Abari bitavye ico kiganiro ni Guy-Michel Ndayikeje, aserukira Ihuriro ry'Umuryango mpuzamakaminuza w'abanyeshure b'aba katolika (FCIU), be n'icegera ciwe. Hari kandi n'abaserukiye uwo muryango ku mashure ya Kaminuza atandukanye akorera i Bujumbura, nk'iyitiriwe Ubwitonzi (Sagesse d'Afrique), Campus Kamenge, na Kaminuza yitiriwe Umuco (Lumière) y'i Bujumbura.
Ico kiganiro cari catewe iteka n'icariho c'Umwepiskopi wa Diyoseze Nkuru ya Bujumbura, Musenyeri Anatole Ruberinyange, ari na we yuguruye icese ibikorwa, yongera aratanga n'inyigisho y'umusi wa mbere. Hari kandi n'umusaserdoti w'umwibutsamana mu mashure ya kaminuza no mu gisata ca Diyoseze kijejwe ubutumwa bw'abakristu b'abalayike, Patiri Jérémie Bukene.
Umusi wa mbere waranzwe n'ijambo ry'ukwugurura ibikorwa, be n'intangamarara ku nyigisho y'indwi yose. Icivugo ngenderwako kizorongora inyigisho z'iyo ndwi cashikirijwe na Guy-Michel Ndayikeje, kikaba cagira kiti: «Nimukundane nk'abavandimwe mu cubahiro, mwirinde urwangara, kandi mubane mu mahoro na bose mu gutsindisha inabi iciza» (Rom.12,9-21).
Na we umusaserdoti w'Umwibutsamana mu ma Kaminuza no mu butumwa bw'abakristu b'abalayike, Patiri Jérémie Bukene, abanje kumenyesha kahise k'Ekleziya mu buzima bw'amashure ya kaminuza kw'isi yose, be n'uko umuntu atagizwe n'umutima urondera ubwenge gusa, ahubwo n'uwurondera Imana, yaripfurije indwi nziza abo banyeshure, abipfuriza ko yobashika ku mutima.
Uwo musaserdoti yaranavuze kandi n'ico yiteze ko ibikorwa vyo muri iyo ndwi yahariwe umunyeshure wo muri Kaminuza bizofasha: Ukubana nk'abavandimwe; ugusonera umuntu wese, bazirikana ko ico cubahiro kiva ku Mana yo yamuremye; ukuraba ko ata kintu na kimwe cotuma umuntu asuzugurwa; be n'ukuguma hubahirijwe iteka ry'umuntu mu makuru abantu bahana. Ngo ariteze kandi ko umunyeshure w'umu katolika azoheza iyi ndwi ashobora kumenya umuhamagaro wiwe nk'umuntu akuze; mbere ko atoba no mu bagirira urwangara ivyo Imana yaremye ngo bifashe umuntu.
Musenyeri Anatole Ruberinyange na we rero, nk'uwari afise ubutumwa bw'ukwugurura ibikorwa vy'iyo ndwi, yabanje gushikiriza ibizoba bigize inyigisho z'indwi yose, maze araheza aratangaza ko yuguruye icese ivyo bikorwa. Mu nyigisho yatanze kuri ico ciyumviro ngenderwako c'iyo ndwi, Musenyeri yavuze ko hariho ibintu 31 ntabanduka umukristu atumiriwe gushira mu ngiro ngo yerekane urukundo, kuko ngo urukundo rurangukira mu bikorwa.
Mu gusaba gushira mu ngiro icivugo c'uyu mwaka, uwo yatanze iyo nyigisho yaratumiriye abanyeshure bo muri Kaminuza kugaruka kw'ijambo ry'Imana mu kwama na ntaryo barisoma muri Bibiliya, bongera basenga mu kuri no muri Mutima, kandi bagakura mu rukundo. Aha yarasiguye inyifato zishika 13 zerekana urukundo. «Ako kigoro mwahora mugira mugiye gukurukirana inyigisho, nimukagire no mu gukurikirana izi nyigisho biciye kw'isamirizi», ako ni ko kamo yasozereye ijambo ryiwe.
Ahejeje inyigisho, haratanzwe inumero z'ukurungikako ubutumwa bwanditswe. Ako karyo kahawe bose, baba abatumire bari muri studio, baba abariko barakurikirana ico kiganiro kw'isamirizi n'abariko bagikurikirana ku mbuga ngurukanabumenyi. Benshi mu batanze ibibazo vyabo bagaruka ku kuntu umunyeshure wo muri kaminuza yokwitwara mu bibazo vya politike, mu gihe abanyepolitike kenshi aho bategera abahejeje amashure, ari uko aba baba babitezeko ubuzi busanzwe butanaboneka cane, maze bagasanga bakoreshejwe ibinyuranye n'ivyo ubukristu bubategereza.
Icariho c'Umwepiskopi yarishuye ku bibazo bagiye baramushikiriza. Yavuze ko umunyeshure w'umu Katolika abwirizwa kuzirikana ko yavutse ubwa kabiri, atakiri umupagani, rero ko yokwirinda inabi yose. Yakoresheje imvugo y'ikirundi igira iti: «Uwugowe ntaca agoka». Na ho ku kibazo c'uko umuntu yovyifatamwo mu gihe agaragaje urukundo, ariko na we ntibamukunde, Musenyeri yakoresheje ingereranyo y'aho Yezu yakunze bose, ariko bitabujije ko haboneka abamwanka, harimwo mbere n'umwe mu bigishwa biwe. Araheza rero asaba ko igikuru ari ugutera intambwe ya mbere, abo bandi na bo ivyabo bigasigara bibaraba.
Mwomenya ko iyo nyigisho y'indwi yose itunganijwe uku gukurikira: Ku wa Mungu yari intangamarara. Ku wa mbere, umutwe w'inyigisho ugira uti: «Ni kuki uri kw'isi? Waremewe iki?»; ku wa kabiri, inyigisho ni «Inyifato y'umukristu mu gihe c'amatora»; ku wa gatatu na ho ni «Uguhanahana amakuru asonera umuntu, akanatsimbataza amahoro»; na ho ku wa kane ni «Agaciro k'ugushinga intahe muri Kaminuza»; ku wa gatanu ni «Umuntu ni iki ngo umwitwararike? Wamuteye iteka umuha icubahiro: Agateka k'umukenyezi mu rugo rukristu»; ku wa gatandatu ni «Urukundo rwa Kristu ruraturaza ishinga, ntitucigungana ubuzima bwacu», na ho mu gusozera, ku w'Imana, ni «Imana iri mw'ijuru, isi yayihaye abantu».
Mw'ihuriro ry'Umuryango mpuzamakaminuza w'abanyeshure b'aba Katolika (FCIU) barashimiye Imana Yo yerekanye ko yama ari ingavyi, kuko ngo yabagabiye akaryo kadasanzwe k'uguhura mu bundi buryo, n'ubwo hariho intambamyi y'ikiza c'indwara ya Coronavirus, ariko Umukama akaba yarerekanye ko ababungabunga. Iyo ndwi ngo yama ibazanira vyinshi, haba mu vyo babayemwo, mu kubarinda mu bihe vy'amatora, be no mu kubamara inyota y'ukwemera baba bafise. Bakaba basaba bagenzi babo gukurikirana inyigisho ku bwinshi, no kuzisabikaniriza abandi.