Ibisata >

Ibiro Nshingwabutumwa >

Igikorwa ca mbere c'igice ca kabiri c'inyigisho y'Ikarema ishikirijwe n'ibiro nshingwabutumwa vya Diyoseze yacu, mu mwaka w'2020 - Twubake Diyoseze yacu

Ni vyiza ko dutegera neza ko Diyoseze Nkuru ari umuryango wacu, kurya umwe wese yiyumvamwo umuryango yavukiyemwo, akawitangira, na wo ukamwitangira - iyo atari ikigaba. Yezu We nyene, ibikorwa avuga akora amurikiwe na Mutima Mweranda arabidutumirira (Iz.11,2).

Noneho, igikorwa dutumiriwe ni ukwigenza nka Kristu; ni ugukunda nka Kristu; ni ukubabazwa n'inabi n'igicumuro, tukihatira kukirwanya nka Kristu; ni ukwitonda nka Kristu; ni ukwumva n'ukurangura amajambo y'Imana = ni ko kwubakira ku rutare (raba Mat.7,24-27), kuko ubucuti nyabwo dufitaniye na Kristu ni ukwumva amajambo yiwe, tukayashira mu ngiro (raba Mariko 3, 31-35): "... Umuntu wese akora ugushaka kw'Imana, urya ni we mwene wacu, ni we mushikanje, kandi ni we mawe"). Kuba umukristu w'ingwizamurongo, wo kw'izina gusa, ni ugupfisha ubusa ingabirano twaronse mw'ibatisimu.

Hari inkingi zitanu nyamukuru zubaka umuryango twoshingirako mu kwubaka Diyoseze Nkuru Muryango wacu, kuva ku ziko, imibano mito mito, ibisata, paruwase, Diyoseze na Ekleziya yose. Tuzishingireko natwe:

- Umuryango w'Ekleziya (la famille ecclésiale);

- Imigenderanire myiza y'urukundo (les relations interpersonnelles d'amour);

- Urukundo rwitanga mu gushigikirana n'ugutabarana (la Charité, la Diaconie);

- Gutegera neza ivyo twemera (l'Intelligence de la foi);

- Amasabamana (la Célébration).

Umuryango w'Ekleziya ni wo utuvyara mu kwemera, ukatureresha n'inyigisho ikomeza ukwo kwemera, ukatugaburira vya vyiza vyose bibungabunga ukwo kwemera, tukagira koko ishusho y'abana b'Imana babushitse ngo dushikire ubweranda. Iyo Ekleziya rero n'aho yagutse, ikwiye kw'isi nzima, ishingira imizi cane cane harya imuhira, mu mibano yacu, mu bisata vyacu, mari paruwase yacu, muri Diyoseze yacu.

Uguhurumbira ijambo ry'Imana, inyigisho nkomezakwemera, hamwe n'inyigisho z'abarongoye Ekleziya ku nzego zitandukanye; uguhurumbira amasakramentu hamwe n'ukwitwararika amasabamana; Ugushira imbere ibisabisho, tukaba tuzi ko ibisabisho biri kwinshi, bikaba bitwungira ubumwe n'Imana, bigahuza abari kw'isi yose n'abadutanze mu bwami bw'ijuru basezeye isi. N.B: Gushimira abigisha abandi Ijambo ry'Imana mu mashure, mu gutegura abaronka amasakramentu, abafasha mu kuririmbira Imana, mu kugira uruhara mu mihari n'imigwi, no mu kwitaba ubutumwa bwa paruwase abakristu batumirwa.

Ubumwe n'ubucuti dufitaniye mu muryango buva ku Mana nyene, bugasasagara hagati yacu. Umwe wese rero amenye ko afise ico apfana n'uwundi. Twaravukanye, kandi nta gishobora guhanagura ubwo bumwe n'ubwo bucuti. Ni nka kurya Mana Butatu Bweranda ari Umuryango w'Urukundo rudacika.

Ubwo bucuti dufitaniye muri Ekleziya nta n'umwe bukumira, kandi ntibugira imbibe. None bubonekera he? Dukore iki? Tuwukomeze mu nzu tubamwo, mu rugo (urupangu), mu mubano muto rukristu, ku mutumba (quartier), igisata, paruwase. Aha amadini, amoko, intara ntibiba ikibazo.

- Mu ngiro n'ingendo y'ubumwe n'urukundo, mu vyo akora vyose, aho aba ari hose, haba imuhira, ku kazi, muri politique, mu vy'intwaro, mu mugambwe, mu mashirahamwe arimwo, mu mahanga iyo atemberera (Kol 3,17; 1Kor 10,31). Nta wucana itara rero ngo aryubikeko umubehe; arishira nyabuna ahabona ngo riboneshereze bose, nk'uko ata wuhisha igisagara cubatswe mw'itaba ry'umusozi (raba Mat.5,14-15).

