Mu maparuwase amwe haratanzwe isakramentu ry'ugukomezwa muri Mutimw-Mweranda, mu yandi na ho haba ukwigina yubile y'imyaka 25 umuryango w'abanaguwe muri Mutima-Mweranda umaze ubayeho mu Burundi
Umusi mukuru wa Pentekoti wabaye kw'igenekerezo rya 31 Rusama 2020 warahimbajwe mu maparuwase yose agize Ubwibutsamana bw'igipolisi c'Uburundi. Muri iyi nkuru, turababwira uko uwo musi mukuru wahimbajwe muri Paruwase yitiriwe umweranda Papa Yohani Paul II (St J.Paul II) iri muri Karitiye 9 yo mu Ngagara, be no muri Paruwase yitiriwe Umugabekazi w'Amahoro (RĂ©gina Pacis) yo muri Socarti.Mu bwibutsamana bw'igipolisi c'Uburundi, ihimbazwa ry'umusi mukuru wa Pentekote ryaranzwe n'ibirori bitandukanye. Mu maparuwase amwe haratanzwe isakramentu ry'ugukomezwa muri Mutimw-Mweranda, mu gihe ahandi habaye ukwigina yubile y'imyaka 25 umuryango w'abanaguwe muri Mutima-Mweranda (Renouveau Charismatique Catholique) umaze ubayeho mu burundi, ubona ko muri uwo muryango, uwo Mutima basanzwe baranamutoranyeko umuvunyi.
Muri Paruwase yitiriwe umweranda Papa Yohani Paul II (St J.Paul II) iri muri Karitiye 9 yo mu Ngagara, haratanzwe Isakramentu ry'ugukomezwa muri Mutima Mweranda ku bakristu bangana 198 bakukira iyo Paruwase. Iryo Sakramentu rikaba ryatanzwe n'Umwibutsamana mukuru w'igipolisi c'Uburundi, Patiri Jean Berchmans Ndayitwayeko (AumĂ´nier en Chef), ku ruhusha yahawe n'Umwepiskopi Mukuru wa Diyoseze Nkuru ya Bujumbura.
Mu nyigisho yatanze, iyo ntumwa y'Umwepiskopi Mukuru yarabwiye abakristu bari aho ko umusi mukuru wa Pentekote watanguye kera, kuko ngo mu ntango zawo wahora witwa umunsi w'Insago. Yaranabwiye abakristu bagira bakomezwe muri Mutima-Mweranda ko iryo Sakramentu bagira bahabwe ari ibanga ridasanzwe, kuko ngo bagira bae abashingantahe ba Kristu. Mu gihe na ho iryo banga, ngo aho baritekeye ari mu nzavya z'ibumba, yarabasavye kuzorigendera ubuzima bwabo bwose, gushika bashitse mw'Ijuru.
Na bo abakomejwe bakaba bari baje bava mu maparuwase atatu, ari yo A.P.I (Paruwase yitiriwe Umweranda Papa Yohani Paulo-II), 1er GMIR Camp Buyenzi (Paruwase yitiriwe Umweranda Martino), na Ex-ENAPO (Paruwase yitiriwe Umutima utatyoye wa Yezu, canke "Sacre Coeur de JĂ©sus").
Abo bakomejwe, bari kumwe n'Abakristu bose, bakaba barishikanye ku Muvyeyi Bikira Mariya. Ibirori vyasozerewe bashimira abapolisi babafashije kwitegurira iryo Sakramentu mu maparuwasi y'Ubwibutsamana bakukira.
Na ho muri Paruwase yitiriwe Umugabekazi w'Amahoro (RĂ©gina Pacis) yo muri Socarti, ibirori v'uguhimbaza umusi mukuru wa Pentekote vyaranzwe n'ihimbazwa rya yubile y'imyaka 25 umuryango w'Abanaguwe muri Mutima-Mweranda umaze utanguye ngaha mu Burundi, iyo sabukuru abo muri iyo Paruwase bakaba bayihimbaje ukwabo, nk'uko vyagenze no mu yandi maparuwase ya Diyoseze, aho bamaze gutangura ubutumwa. Muri iyo Paruwase yo muri Socarti, hoho bakaba baranahimbaje n'isabukuru yimyaka 10 uwo muryango umaze utanguye ubutumwa muri yo Paruwase.
Mw'ihimbazwa ry'uwo musi mukuru, aho Mutima-Mweranda asanzwe ari na We Muvunyi w'uwo muryango, karabaye n'akaryo k'ukwirimbura ku vyo babayemwo muri iyo myaka 10, bongera bigira n'inama ku vyo bagiye kurangura muri kazoza, bafashijwe n'uwo Mutima-Mweranda nyene. Emmanuele Nkurunzi yarakengurukiye umusaserdoti Pascal Barampiga, icegera c'Umwibutsamana mukuru mu bwibutsamana bw'igipolisi c'Uburundi, ku kuntu yama yita ku giti no ku mabuye ngo umuryango Katolika w'abanaguwe muri Mutima-Mweranda utere imbere. Eka n'abandi bakristu bari bitavye uwo musi mukuru muri iyo Paruwase yarabashimiye.
Tubamenyeshe ko imbere y'ugusozera inkuka y'imisa y'uwo musi mukuru, habaye umugirwa w'ukurungikwa icese mu butumwa abagiye kurangura ubutumwa bwo mu mivukano (Fratérnités) mu makaritiye iwabo. Ibirori bikaba vyasozerewe mu kwiginana mu kanyamuneza k'umuzo wa Mutima-Mweranda kuri abo makristu basengeye muri Sokarti.
BPP1 Syldie Ndayikengurukiye, mu bwibutsamana bw'Igipolisi c'Uburundi