Kuri uyu wa kabiri igenekerezo rya 19 Munyonyo 2019 ni ho umuhisi akaba n'umuvyeyi, Rose SINDAKIRA, yashinguranwa iteka rukristu. Urubanza rw'ukumushingura rwatangujwe n'Inkuka ya misa yabereye muri Paruwase yitiriwe Umuryango Mweranda yo mu Kinama, irongowe na Nyenicubahiro Musenyeri Gerevazi Banshimiyubusa, Umwepiskopi mukuru wa Diyoseze Nkuru ya Bujumbura, yari yaje kwifatanya na Patiri Innocent Thibaut NDORERAHO, Patiri mukuru w'iyo Paruwase akaba n'umwe mu basigwa b'uwo muhisi. Umugirwa w'ukumushingura ukaba wabereye mu Rushubi, mu ntara yahora abamwo kandi yavukamwo, Bujumbura.
Umuhisi n'umuvyeyi Rose SINDAKIRA yitavye Imana ku wa kabiri igenekerezo rya 12 Munyonyo 2019. Uwo muvyeyi bariko baraherekeza mu gisabisho c'Inkuka ya misa no kumushingura kuri uyu wa kabiri, akaba yari umuvyeyi wa Patiri Innocent Thibaut NDORERAHO. Iyo nkuka ya misa y'ukumusezera rukristu yari yitabwe n'abasaserdoti batandukanye basangiye ubutumwa n'uwo musaserdoti muri Diyoseze, abihebeye Imana, imiryango y'amaraso y'uwo muvyeyi, incuti n'abagenzi, be na bamwe bamwe mu bakristu bo muri iyo Paruwase bari baje kwifatanya mu mubabaro n'umusaserdoti wabo ku bw'ukubura umuvyeyi wiwe.
Rose SINDAKIRA yari yavutse ku wa 22 Nyakanga 1939, avukira ku musozi wa Nyarumpongo muri Komine Isare, Paruwase Rushubi. Se wiwe yitwa Zakariya Shitagu, nyina wiwe akitwa Magdaleine NIZIGIYE. Ashengeye i Bukama yari umukristu, kuko yari yarabatijwe. Mbere yari yabatijwe akiri muto cane, amaze imisi icumi n'ibiri gusa avutse, aho hari ku wa 2 Gitugutu 1939, akomezwa muri Mutima-Mweranda ku wa 7 Myandagaro 1947, amaze imyaka umunani.
Umwana wiwe, Patiri Innocent Thibaut NDORERAHO, amushingira intahe ko ubwo bukristu bwiwe atari abuze aho yari yarabukuye, kuko se w'uwo muhisi yari Umujenama akomeye cane wa Paruwase Buhonga. Eka mbere n'aho Paruwase Rushubi ivukiye, yarabandanije ubwo butumwa. Ni na co catumye umwana wiwe amurerera mu bukristu, mbere aranamushira mw'ishure, amahirwe ataronswe n'abigeme bo mu runganwe rwiwe. Amashure mato mato yayize aho mu Rushubi, ayisumbuye ayabandanyiriza mw'ishure-nderabigisha ry'i Bukeye, aho yaronkeye urupapuro rw'umutsindo, mu mwaka w'1959. Yaciye ashingwa amabanga y'ubwigisha kw'ishure «Notre Dame» ryo kuri «Saint Michel», gushika yubake urwiwe.
Akiri muto, Rose SINDAKIRA yaripfuje rwose kuba umubikira. Yumva ko umuhamagaro wiwe yowerekeje mu muryango w'ababikira bene Tereziya. Ariko Imana yoyo iraheza imuha uwundi muhamagaro bakwiranye, uwo Yo nyene yari yaramugeneye: ukwubaka rukristu. Uwo ni wo yahavuye yinjiramwo mu mwaka w'1963, yubakanye n'umukunzi cane wiwe, umushingantahe Balthazar NDORERAHO. Ariko amaze kwubaka, yagumye asaba Umukama ko mu bana biwe hovamwo uwokwihebera Imana, kandi yarumviye igisabisho ciwe.
Urugo rw'umuvyeyi Rose SINDAKIRA n'umushingantahe wiwe Balthazar NDORERAHO, Imana yararuteye iteka mu kuruhezagiza abana bane. Abo bana bose babaronkeye mu mu ntara zitandukanye aho bagiye baraba. Claude Jean Bosco NDORERAHO bamuvyariye i Bururi (1964), René Pascal Marie José NDORERAHO i Ngozi (1966), Willy NDORERAHO (1968) na Innocent Thibaut NDORERAHO (1970) ari na we uyu musi ari umusaserdoti w'Umukama, aramutswa Paruwase yo mu Kinama, bamuvyariye i Gitega.
