Ibisata >

Ibiro Nshingwabutumwa >

Inyigisho y'Ikarema ishikirijwe n'ibiro nshingwabutumwa vya Diyoseze yacu, mu mwaka w'2020 - Intangamarara

Igihe c'Ikarema, nk'uko tubizi, ni igihe c'imisi 40 itegura Pasika; ni igihe gifasha umukristu wese kwinagura ku mutima, guhinduka, maze akarushirizaho kwuzura n'Imana, gutyo akazohimbaza Pasika, ya ntsinzi ya Kristu, na we yatsinze koko intambamyi zose z'umutima n'umubiri zimubuza gushusha na Yezu Kristu.

Muri iyi minsi y'i karema, Ekleziya Umuryango w'abana b'Imana, iradutegurira indinganizo twoshira imbere muri ukwo kwinagura, ibikuru bikuru bikaba ari ibi: kwisonzesha, gusenga, n'ibikorwa vy'ikigongwe (vy'umutima n'umubiri)1, tutibagiye kuja mu mwiherero gukurikirana inyigisho zitegurwa ku mwaka ku mwaka, kuronka isakamentu ry'ikigongwe vyiteguriwe neza, n'ibindi bifasha zina mukristu wese gutera imbere mu bweranda.

Ariko muri vyose, ntitwibagire gushingira kw'ijambo ry'Imana dutumiriwe kwumviriza no kuzirikana tubishizemwo umwete mwinshi ujanye n'ibihe turimwo, nk'uko Nyenubweranda Papa Fransisko aheruka kubitwigisha igihe yashinga umunsi w'Imana wahariwe Ijambo ry'Imana. Ijambo ry'Imana rero rirahambaye (raba Nehemiya 8,1-10; Mat 6,1-18; Yoweli 2,12-13; Iz.1,16).

None rero, muri ino Karema turahamagariwe gusubira guca bugufi, tukishira mu minwe y'Imana uko bukeye uko bwije. Dusome ijambo ry'Imana, ariko kandi umwe wese agerageze ngo ahe ikibanza Mutima Mweranda abe ari We amumurikira, kugira ngo ntihagire uwunanirwa muri iyi misi y'Ikarema, mbere azoshobore kubandanirizako n'inyuma ya Pasika.

Muri uno mwaka turimwo kandi, ni umwaka dutanguye turangije imyaka 60 Diyoseze
ya Bujumbura inshinzwe na Nyenubweranda Papa Yohani XXIII, hari kw'igenekerezo rya 10 Munyonyo mu mwaka wa 1959. None rero, iyi karema ni akaryo keza ko kwibukanya ibikorwa twoshira imbere ngo turushirizeho kwubaka Diyoseze Nkuru, Muryango wa yacu.

Iyi karema kandi ni idufashe kwisuzuma, ngo tubone aho tugeze, mu butumwa zina
mukristu wese afise bwo guharanira amahoro no kuyaremesha, dufatiye muri uno mwaka turimwo wa 2020, uzobamwo amatora mu Burundi. Gutyo tuzitire tutaronerwa amaraso ntaze aseseke nko mu myaka yaheze.

Igiti cose kirangwa n'ivvamwa vyaco. Uwumurikiwe na Mutima na we nyene arangwa
n'ibiva kuri Mutima Mweranda vyiserura mu buzima bwiwe. Paulo Mweranda ati: "Ibiva kuri Mutima na vyo ni: Urukundo, akanyamuneza, amahoro, ukwiyumanganya, ubukundanyi, ubuntu, ukwemera, ukugenza buhoro, n'ukwigumya (Ga.5,22-25). Ivyo ni ivyamwa dusanga mu muntu wese yakiriye Mutima Mweranda, akamwemerera ko amugenza n'ukumukurikira mu vyo akora vyose.

Nawe rero ugururira ubuzima bwawe Mutima Mweranda, umwakire, umusabe akwuzure, akwiganzire. Uzoca uronka ubwo bubasha bwiwe, uzoca ukora ibikorwa nk'ivya Yezu, uzoca wama ivyamwa vya Mutima Mweranda.

Bandanya musoma na vya bindi bice bigize iyi nyigisho, ari vyo: Ukumurikirwa na Mutima-Mweranda; Ukwubaka Diyoseze Nkuru Muryango wacu, be n'Ukuremesha amahoro.

___________

Mu mumugwi umwe

Aleluya. Kristu yarazutse; umuco wiwe waratuboneshereje, twebwe yacunguje atnaraso yiwe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 52-59)

Muri irya misi,

Abayuda baja mu gaharira, bavuga bati: «Uwo ashobora ate kuduha umubiri wiwe ngo tuwufungure?» Yezu arababwira rero ati: «Ni ukuri ni ukuri ndabibabwiye: mudafunguye umubiri w’Umwana w’umuntu, ntimunywe n’amaraso yiwe, nta buzima muzogira. Uwufungura umubiri wanje akanywa n’amaraso yanje, arafise ubuzima budahera. Nanje rero nzomuzura ku musi w’imperuka. Na none umubiri wanje ni imfungurwa y’ukuri, amaraso yanje na yo ni inyobwa y’ukuri. Uwufungura umubiri wanje akanywa n’amaraso yanje, aba muri jewe, nanje nkaba muri we. Nk’uko Data Nyenubuzima yantumye ari we ambeshaho, ni ko n’uwumfunguye ndamuha ubuzima. Uyo rero ni wo mukate wamanutse uva mw’ijuru. Ntumeze nk’umwe basokuru banyu bafunguye, hanyuma bagapfa. Uwuzofungura uyo mukate azoramba mu myaka yose.»

Ivyo Yezu yabivuze yigishiriza mw’isinagoga i Kafaranawumi.