Ibisata >

Ibiro Nshingwabutumwa >

Igice ca mbere c'inyigisho y'Ikarema ishikirijwe n'ibiro nshingwabutumwa vya Diyoseze yacu, mu mwaka w'2020 - Ukumurikirwa na Mutima-Mweranda

Umutima umuntu afise, canke umutima umugenza, ni wo utuma umuntu avuga canke akora ivyiza canke ibibi, akora ivyiza canke agakora ibibi, agira imigenzo myiza canke mibi. Kugira ngo umuntu ase canke avuge nka Yo, Imana yashimye kumuha umutima wayo ari Wo Mutima Mweranda, kugira ngo abe ari We amumurikira, abe ari We amugenza mu buzima bwiwe no mu bikorwa vyiwe vyose. Ni vyo twahishuriwe mu bitabu vyeranda (Raba Amamuko 2,7; Ezekiyeli 36,27; Luka 3,21-22; Abanyaroma 8,14-15).

None uwumurikiwe na Mutima Mweranda amera ate? Akora ate? Ashika kuki? Mu majambo make, araronka ububasha. Hari ibikorwa bimuranga, hakaba n'ivyamwa bigaragara yerekana (raba Luka 4,14-19).

Ububasha ni co kintu ca mbere kiranga umuntu amurikiwe na Mutima Mweranda. Nkako, Mutima w'Imana ni We bubasha bwa Rudasumbwa (Luk.1,35). Ubwo bubasha na bwo si bumwe buserurwa n'inguvu z'umubiri canke imirya, ahubwo ni ubukomezi bw'Umutima (Ibik.1,8), butuma umuntu aba intwari, umutinyutsi n'intatirigana mu gushingira intahe ukuri no mu kurwanira ineza. Ni co Yezu ashaka kudushikanako mu kuduha Mutima wiwe Mweranda, mw'ibatisimu no mw'isakramentu ry'ugukomezwa, twita (Konfirimansiyo).

Twararonse rero za ngabirano indwi za Mutima, kurya na Yezu Kristu yazironse, akaba ari We duhamagariwe kwigana muri vyose: Ubwitonzi, ubwenge, ubumenyi, ubukomezi, ubuhanuzi, ukwubaha Imana, ugusenga. Nk'uko abahanuzi bamubuye, «Umutima w'Umukama uzoguma kuri We, Umutima w'ubwitonzi n'uw'ubwenge, Umutima wo guhanura n'uw'ubutwari, umutima w'ubumenyi n'uwo kwubaha Imana» (Luk.4,18-19).

Uwo wese akundiye Mutima Mweranda akamumurikira mu vyo avuga, mu vyo akora, mu nyifato no mu migambi afata, yama yuzuye ububasha bw'uwo Mutima, kandi uko
amugamburukira, ni ko ubwo bubasha bwiwe bwongerekana mu buzima bwiwe.

Ububasha buca bujana n'ibikorwa bivamwo ivyamwa vyinshi kandi vyiza. None ibikorwa tubona vyoba ibihe? Ni vyinshi, ariko hari ivyo twoshira imbere. Ukwubaka Ekleziya Umuryango wacu wa Diyoseze Nkuru ya Bujumbura, be n'ukuremesha amahoro.

Inyigisho kuri ibi bikorwa duca tuyibandanyirizako mu nkuru zikurikira. Bandanya musoma na vya bindi bice bigize iyi nyigisho, ari vyo: Inyinjizo canke intangamarara ku nyigisho y'Ikarema ishikirijwe n'ibiro nshingwabutumwa vya Diyoseze, mu mwaka w'2020, Ukwubaka Diyoseze Nkuru Muryango wacu, be n'Ukuremesha amahoro.

Bigiriwe i Bujumbura, igenekerezo rya 17/02/2020
Musenyeri Anatole Ruberinyange, Umuyobozi w'ibiro Nshingwabutumwa

Abasaserdoti bafashije mari iyi nyigisho: 
-Patiri Amand Kana;
-Patiri Maurice Simon Pierre Ciza; 
-Patiri Dieudonné Niyibizi

Mu mumugwi umwe

Aleluya. Kristu yarazutse; umuco wiwe waratuboneshereje, twebwe yacunguje atnaraso yiwe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 52-59)

Muri irya misi,

Abayuda baja mu gaharira, bavuga bati: «Uwo ashobora ate kuduha umubiri wiwe ngo tuwufungure?» Yezu arababwira rero ati: «Ni ukuri ni ukuri ndabibabwiye: mudafunguye umubiri w’Umwana w’umuntu, ntimunywe n’amaraso yiwe, nta buzima muzogira. Uwufungura umubiri wanje akanywa n’amaraso yanje, arafise ubuzima budahera. Nanje rero nzomuzura ku musi w’imperuka. Na none umubiri wanje ni imfungurwa y’ukuri, amaraso yanje na yo ni inyobwa y’ukuri. Uwufungura umubiri wanje akanywa n’amaraso yanje, aba muri jewe, nanje nkaba muri we. Nk’uko Data Nyenubuzima yantumye ari we ambeshaho, ni ko n’uwumfunguye ndamuha ubuzima. Uyo rero ni wo mukate wamanutse uva mw’ijuru. Ntumeze nk’umwe basokuru banyu bafunguye, hanyuma bagapfa. Uwuzofungura uyo mukate azoramba mu myaka yose.»

Ivyo Yezu yabivuze yigishiriza mw’isinagoga i Kafaranawumi.