Vikariya >

Mikaheli Mweranda >

Ifubwa ry'umuhisi Paulin MANIRAMBONA yahora ari Umumenyeshamana muri Paruwase Ruziba

Umuhisi Paulin MANIRAMBONA yahora arangura ubutumwa muri Paruwase Ruziba nk'Umumenyeshamana, akaba yari arongoye abamenyeshamana. 

Mu gusozera ubuzima bwiwe bwo ngaha kw'isi, Umumenyeshamana Paulin MANIRAMBONA akaba yahitanywe n'isanganya y'imodoka yabereye iruhande y'ico kibanza nyene c'amaziko, ku musi w'Imana igenekerezo rya 6 Gitugutu 2019, igihe c'isaha zibiri z'ijoro, aho yari avuye ku butumwa bwiwe bwa misi yose. 

Ugufubwa kw'umuhisi Umumenyeshamana Paulin MANIRAMBONA kwatangujwe n'inkuka ya Misa y'ukumuhereza Umukama, inyuma y'aho abiwe bari bahejeje kumusezera, aho yari amaze imisi abitswe mu buruhukiro bw'ibitaro vyitiriwe Umwami samuragwa Karoli («Prince Régent Charles»).

Iyo nkuka yaherejwe kw'isaha zine  zo mu gitondo, irongowe na Patiri Venant NTAHONKIRIYE arongoye umubano w'abapatiri b'inyigisho rukristu, abo bita «Les Pères Doctrinaires» mu rurimi rw'igifaransa, bo mu Kinindo, ari na bo Paruwase Ruziba yaragijwe. Uwo musaserdoti, akaba yarafatikanije n'abandi basaserdoti basangiye ubutumwa, ari bo Patiri mukuru wa Paruwase, na Patiri Innocent BANDYATUYAGA ubu arongoye Paruwase Magara, ariko akaba yahoze afasha ubutumwa kuri iyo Paruwase nyene, mu myaka yahera.

Urwo rubanza kandi rwari rwitabwe n'isinzi ry'abakristu bari baje mu Nkuka ya Misa, be n'abari baje vy'umwihariko gusezera uwo muhisi.

Mu nsiguro y'ijambo ry'Imana yamurikiye uwo mugirwa w'ugusezera rukristu uwo mumenyeshamana, umusaserdoti yaragize n'ico yavuze ku bijanye n'ivyaranze ubuzima bw'uwo muhisi mu vy'ubutumwa yari ashinzwe. Yavuze ati: «Paulin MANIRAMBONA

yari umuntu Afise umwete n'ukwitaho ubutumwa bwose yari ajejwe kuri Paruwase, ubutumwa yari amazemwo imyaka  25».

Yaboneyeho kwibutsa ko uwo muhisi ari mu bakiye uwo muryango w'abasaseredoti. Ikindi yafashije ngo ni ukwigisha abitegurira amasakaramentu atandukanye. Eka mbere ngo yari azi kunezererwa hamwe n'abanezerewe, akababarana n'abababaye, gushika n'aho yaraherekeza n'abarwaye, akakira n'abo bose baza bamugana. «Yari umuvuzi akomereye, kuko yafasha benshi bakomeretse ku mutima; arengukanye ibikomere vya benshi, tumufateko akarorero», ni ko yabandanije avuga.

Tubibutse ko Paulin MANIRAMBONA abaye uwundi mumenyeshamana Paruwase Ruziba ibuze, inyuma ya Gédeon NDORICIMPA yitavye Imana ku wa 26 Ruheshi 2010. Iyo Paruwase yarabuze kandi n'Umusaseredoti, umuhisi Patiri Mascarin RUCIANO bita Mutama, yari arongoye umubano w'abapatiri b'inyigisho rukristu («Les Pères Doctrinaires»).

Paulin MANIRAMBONA yitavye Imana yari akiri mu butumwa nk'Umumenyeshamana, akaba kandi yari n'inararibonye mu muhari wa CHIRO, kuri Paruwase Ruziba, ari na co gituma ivyo birori vyaranzwe n'isinzi ry'abakristu, aba-CHIRO bakaba bari bafashe iya mbere mu kumuherekezanya iteka, bamuvugiriza amatarumbeti yabo, bafise n'imyambaro ibaranga. Asize umukenyezi n'abana indwi ataho barigeza. Imana imwakire mu Bwami bwayo. 

Mu mumugwi umwe

Aleluya. Kristu yarazutse; umuco wiwe waratuboneshereje, twebwe yacunguje amaraso yiwe. Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Yohani (6, 30-35)

Muri irya misi,

Abayuda babwiye Yezu bati: «Ikimenyetso ukoze none ni ikihe ngo tubone, duheze twemere? Uza gukora iki? Basokuru bacu barariye mana mu gahinga, nk’uko vyanditswe ngo: “Yarabagaburiye umukate uvuye mw ijuru”.» Yezu arababwira ati: «Ni ukuri ni ukuri ndabibabwiye: Musa ntiyabahaye umukate uvuye mw’ijuru; Dawe ni we abaha umukate w’ukuri uvuye mw’ijuru, kuko umukate w’Imana ari wo umanuka uva mw’ijuru ukazanira abantu ubuzima.» Baramubwira rero bati: «Mukama, urakoze, uraduha uwo mukate.» Yezu arabishura ati: «Jewe ndi wa mukate w’ubuzima; uwunyegereye ntazoba agisonza, kandi uwunyemeye ntazoba akinyoterwa.»