ati: «Mu myaka 25 WIGORE yakira Yezu ababaye, Yezu arwaye, Yezu agowe, Yezu yahebwe, ni igitangaro Umukama yadukoreye. Twebwe ngaha muri Foyer de Charité, aho mudusabiye ngo muze kugirira umusi mukuru wanyu hano, twarahimbawe cane, twumva ko dutewe iteka ryo kubakira.» Yaciye amenyesha mbere ko n'izindi ndinganizo zariho uwo musi bazikuyeho, kugira ngo ingene muri WIGORE bakiriye Yezu na We abakire, ko Yezu yashatse ko bidagadura iwe, nkuko na bo bidagaduye muri WIGORE.

 

Agasangwa kuri uwo musi, mu masabamana y'Ekleziya, ibisomwa vyeranda vy'uwo musi, tuvuge nk'Inkuru Nziza ya Yezu Kristu, yavuga ku wundi muntu wewe vyamugoye gufasha uwari yaragorewe kw'irembo iwe, inkuru y'umutunzi n'umworo Lazaro, mu nsiguro y'iryo jambo ry'Imana yashikirijwe na Musenyeri Evariste NGOYAGOYE, akaba yarakeje abo muri Wigore ku kuntu bobo bagerageza gufata neza ba Lazaro bari mu kibano iwabo. Yagize ati: «Mwebwe  rero, Yezu azobabwira ati: "Nari ndwaye, ni mwebwe mwantoye, ni mwebwe mwansuhuje, ni mwebwe mwanyambitse, ni mwebwe mwampaye akantu k'ukundemesha, none [...] nimushike mu bwami bw'Imana"». Araheza rero abasaba kugumya uwo mutima ngo babere akarorero keza benshi.

 

Na ryo ijambo nyamukuru ry'uwo musi rikaba ryashikirijwe n'Uwuserukira uwo mugwi, umusore Roger HAGABIYAREMYE, aho yatanguye amenyesha amamuko y'uwo mugwi, ibikorwa wagiye urarangura muri ico kiringo c'imyaka 25 umaze mu butumwa wishinze, be n'ivyo basaba bamwe n'abandi ngo Yezu ababaye abandanye yitabwaho. Amaze kwipfuriza yubile nziza abo basangiye ubutumwa, hari ivyo yabibukije, anabimenyesha abari aho, ko kuva uwo mugwi utangujwe n'abanyeshure batandatu kw'ishure ryisumbuye ryitiriwe ikiyaga Tanganyika (Lycée du Lac Tanganyika), mu mwaka w'1994, ari ho Umukama yabagabira WIGORE, aciye ku musaserdoti w'umumisiyonari, Patiri Xavier yaba muri paruwase Mikaheli Mweranda.

 

«Ni ivy'ukuri, uwo mugwi waje nk'inyishu mu rwaruka muri ico gihe co mu mwaka w'1994, aho ukwemera n'ugukunda bitari vyoroshe mu gihugu cacu [c'Uburundi], aho ibintu vy'ubwoko vyari vyiraye mu mitima myinshi.» Roger HAGABIYAREMYE rero akaba abona ko kuva ico gihe inyota yagumye ikura mu bakiranye urweze ubwo butumwa bw'ugufasha Yezu ababaye, mu nyuma mbere bakaba baragiye baradomeka uwo muriro w'urukundo no ku yandi mashure. Mbere aremeza adakekeranya ko uyu musi, mu bari mu mugwi WIGORE, urukundo rwaduze, ko bibonyemwo akanovera k'urukundo Imana yabakunze, ari na rwo baheza bagasabikaniriza uwo Yezu ababaye muri bene wabo. Yarangije akengurukira abo bose bagize ico baterera kugira ngo uwo musi wa Yubile bawuhimbaze neza.

 

Umugwi «WIGORE» ni umugwi uremesha indirimbo mu mahwaniro y'Ekleziya, ariko na cane cane ukaba uzwiko ukuremesha abagwaye badafise kiremesha. Uwo mugwi watanguye ibikorwa mu mwaka w'1994, kw'igenekerezo rya 24 Nyakanga. Ufise icivugo nyamukuru ngenderwako ngo «Tube umuco w'isi», abawugize bakaba barishingiye ingingo y'ukurondera Yezu mu bakene, mu barwaye, mu bababara, muri abo bose bahebwe n'ababo. Muri ivyo birori bakaba bari bifatanije na bene wabo bababoneye izuba, uhereye ku bawutanguje, n'abawudugije, gushika mbere no ku basaserdoti bawigezemwo.

 

Michel NIBITANGA, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga