Ibisata >

Ingo n'Imiryango >

Umwiherero ku bajejwe ubutumwa bw'ingo n'imiryango mu gisagara ca Bujumbura

Izo nyigisho zatangiwe mu gasengero (Chapelle) k'iyo Paruwase, ku civugo kigira kiti: «Ndarengutse, untume ico ushaka». Uwo mwiherero ukaba watangujwe n'igisabisho c'ukuninahaza Imana cabaye kw'isaha zibiri n'iminota mirongo ine n'itanu (08h45) zo mu gatondo, aho abajejwe ubwo butumwa baninahaza Imana yo yabagize abayifasha mu gikorwa co kurema. 

Inyuma y'ico gisabisho, hakurikiye inyigisho yatanzwe na Patiri Félix Fupi arongoye igisata kijejwe ubutumwa bw'ingo n'imiryango muri Diyoseze Nkuru ya Bujumbura, akaba na Patiri mukuri w'io paruwase. Muri iyo nyigisho, uwo ajejwe ubutumwa bw'ingo n'imiryango yashimikiye kw'ijambo «Ukugamburuka». Aha uwo musaseredoti akaba yamenyesheje abo bajejwe ubwo butumwa ko babwirizwa kurangwa n'ubugamburutsi, bahereye mu ngo iwabo. Kukaba nkako, ngo ntawoshobora kugamburukira Ekleziya atabanje kugamburuka mu rugo rwiwe. Yagize ati: «Ubugamburutsi ni umuryango w'ubuzima, kuko kugira ngo Imana itange ubuzima ari uko habaye umuntu agamburuka!» 

Uwo musaserdoti yabandanyuje yemeza ko umuntu atagamburutse Imana itokora. Aha yagarutse ku bahanuzi bamwe bamwe, abo Bibiliya ivuga ko batagamburukiye Umukama, araheza amenyesha ko batorohewe. Ngo nka Sauli, Imana yari yamuhezagiye, mu gihe yari agiye kurwana na ho imuha itegeko ry'ugutikiza ico asanzeho cose, ariko wewe kubera ukugambarara, ahubwo acisha ah'iwe, atoramwo ibimasa bimwe, hakubitikiza arabinyaga ngo abishikanire Imana. Iryo shikanwa ngo ntiryayihimbaye na mba, kuko ngo ata bugamburutsi bwabayemwo. Mbere n'ubwami bwa Sauli ngo bwaciye buhagarara. 

Uwundi yatanzweko akarorero k'uwutagamburukiye Imana ni Musa: uyu na we, ngo Imana yari yamubwiye ngo akubite rimwe gusa ku gitandara c'ibuye kugira ngo abantu baronke amazi, ariko wewe aca yicishiriza ah'iwe, akubita kabiri. Imana ngo yaciye imubwira iti: «Kubera ko wakekeranije, ntuzobona igihugu c'isezerano.» Kandi koko, ngo ntiyashitseyo. 

Ku rundi ruhande, uwo musaserdoti yaravuze kandi n'uturorero tw'abagamburutse batabanje guharira: Mariya na Yozefu. Aha yaribukije ya nyishu Maria yahaye umumalayika, aho amariye kuronka ubutumwa ko azokwibaruka umwana w'Imana, aho yavuze adahigimanga ati: «Jewe ndi umusavyi w'umukama, nibibe nk'uko ubivuze». Na Yozefu nyene ngo amaze kumva umugambi w'Imana kuri Bikira Mariya, ngo yaremeye ata guharira. 

Mu gusozera, Patiri Félix Fupi akaba yaboneyeho gusaba abumvirije inyigisho yiwe ko hatogira uwohava yongerako ikintu na kimwe mu butumwa ajejwe, atari ico yahawe na Ekleziya, kuko ngo bitabaye ukwo, ngo vyohava bituma adashika mu gihugu Imana yabasezeraniye. Ahubwo yabatumiriye gusaba ingabirano y'ubugamburutsi, kuko ngo ukugamburuka ari co cerekana ko bakiriye ubukuru bw'Imana mu bantu. 

Tubamenyeshe ko inyuma y'iyo nyigisho hakurikiye ugushengerera Yezu mw'Ukaristiya, hanyuma na ho igisabisho c'Inkuka ya misa yaherejwe na Patiri Pierre Nsengiyumva. Mu nsiguro y'ijambo ry'Imana akaba yarafatiye kuri hamwe Yohani Batista yagize amakenga ko Yezu yoba ataraza, kuko wewe yari yiteze Yezu nk'Umwami ababaye bose, kandi n'abakuru bose batinya, ku buryo atumva ukuntu yomureka ngo agume mw'ibohero. Akaba yarasavye rero abo bajejwe ubutumwa bw'ingo n'imiryango ko mu vyo bakora hatoheza ngo habemwo ugukekeranya, ko mu gihe bobona ko bataronse ivyo basaba, boheza bakagumya umutima, bakabandanya bizeye Yezu baremye. 

Éloge NIYONGABO, mu gisata c'ingo n'imiryango          

Mu mumugwi umwe

Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)

Muri irya misi,

Bumvise aya majambo Yezu yavuze ati: «Uwurya umubiri wanje akanywa n’amaraso yanje arafise ubuzima budahera.», benshi mu bigishwa biwe bavuga bati: «lyo mvugo iratugumiye, ni nde yoyemera?» Yezu yamara aca aramenya mu mutima wiwe ko abigishwa biwe bavyidogera, arababwira ati: «Ivyo birabatirimutsa? Hari akantu nimwabona Umwana w’umuntu aduze iyo ahora… Umutima ni wo ubeshaho, umubiri nta co umara. Amajambo nababwiye ni umutima n’ubuzima. Yamara muri mwebwe, harimwo bamwe batemera.» Na none Yezu kuva mu ntango yari azi abatemera n’uwari kumugusrisha. Arongera ati: «Ni co gituma ndababwiye ko ata woza iwanje, Data atabimuhaye.» Kuva ubwo, benshi mu bigishwa biwe baciye biyonjorora, ntibaba bakimugendanira.

Yezu rero abwira bamwe cumi na babiri ati: «Namwe, mushaka kwigira?» Simoni Petero aramwishura ati: «Mukama, turi bwirukire nde wundi? Ko ari wewe ufise amajambo y’ubuzima budahera. Tweho twaremeye kandi turazi ko uri Umweranda w’Imana.»