Ku musi w'Imana igenekerezo rya 29 Nyakanga, kari akanyamuneza ntangere ku bakristu b'ahahora ari igisata ca Gasura, kuko ari ho bashikirizwa icese Paruwase Nshasha, iyo Paruwase yabo ikaba yarahawe izina rya «Paruwase Gasura yitiriwe Abamaratiri b'i Buganda». Ibirori vy'ukuyishikirizwa vyabereye mu nkuka y'imisa yaherejwe na Nyenicubuhiro Musenyeri Gerevazi BANSHIMIYUBUSA, Umwepiskopi Mukuru wa Diyoseze Nkuru ya Bujumbura, ari kumwe n'icegera ciwe, Musenyeri Anatole RUBERINYANGE, abasaserdoti batari bake, harimwo n'ivyariho vy'Umwepiskopi mu Ntara y'ubutumwa ya Muramvya.

Ibirori vy'ugushikiriza iyo Paruwase nshasha ya Gasura vyari vyitabwe n'abihebeye Imana, abari mu nzego zirongoye igihugu c'Uburundi, imvukira za Paruwase nshasha ya Gasura, n'abakristu benshi. Patiri Petero Karaveri NDAYIRAGIJE, icariho c'umwepiskopi mu ntara y'ubutumwa ya Muramvya, ni we yaserukiye bene Paruwase mu guha ikaze abitavye ibirori. Yaciye agirako asaba Umwepiskopi kurongora igisabisho c'inkuka y'imisa no kubagabira Paruwase.

Mu nsiguro y'ijambo ry'Imana, Nyenicubahiro Musenyeri Gerevazi BANSHIMIYUBUSA yamenyesheje abakristu ba Paruwase ko Gasura igiye kuba Paruwase nshasha, na bo araheza abasaba kwemera bakaba ibiremwa bishasha, nkako ngo kuva uwo musi bacitse umuryango mushasha, ngo ntibakiri igisata gihetswe n'abandi.

Inyuma y'insiguro y'ijambo ry'Imana, icegera c'Umwepiskopi wa Diyoseza Nkuru ya Bujumbura, Musenyeri Anatole RUBERINYANGE, ni we yaciye ahabwa ijambo ngo asome ingingo itangaza icese igenwa rya Paruwase Gasura, ingingo yanditswe n'Umwepiskopi wa Diyoseze Nkuru ya Bujumbura ubwiwe. Abakristu bo mu Gasura bakaba bakiranye akanyamuneza iyo ngingo.  Na we umusaserdoti yagenywe ngo abe ari we ayibera Patiri mukuru akaba ari Patiri Petero Karaveri NTAHONDEREYE.

Inkuka y'imisa irangiye, twaregereye Patiri Mukuru w'iyo Paruwase ivutse, maze aratumenyesha akanyamuneza yumva, n'ingene yakiriye ubwo butumwa bushasha n'ibikorwa azorangurira muri iyo Paruwase.

Icariho c'Umwungere mu ntara y'ubutumwa ya Muramvya na we nyene ntiyatanzwe kugaragaza akanyamuneza yuko Intara ajejwe yibarutse Paruwase. Pariri Petero Kaveri NDAYIRAGIJE, akaba yaraboneyeho gushimira abagize ico bafasha kugira ngo bashike kuri iyo ntambwe y'ugushikirizwa iyo Paruwase. Na bo abakristu b'iyo Paruwase yabasavye kugamburukira abasaserdoti babo.

Abandi bagaragaje akanyamuneza bafise ni abakristu bari bahejeje kuronswa Paruwase, bakaba baraserukiwe n'Umushingantahe Philippe NZOBONARIBA, imvukira yo mu Gasura. Mw'izina rya bene Paruwase, yaramenyesheje ishengero ryari aho ko bahimbawe cane, na rirya ngo imyaka yari yaramaze kuba myinshi bari mu muhango w'ukuronswa iyo Paruwase, mbere ngo bakaba bahora bigina yubile y'umuhango wa Paruwase.

Eka no mu bihebeye Imana bavuka muri iyo yabaye Paruwase kari akanyamuneza. Mama Chantal MUGIRASONI ni uwihebeye Imana wo mu kigo «Foyer de charité» c'i Bujumbura, avuka mu Gasura. Mw'ijambo yashikirije muri ivyo birori, yahamagiriye abakristu gufasha Paruwase ngo itere imbere, kuko mu bushasha bwayo ngo igikeneye vyinshi. Ikindi yabasavye ni ukurangwa n'urukundo n'ubumwe mu rugendo barimwo rugana Imana.

Paruwase nshasha ya Gasura yitiriwe Abamaratiri b'i Buganda iherereye mu ntara y'ubutumwa ya Muramvya, mu ntara ya Muramvya nyene mu vy'intwaro y'igihugu c'Uburundi. Iyo Paruwase ivyawe na Paruwase Munanira, yahora ikukira nk'igisata, ikaba ivukanye ibisata vyayo bwite bitandatu, ari vyo Gasura, Gatoza, Murehe, Migezi-Nete, Ngozi na Nyamurenge. Icicaro gikuru cayo kikaba giherereye muri zone Gasura yo muri Komine Mbuye, ari na ho hari Isengero nkuru ya Paruwase.

Odrade KAZE, mu Gasura, ku bwa CEDICOM