Ibisata >

Iterambere na Caritas >

Paruwase Ruziba, ku rwego rwa Diyoseze Nkuru ya Bujumbura, ni yo yahimbarijwemwo umusi mpuzamakungu wahariwe abarwaye

Abandi basaserdoti bafashanije ma Musenyeri Gerevazi Banshimiyubusa mu guhereza iyo misa ni Patiri Félix Fupi, Arongoye intara y'ubutumwa ya Mikayeli Mweranda, na Patiri Alphonse Ndabiseruye, umunyamabanga nshingwabikorwa w'ishirahamwe ngororeramajambere rya Diyoseze (ODDBU CARITAS Bujumbura), be na Patiri Emmanuel Hatungimana afashanya na Patiri Alphonse, hamwe n'abasaserdoti bo muri iyo Paruwase ya Ruziba nyene yaherejwemwo ico gisabisho.

Kubera ko ijambo nyamukuru ry'uwo musi ryari iryo Nyenubweranda Papa Francisko yari yashikirije abakristu ku musi mpuzamakungu ugira uwa 28 wahariwe ukwibuka n'ugusabira abarwaye, iryo jambo nyene ni ryo ryaciye rishikirizwa igihugu c'Imana cari aho, rikaba ryasomwe n'uwo munyamabanga nshingwabikorwa w'ishirahamwe ngororeramajambere rya Diyoseze (ODDBU CARITAS Bujumbura), Patiri Alphonse Ndabiseruye. 

 

Na we Musenyeri Gerevazi, mw'ijambo yashikirije, yamenyesheje abari aho ko mu kwemera kwabo bafise ivya nkenerwa vyose boshobora kwikorako ngo berekane umutima w'ukwitwararikana, ivyo na vyo ngo bikaba ari amashikanwa bahereza Imana mu rwego rw'ukwiyumvira abakene, abababaye n'abakeneye gufashwa, be rero n'ukubasabira, haba mu nkuka za misa no mu bisabisho vya misi yose. Ico basabwa gusa ngo kikaba ari ukubigirana ukwemera. 

Inyuma y'inkuka y'imisa ni ho haca hakurikira igice c'ukuja gusuhuza abarwaye na co. N'aha nyene, Umwepiskopi ni we yagiye imbere y'abandi kuja kuraba abarwaye, ari kumwe n'abo basaserdoti basangiye guhereza inkuka y'imisa y'ukubasabira, be n'abakora mu gisata c'ukubungabunga amagara y'abantu gikukira Diyoseze Nkuru ya Bujumbura. Abari barwariye mu bitaro vyo mu Ruziba rero, mu kubasuhuza, bakaba barabashiriye igisabisho n'agafashanyo. 

Patiri Félix Fupi, avuga ku catumye muri Diyoseze yose bahitamwo Paruwase Ruziba ngo ibe ari yo bahimbarizamwo uwo musi, yamenyesheje ko ari ukubera ikiri nshasha, Umwepiskopi akaba yashatse kuyitera intege, na rirya irimwo abarwaye batari bake, eka mbere n'abageze mu zabukuru. «Kwari ukugira kandi ngo umuntu yibuke abantu bari ku mpera z'igisagara, ngo na bo bumve ko Ekleziya iri kumwe na bo», ni ko yabandanije ashimangira iryo torwa ry'iyo Paruwase mu zindi. 

Eka na Patiri Pierre Claver Gacumu, nka Patiri mukuru w'iyo Paruwase yatewe iteka ry'ukwakira ivyo bikorwa vyahariwe uwo musi w'ukwibuka n'ugusabira abarwaye, yaragize ico abivugako, ko vyamuhimbaye cane. Yaboneyeho gushimira abatunganije ivyo bikorwa, be n'abakristu b'iyo Paruwase, kuko nk'uko yabimenyesheje, ngo abitavye inkuka y'imisa babaye benshi, ikimenyetso c'uko uwo musi wari ufise ico ubabwiye, ko ubakaburira gukomeza umwitwarariko baba basanzwe bafitiye bagenzi babo bakitswe n'amagara. Aba bakristu nyene, mu nkuka y'imisa, bakaba bari batanze amashikanwa menshi agizwe n'ibifungurwa bibisi n'ibitungwa, azofasha abarwaye bo muri Paruwase Ruziba. 

Ku ruhande rw'ishirahamwe ngororeramajambere rya Diyoseze (ODDBU CARITAS Bujumbura), Patiri Alphonse Ndabiseruye, wewe mw'ijambo ryiwe, yasavye abarwaye bose kwihangana, bakakirana umwizero mwinshi ububabare barimwo, n'aho imigambi yose baba bari bafise ica ihagarara, ntibaronke ingoga zo kuyibandanya. Yaboneyeho kubasaba kwakira ijambo rya Nyenubweranda Papa Fransisko yari yarungikiye Ekleziya, ijambo ngo ririmwo agace kaberekeye, agace kisunga ivyanditswe vyeranga, kagira kati: «Nimuze mwebwe mwese murushe kandi muremerewe, ndabaruhurire» (Mat.11,28-30). Na bo abakomeye akaba yabasavye kwitwararika abarwaye. 

Mwomenya ko uwo musi mpuzamakungu wahariwe ukwibuka n'ugusabira abarwaye, mu kuwutunganya, Diyoseze Nkuru ya Bujumbura yari yifatanije n'ishirahamwe ngororeramajambere (ODDBU CARITAS), ku rwego rwa Diyoseze, ishirahamwe rifise ibisata bitanu, ari vyo igisata kiraba ba ntahonikora, ikiraba ukubungabunga amagara y'abantu, ic'uburimyi n'ubworozi, ikijejwe inyubakwa z'iterambere rusangi z'Ekleziya, be n'ic'ukujijura abanegihugu ngo batere imbere. Ic'ukubungabunga amagara y'abantu rero kikaba ari co cari catunganije ico gikorwa. 

Odrade Kaze, CEDICOM       

Mu mumugwi umwe

Aleluya. Kristu yategerezwa kubabara no kuzuka mu bapfuye, kugira ngo yinjire mu buninahazwa. Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Yohani (6, 44-51)

Muri irya misi, Yezu yabariye Abayuda ati: «Nta wushobora kunyegera Data yantumye atamukwegakweze; nanje nzomuzura ku musi w’imperuka. Mu bahanuzi handitswe ngo: ‘Bose bazokwigishwa n’Imana.’ Uwumvise Data wese akakira inyigisho ziwe, ni we aza iwanje. Ni ko, nta n’umwe yabonye Data atari umwe yavuye hafi y’Imana; uyo ni we yabonye Data. Ni ukuri ni ukuri ndabibabwiye: uwemera arafise ubuzima budahera. Jewe ndi wa mukate w’ubuzima. Basokuru banyu barariye mana mu gahinga, bahava barapfa. Uyu ni wo mukate umanuka uva mw’ijuru, maze uwuwuriye ntazopfa. Jewe ndi wa mukate muzima wamanutse uva mw’ijuru uwuriye uwo mukate azokwamaho imyaka yose. Vyongeye umukate nzotanga ni umubiri wanje uzanira isi ubuzima.»