Twama tubigaragaza mu kwemera kwacu, ku misi y'Imana no ku misi mikuru cane, tuti: «Kandi azogaruka n'ubuninahazwa, aje gucira urubanza abazima n'abapfuye, ingoma yiwe ntizoba igihera».
Iyo ngoma ya Kristu ni imwe nyene Umukama Imana, aciye ku muhanuzi Natani, yadondorera Dawudi, ati: «Nzogena mu bazokuvukako uwuzogusubirira, azova mu bura bwawe, nkomeze ingoma yiwe...! Nzokomeza intebe y'ubwami bwiwe na ntaryo. Nzomubera umuvyeyi, na we ambere umwana...! Umuryango wawe n'ubwami bwawe bizorama na ntaryo imbere yanje, intebe yawe y'ubwami ihangame imyaka yose» (2 Sam.7, 12.13.14.16). Ni na vyo Umumalayika Gaburiyeli yabwiye Bikira Mariya mw'iburwa ry'ivuka rya Yezu, aho yagize ati: «Azogaba umuryango wa Yakobo imyaka yose, n'ingoma yiwe ntizohera» (Luk.1,33). Ivyo rero, hamwe n'ibindi vyinshi vyanditse mu bitabu vyeranda, biratwereka ukwamaho kw'ubwami bwa Kristu.
Ubwami bwiwe ni ubwami bw'umuco wamaho, ni bwo yavyagijemwo wa mubisha yigaye. Na twebwe, igihe twabatizwa, Mana Data yadukuye mu bubasha bw'umuzimagiza, atuvyagiza mu Bwami bw'Umwana wiwe akunda cane (Abanyakolosi 1,13). Ubwo bwami bwaratanguye, buri mu mitima y'abemera, turindiriye ko buranguka rwose, aho Kristu azoba vyose muri vyose (banyakolosi 3,11). Bumeze nka ka gatete ka sinapi gakura kakaba igiti kinini; bumeze nk'umwambiro ukakamisha umutsima. Kugira ngo buzoranguke rwose muri twebwe, kandi tugire agahimbare kamaho, dusabwa kuvavanura n'ibikorwa vy'umwijima, tugakunda umuco n'ukuri.
Hariho abantu benshi, mbere no mu bakristu nyene, badatahura neza ibijanye n'Ubwami bwa Yezu; babona umengo ntibwiserura nka neza. Kuri ivyo, Yezu avuga ati: «Ubwami bwanje si ubwo ngaha kw'isi; iyo Ubwami bwanje buba ari ubwo kuri iyi si, abantu banje baba bangwaniye singwe mu minwe y'Abayahudi»
(Yoh.18,36). Asangiye ubwami na Se na Mutima Mweranda. Ni ubwami bw'imyaka yose. Umusalaba ni co kimenyetso c'ubwo bwami.Ubwami bwa Kristu ntibuhagaze ku mfungurwa no ku nyobwa; ni ubutungane, amahoro n'akanyamuneza muri Mutima-Mweranda (Abanyaroma 14,17).
Kuri uyu musi rero, nitunezerwe, duhimbarwe, dutambe dutarike, kuko twigina Umwami wacu Yezu Kristu. Ni Umwami w'urukundo, w'ikigongwe, w'amahoro; ni we Ntsinzi yacu muri vyose. Ese twomwegukira rwose ubu no mu myaka yose.
Amen!