Vikariya >

Mikaheli Mweranda >

Nta wuzohora arangura ubutumwa ubwo ari bwo bwose muri Paruwase Mikaheli Mweranda atari mu mubano-rukristu

Iyo nama yatangujwe n'igisabisho c'ukuninahaza Imana cakurikiwe n'ugusabikinya ijambo ry'Imana ryavuye mw'ikete rya mbere Umutumwa Paulo mweranda yandikiye abanye Korenti (1Kor.12-1-11) rivuga ivyerekeye ingabirano za Mutima-Mweranda. Mu nsiguro y'iryo jambo ry'Imana, Patiri Mukuru yashimikiye kw'ijambo ngo: «Ingabirano y'umw'umwe iteza imbere mugenziwe, kuko ingabirano zuzuzanya mu kwubaka umuryango». 

Inama nyezina yatanguriye ku kuraba icegeranyo c'inama yabaye kw'igenekerezo rya 11 Myandagaro 2019, kugira ngo barabire hamwe ingene imibano rukristu yotera imbere. Haba mu vyari muri ico cegeranyo, haba no mu vyiyumviro vyatanzwe n'abari bitavye iyo nama, ibibazo nyamukuru vyavuzwe cane ni uko urwaruka rudahurumbira cane kuja mu mibano rukristu, kandi ari ho hategurirwa kazoza keza k'urwaruka muri Ekleziya no mu gihugu. 

Intererano zatazwe zikaba ari uko abavyeyi bofandikanya n'abarongoye Paruwase mu gutegura inyigisho zihimiriza urwo rwaruka, ndetse n'abasasardoti be n'abihebeye Imana bakagwiza imigenderanire bogiriranira n'imibano rukristu. Patiri mukuru, amaze kwumva ivyiyumviro vyashikirijwe, yaciye ashinga ingingo zimwe zimwe zemejwe n'abari aho. 

Ingingo zashinzwe ni uko abari mu mihari n'imigwi y'ubutumwa bose bategerezwa kuba bari mu mibano rukristu. Ikindi, ngo hagiye kuba urutonde rw'imibano-rukristu n'aho ibarizwa, be n'urutonde rw'imihari n'imigwi y'ubutumwa, abayigize, n'aho baba. Kukaba nka ko, ngo nta worangura ubutumwa ubwo ari bwo bwose muri Paruwase yirengagije ukuba mu mubano rukristu. 

Ku bijanye n'imisi n'amasaha yokworohereza bose, abari mu nama bumvikanye ko imibano-rukristu yose izohora ikorana buri wa gatatu w'iyinga, igakoranira mu bibanza bitegekanijwe, kuva kw'isaha icumi na zibiri z'umugoroba gushika kw'isaha imwe y'ijoro (18h00-19h00). Muri uwo mwanya, ngo nta gikorwa na kimwe kizoheza ngo kirangurirwe kuri Paruwase. 

Na co igihe c'ugushira mu ngiro iyo ndinganizo nshasha y'ugukorana kw'imibano-rukristu, ukwezi kwa mbere kw'umwaka w'2020 ni kwo kwagenwe, ku wa gatatu w'indwi ya mbere, no kubandanya. Ivyo vyose bimaze kwemezwa, Patiri mukuru yamenyesheje ko ukwezi kwa Kigarama kwose kwoba ukw'ukumenyesha n'ugusigurira abakristu bose izo ngingo nshasha zemerejwe muri iyo nama. 

Na we umukuru w'abanaguwe muri Mutima-Mweranda muri iyo paruwase, mw'ijambo ryiwe, yaragize ico yisabira abasaserdoti. Ku bwiwe, ngo ikindi coteza imbere imibano rukristu ni uko abasaserdoti n'abihebeye Imana bogendera cane iyo mibano, kuko ngo biheza bigakabura abakristu, abato n'abakuze. Iyo nama yasozererewe ku nkuka ya misa, hakaba hakoreshejwe ibisomwa vyo ku w'Imana wa mbere w'Ubushikiro. 

Jean Claude NIZIGIYIMANA, Paruwase Mikaheli Mweranda          

Mu mumugwi umwe

Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)

Muri irya misi,

Bumvise aya majambo Yezu yavuze ati: «Uwurya umubiri wanje akanywa n’amaraso yanje arafise ubuzima budahera.», benshi mu bigishwa biwe bavuga bati: «lyo mvugo iratugumiye, ni nde yoyemera?» Yezu yamara aca aramenya mu mutima wiwe ko abigishwa biwe bavyidogera, arababwira ati: «Ivyo birabatirimutsa? Hari akantu nimwabona Umwana w’umuntu aduze iyo ahora… Umutima ni wo ubeshaho, umubiri nta co umara. Amajambo nababwiye ni umutima n’ubuzima. Yamara muri mwebwe, harimwo bamwe batemera.» Na none Yezu kuva mu ntango yari azi abatemera n’uwari kumugusrisha. Arongera ati: «Ni co gituma ndababwiye ko ata woza iwanje, Data atabimuhaye.» Kuva ubwo, benshi mu bigishwa biwe baciye biyonjorora, ntibaba bakimugendanira.

Yezu rero abwira bamwe cumi na babiri ati: «Namwe, mushaka kwigira?» Simoni Petero aramwishura ati: «Mukama, turi bwirukire nde wundi? Ko ari wewe ufise amajambo y’ubuzima budahera. Tweho twaremeye kandi turazi ko uri Umweranda w’Imana.»