Vikariya >

Mikaheli Mweranda >

Ugusozera umwaka w'ubutumwa w'2019 ushira 2020 ku bagize umugwi w'abihebeye Imana bakukira Paruwase Katedrale Regina Mundi

Abihebeye Imana bakukira Paruwase Katedrale Regina Mundi basanze bibereye ko bohurira mu gasengero kitiriwe Bikira Mariya Mugabekazi w'amahoro n'ikigongwe, kubatswe nk'icibutso c'ababikira batatu bo mu Muryango w'Abasaverianokazi bagandaguwe kw'igenekerezo rya 7 Nyakanga 2014 aribo mama Lucia Pulici, mama Olga Raschietti na mama Bernadette Boggian.

Ibikorwa vy'uyo musi vyaranzwe cane cane n'inyigisho zerekeye «Ubumaratiri n'ubuzima bwo kwihebera Imana». Patiri Modesto Todeschi wo mu Muryango w'Abasaveriano yatanze inyigisho, yabafashije kuzirikana ku Bumaratiri n'ubuzima bw'ukwihebera Imana. Yarabamenyesheje ko bose batazopfa urw'abamaratiri ariko ko bahamagariwe, kubw'indagano baraganiye Umukama, kubaho mu bumaratiri bwa misi yose.

Yashimikiye cane cane ko kugira umutima utekanye kandi ugabiye kurangura ishaka ry'Imana vyoba inkingi y'ubuzima bw'abihebeye Imana. Urukundo, ukwiyibagira bijanye n'ububabare vyoba umushinge uwihebey'Imana wese yubakira ko.
Uwo musi waranzwe kandi no guhabwa isakramentu ry'ikigongwe kubari barikeneye bose, imbere yo gusangira igisabisho c'inkuka ya misa. 

Ibikorwa vy'uwo musi vyabandanirije mu nyubakwa y'inama ya paruwasi. Uwuserukira uwo mugwi w'abihebey'Imana, mama Anna Chantal Nduwayezu afadikanije na mama Alphonsina, umunyabigega, barashikirije ivyaranguwe mu mwaka wose. Harabaye kandi umugirwa w'ugutangaza icese imibano yatowe nk'Abagenzi bo mw'ibanga (Amies inconnues).

Mu kurangiza, Patiri Modesto yaciye abatumirira kuduza ibiganza ngo baronke umuhezagiro. Bawuronse bose baririmba bati: «Ese Imana yoduhezagira».

Sr Marie Chantal Kabanyiginya, Paruwase Katedrale Regina Mundi 

Mu mumugwi umwe

Aleluya. Kristu yarazutse; umuco wiwe waratuboneshereje, twebwe yacunguje atnaraso yiwe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 52-59)

Muri irya misi,

Abayuda baja mu gaharira, bavuga bati: «Uwo ashobora ate kuduha umubiri wiwe ngo tuwufungure?» Yezu arababwira rero ati: «Ni ukuri ni ukuri ndabibabwiye: mudafunguye umubiri w’Umwana w’umuntu, ntimunywe n’amaraso yiwe, nta buzima muzogira. Uwufungura umubiri wanje akanywa n’amaraso yanje, arafise ubuzima budahera. Nanje rero nzomuzura ku musi w’imperuka. Na none umubiri wanje ni imfungurwa y’ukuri, amaraso yanje na yo ni inyobwa y’ukuri. Uwufungura umubiri wanje akanywa n’amaraso yanje, aba muri jewe, nanje nkaba muri we. Nk’uko Data Nyenubuzima yantumye ari we ambeshaho, ni ko n’uwumfunguye ndamuha ubuzima. Uyo rero ni wo mukate wamanutse uva mw’ijuru. Ntumeze nk’umwe basokuru banyu bafunguye, hanyuma bagapfa. Uwuzofungura uyo mukate azoramba mu myaka yose.»

Ivyo Yezu yabivuze yigishiriza mw’isinagoga i Kafaranawumi.