«Iki kibanza twaje tugana aha mu Burundi iwacu, gifise insiguro idasanzwe, kuko mu kuhagira urugendo ari nk'ukugaruka kw'isoko, umukristu w'Umurundi agasubira no muri kahise, akaraba iyo yaje ava, n'iyo Umukama yamukuye» (Patiri Félix Fupi)

Urugendo rweranda rwaragizwe ku magenekerezo ya 21 na 22 Ntwarante 2020, aho abakristu bo muri Paruwase Katedrale Regina Mundi, urwo rugendo rwabashikanye ku kibanza ceranda c'i Buruhukiro, muri Paruwase yitiriwe Umushaha mweranda wa Yezu y'i Muyaga. Urwo rugendo rukaba rwatanguriye kw'isengero ya Paruwase Muyaga, ari na yo paruwase yatanguriye izindi zose mu Burundi, muri Rusama 1898. Patiri mukuru w'iyo paruwase, Patiri Aloys Cambara, akaba ari we yaberetse ibintu vy'agaciro ntagereranywa biri muri ico kibanza.

Abakristu bo muri Paruwase Katedrale Regina Mundi, bashitse muri Paruwase y'i Muyaga, Patiri Aloys Cambara yabanje kubaha ikaze, araheza arabatembereza, abereka ibibanza bitandukanye bigize aho hantu. Yaranaberetse ibimenyetso bitandukanye bishingiye ku kwemera kw'abakristu bo muri iyo Paruwase n'abahagendera, araheza abamenyesha ko vyinshi muri vyo ari ivyazanywe n'abamisiyonari. Aha twovuga nk'Umusalaba wa mbere washinzwe mu Burundi, bita «Umusaraba w'i Misugi». Hariho kandi n'umusaraba urimwo akamanyu k'ibisigi vy'Umusalaba w'i Gorogota, ari wo umusaserdoti agenda atwaye mu nzira y'Umusalaba, ku wa Gatanu mweranda.

Barashitse kandi no ku kirimba c'i Buruhukiro, ikirimba cemejwe kw'itariki ya 5 Ruheshi 2016 ko citiriwe Umushaha Mweranda wa Yezu, kandi ko ingendo nyeranda kuri ico kirimba zitanguye, ariko ko Isengero yaho itarahezagirwa, kuko ibikorwa vy'urwubako bitararangira. Aho bakaba bakiriwe na Patiri Aloys Cambara. Ariko arabatembereza, yarabamenyesheje ko ico kibanza kidasanzwe, kuko kirimwo Altari ya mbere yubatswe mu Burundi, ari na ho umukristu wa mbere w'Umurundi yabatirijwe, aho hari kw'itariki ya 14 Ndamukiza 1899. Yagize ati: «Ni co gituma uwuje muri ico kibanza asaba ingabirano y'ukuzigama indagano z'ibatisimu, agasaba n'iy'ubumisiyonari».

Muri ico kirimba harimwo n'isanamu y'Umushaha Mweranda wa Yezu yashinzwe aho basanze Patiri Lipoli, umusaseredoti wa mbere yarongoye iyo paruwase imyaka mirongo ine, ariko arikubita ngo yishure ibicumuro vyiwe n'ivy'igihugu ajejwe. Harimwo kandi n'iy'Umushaha wa Bikira Mariya, umusalaba wa kabiri washinzwe mu Burundi, Isenga rya Eliya, n'imeza ya Eliya, ibuye ryishushanijemwo ikarata y'Uburundi, n'ibindi.

Ivyiyumviro

Rondera

Urutonde rw'Imisa

Mwoba mufise ico mubaza?

Tanga