- Umukama atubwira ati: "Nimukundane nk'uko nabankunze" (Yoh.15,12). Akarorero Yezu yaduhaye, ni wa Munyasamariya w'ikigongwe (Luk.10,30-37): "Genda nawe ugire gutyo" (vv 28 et 37). Ntawushobora kuvuga ngo "Ndazi kandi ndakunda Imana" atazi kwigorera abandi. Igihe tuzoseruka imbere y'intahe y'Umukama, ikizotuvugira ni ibikorwa vyiza vy'ugufashanya n'ugutabarana tuzoba twararanguye (4). Ijambo ry'Imana n'inyigisho y'Ekleziya bidutumirira: kurwanira imfuvyi n'abapfakazi (Ibik.6,2-4), kubanguranya abatase, kwumvikanisha abatanye bagasubiza hamwe, kuja hagati y'abashamiranye, kwitwararika abakene, n'ibindi. 

- Ubutumwa bwa Caritas: ni igikorwa cega umuyyango wose, abakristu bose. Ubutumwa bwa Caritas buraheza bukajana n'ibindi bikorwa vy'iterambere.

- Gukura amaboko mu mpuzu, hagakomezwa ibikorwa vy'iterambere muri Paruwase n'ahandi. Gushima aho bagejeje mu kwitanga bateza imbere paruwase. Aho bikigorana ni hehe? Habuze iki?

- Kwibukanya, gutegera, kunagura ubumenyi bwacu mu vyerekeye ukwemera kwacu, kandi tukamenya kukuvuga, tukagushingira intahe. Abakristu twese, harageze ko tuvugira tukongera tugakorera Kristu tudatinya. Diyoseze yacu iramaze imyaka 60. Tube abakritsu bazi ico bemera kandi bashobora kuvugira ukwo kwemera, bakamenya iryo bishura uwo wese ababaza ku vyerekeye umwizero ubabamwo (5). Tube abakristu bazi ingingo z'ivyo bemera... ; bazi inyigisho n'indinganizo y'umuryango w'Ekleziya; tube abakristu bakunda gusoma n'ukwigishwa Ivyanditswe Vyeranda n'insobanuro y'Amasakramentu. 

Iyi nyigisho nyigisho y'Ikarema ishikirijwe n'ibiro nshingwabutumwa vya Diyoseze Nkuru ya Bujumbura, mu mwaka w'2020, tuyibandanyirizako mu zindi nkuru. Bandanya musoma na vya bindi bice bigize iyi nyigisho, ari vyo: Inyinjizo canke intangamarara ku nyigisho y'Ikarema ishikirijwe n'ibiro nshingwabutumwa vya Diyoseze, mu mwaka w'2020, Ukumurikirwa na Mutima-Mweranda, be n'Ukuremesha amahoro.
5 (Raba 1 P3,15); « ... ntituzobe tukiri abana bazungagizwa kandi bahitanwa n'igihuhusi cose c'inyigisho ihagaze ku bubeshi bw'abantu, ku buhinga bwabo bw'ugutwara abandi mu kinyoma. Ariko tugumane ukuri mu rukundo, tuzokura tugana mu buryo bwose uwuri Umutwe, ari We Kristu" (Ep.4,13-15) .

Mu mumugwi umwe

Aleluya. Kristu yategerezwa kubabara no kuzuka mu bapfuye, kugira ngo yinjire mu buninahazwa. Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Yohani (6, 44-51)

Muri irya misi, Yezu yabariye Abayuda ati: «Nta wushobora kunyegera Data yantumye atamukwegakweze; nanje nzomuzura ku musi w’imperuka. Mu bahanuzi handitswe ngo: ‘Bose bazokwigishwa n’Imana.’ Uwumvise Data wese akakira inyigisho ziwe, ni we aza iwanje. Ni ko, nta n’umwe yabonye Data atari umwe yavuye hafi y’Imana; uyo ni we yabonye Data. Ni ukuri ni ukuri ndabibabwiye: uwemera arafise ubuzima budahera. Jewe ndi wa mukate w’ubuzima. Basokuru banyu barariye mana mu gahinga, bahava barapfa. Uyu ni wo mukate umanuka uva mw’ijuru, maze uwuwuriye ntazopfa. Jewe ndi wa mukate muzima wamanutse uva mw’ijuru uwuriye uwo mukate azokwamaho imyaka yose. Vyongeye umukate nzotanga ni umubiri wanje uzanira isi ubuzima.»