Uwamenyesheje icatumye abemera Yezu kristu baba i Bujumbura bakoranira hamwe ni uwuserukira imbere y'amategeko ishirahamwe mpuzamashengero mu Burundi (CNEB), Pasteur Révérend Nicodème AHISHAKIYE. Uwafashije abari aho kuzirikana ijambo ry'Imana ryamurikiye ico gisabisho na we ni uwo ku ruhande rwa Ekleziya Katolika, Musenyeri Anatole RUBERINYANGE, asanzwe ari n'icegera c'Umwepiskopi wa Diyoseze Nkuru ya Bujumbura. Na zo indirimbo zaremesheje ico gisabisho zashikirijwe n'abaririmbiramana bavuye mu mashengero atandukunye yari ngaho, zikaba zarimwo amajambo ahayagiza ko bose ari abana b'Imana, kandi ari bamwe.
Mu kumenyesha icatumye abemera Yezu kristu baba i Bujumbura bakoranira hamwe,
Pasteur Révérend Nicodème AHISHAKIYE yamenyesheje ko bahuye ngo bemeze ubumwe bafitaniye, bongere bashikirize Imana imitwaro bafise muri uno mwaka w'2020. Yagize ati:
«Twemera Imana imwe, tukagira n'imitwaro imwe ko igihugu cacu coronka amahoro, n'ibihugu bibanyi, bikagira amahoro.»
Akaba yasavye abakristu bose ko Yezu bomwisunga, bakamugumiza mu buzima bwabo muri uyu mwaka, cane cane mu gihe c'amatora, ngo nta nkeka Imana izobumvira, yishure n'ibisabisho vyabo.
Na we
Musenyeri Anatole RUBERINYANGE, ijambo ry'Imana yasabikanirije abari aho, ni iriri mu gitabu c'Ibikorwa vy'abatumwa (Ibik.27,18-28). Mu nsiguro yahaye ico gisomwa, yabwiye abitavye ico gisabisho ko abemera Yezu Kristu, ibatisimu yabinjije mu muryango w'abana b'Imana, ko ku bw'ivyo bagize umuryango umwe, mbere ngo bakaba banagira mu bwato bumwe, mu rugendo rwabo rugana mw'ijuru. Ku bwiwe rero, ngo ko basangiye urugendo kuri iyi si, ngo babwirizwa no guharanira ubwo bumwe, bagafatana mu nda mu budasa bwabo.
Uwo mumenyesha w'Inkuru Nziza ya Kristu w'umu Katolika yaranamenyesheje kandi n'ukuntu yumva vyogenda igikorwa c'uguharanira ubwo bumwe gishike kw'ihangiro. Ku bwiwe, ngo abama baza gusabira hamwe ubwo bumwe mu gisabisho bobikorana ukwemera. kandi ngo birashoboka, n'aho amashengero ari menshi. Yarongeye kandi aramenyesha ko ubwo bumwe bwokunda mu gihe biyambuye ibibaremerera n'ibiremerera abandi, mbere ngo bakanakoreranira iciza, bataravye uwo bagikorera. Kuko ngo ugukora iciza ni ngombwa,
n'ubwo hoba ku wo badasangiye ukwemera canke idini.
Musenyeri Anatole RUBERINYANGE yasozereye atumirira abarongoye abandi kwitwararika ico gisabisho. Ku bwiwe mbere ngo nticokwama kiba rimwe gusa mu mwaka, ahubwo coba icamizako, mbere n'abandi batari mw?ishirahamwe CNEB (Conseil National des Eglises du Burundi) bakiyumva ko kibaraba, kuko kibasaba ubumwe, kirabatumira kandi no guhinduka.
Igisabisho c'ugusabira ubumwe bw'abemera Kristu catanguye mu mwaka w'1968. Aho catangura, abarongoye amashengero baja hamwe mu gisabisho giteguwe n'igihugu kimwe, bagafashanya n'abarongoye amashengero. Uyu mwaka, catunganijwe n'abari mw'izinga rya Malte. Mu mwaka uheze na ho cari catunganijwe n'abari mu gihugu ca Indonesia. No ngaha mu Burundi, indwi nk'iyo yahariwe ugusabira ubumwe bw'abemera Yezu Kristu yama yatunganijwe buri mwaka, kuva kw'igenekerezo rya 18 gushika ku rya 25 Nzero. Uyu mwaka, ku bemera Yezu Kristu baba i Bujumbura, ishengero ry'Abagenzi rikaba ari ryo ryari rishikiriwe ngo ritunganye ico gisabisho. Mu burongozi bwa CNEB hakaba hari icipfuzo ko igisabisho nk'ico cotunganywa no mu zindi ntara zitandukanye z'igihugu.