Ukwo kuguma bimuka vyatewe n'uko Serugo yari yashinzwe n'igihugu amabanga y'ugutwara izo ntara zose nka Buramatari, ivyatumye baja barimukana n'umukenyezi wiwe aho agiye hose. Ni na co canatumye kandi banumvikana ko Umupfasoni Rose SINDAKIRA yoheba akazi k'ubwigisha, agakurikirana ivy'urugo gusa. Uwo mushingantahe wiwe, intara ya Bururi yayirongoye kuva mu mwaka w'1964, mu nyuma iya Ngozi mu w'1965, iya Gitega na yo mu w'1966, gushika aho mu Burundi bakombora ingoma, igasubirizwa n'intwaro ya Republika, maze bagaheza bakisubirira mu ntara y'iwabo y'amavuko.
Ariko rero uwo muvyeyi yahavuye apfakara, kandi apfakara akiri muto, ku myaka 33, apfakajwe n'urwimo rwo mu mwaka w'1972. Mu muryango wari umubabaro nta ngere, kuko n'ikiziga c'umucance wiwe batigeze banakibona, vyumvikana ko batigeze bamugandarira. Mbere gushika n'ubu ntibari bwanamugandukeko, ari na co gituma muri iyo Nkuka ya misa yaherejwe ku bw'ugusezera uwo muhisi n'umuvyeyi Rose SINDAKIRA, n'uwo mucance wiwe na we nyene yibutswe, arasabirwa.
Umuhisi akaba n'umuvyeyi, Rose SINDAKIRA rero, abana biwe barafise ivyo bazomwibukirako vyiharije, ari vyo ukwishisha bugufi, kuko kuba yari yubakanye n'umutegetsi, ariko akama afata isuka, n'ingendo za kure n'akantu aja kurima kw'itongo ry'umuryango, si ivya bose. Ikindi kimenyetso c'umuco mwiza camuranze ni ukwitaho abandi, be n'ugukunda Imana n'abantu. Mu buzima bwiwe rukristu na bwo, uwo muvyeyi yarakunda ibintu bitatu: Inkuka ya misa, Irozari ya misi yose, be n'ugusoma Bibiliya imisi yose. Hejuru y'aho, yari n'umukunzi wa Tereziya w'Umwana Yezu.
Na yo imisi yiwe ya nyuma uko yagenze, umutamakazi Rose SINDAKIRA, n'ubwo yari yakitswe n'amagara, yarakoze uko ashoboye kwose, agenda asezeye abana n'abuzukuru biwe. Mbere mu misi ibiri yiwe ya nyuma hoho, imbere y'uko acikana, yari yagiye gusezera ababa mu Ruyigi. Abuzukuru biwe ari bubasezeze akajambo, aho bari bamubonye ariko aratekera impuzu ziwe, kandi anategura neza icumba ciwe. Bamubajiie aho yagomba aje, na we abishuyishurira asubiramwo incuro zitatu, ati: «Baraza kudutora mu kanya!» Yungamwo ati: «Mbega mwebwe ko mutitegura?». Bagiye gutegera neza ico yavuze aho baviriye mu gikoni, bagarutse kumuraba, basanga Umukama yamaze kumutwara. Uwo mukunzi wa Kristu, Imana nimuhe kwiruhukira mu mahoro.
Michel NIBITANGA, CEDICOM
Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.
Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)
Muri irya misi,
Bumvise aya majambo Yezu yavuze ati: «Uwurya umubiri wanje akanywa
n’amaraso yanje arafise ubuzima budahera.», benshi mu bigishwa biwe bavuga
bati: «lyo mvugo iratugumiye, ni nde yoyemera?» Yezu yamara aca aramenya mu
mutima wiwe ko abigishwa biwe bavyidogera, arababwira ati: «Ivyo
birabatirimutsa? Hari akantu nimwabona Umwana w’umuntu aduze iyo ahora… Umutima
ni wo ubeshaho, umubiri nta co umara. Amajambo nababwiye ni umutima n’ubuzima.
Yamara muri mwebwe, harimwo bamwe batemera.» Na none Yezu kuva mu ntango yari
azi abatemera n’uwari kumugusrisha. Arongera ati: «Ni co gituma ndababwiye ko
ata woza iwanje, Data atabimuhaye.» Kuva ubwo, benshi mu bigishwa biwe baciye
biyonjorora, ntibaba bakimugendanira.
Yezu rero abwira bamwe cumi na babiri ati: «Namwe, mushaka kwigira?» Simoni
Petero aramwishura ati: «Mukama, turi bwirukire nde wundi? Ko ari wewe ufise
amajambo y’ubuzima budahera. Tweho twaremeye kandi turazi ko uri Umweranda
w’Imana.»
Â