Uko umusi mukuru w'Isakaramentu Ryeranda ry'Ukaristiya wahimbajwe mu Bwibutsamana bw'Igipolisi c'Uburundi

Mu nyigisho uwo musaserdoti-mwibutsamana yashikirije, yagarutse ku bitangaro n'urukundo rwa Yezu Kristu yitanze wese atisigarije na gato. Uwo musaserdoti yabanje kwibutsa ukuntu ikibi caje kw'isi, aho yavuze ko vyose vyatanguye aho shetani yari imaze gukororerwa kwisi. Ngo abantu ni ho batanguye gukora ibicumuro.

Patiri Pascal Barampiga yavuze ko abantu bamaze gucumura, ngo bari baciriwe urubanza rw'umuriro udahera. Ariko ngo Yezu, atewe ikigongwe n'abo bantu baciriwe urwo rubanza, ngo ni kwo guhitamwo kubabara ku bwabo, maze ngo aca yigira muto, gushika n'aho apfa, kandi urupfu rwo ku Musalaba.

Na yo ngo shetani imaze kubona ko Yezu yaje kw'isi, ngo yaciye ihungira mu muntu. Ngo ni na ho Yezu na We yaciye yigira imfungurwa mw'Isakaramentu ry'Ukaristiya, gutyo ngo aca yinjira muri uwo muntu, araheza yaka iyo shetani ububasha bwose, na we wa muntu ngo abona kuba uwidegemvya.

Uwo musaserdoti akaba yamenyesheje ko ivyo vyose Yezu yabigirishijwe n'urukundo yakunze umuntu. Ni na ho kandi ngo havuye insiguro y'uko Isakramentu ryeranda ry'Ukaristiya ari Isakaramentu ry'Urukundo. Tubamenyeshe ko urugendo rurerure rwahora ruba, ruciye mu makaritiye, rutabaye rukiba, rukaba ahubwo rwabereye imbere mu masengero.

BPP1 Syldie Ndayikengurukiye, Ubwibutsamana bw'igipolisi c'Uburundi  

Mu mumugwi umwe

Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)

Muri irya misi,

Bumvise aya majambo Yezu yavuze ati: «Uwurya umubiri wanje akanywa n’amaraso yanje arafise ubuzima budahera.», benshi mu bigishwa biwe bavuga bati: «lyo mvugo iratugumiye, ni nde yoyemera?» Yezu yamara aca aramenya mu mutima wiwe ko abigishwa biwe bavyidogera, arababwira ati: «Ivyo birabatirimutsa? Hari akantu nimwabona Umwana w’umuntu aduze iyo ahora… Umutima ni wo ubeshaho, umubiri nta co umara. Amajambo nababwiye ni umutima n’ubuzima. Yamara muri mwebwe, harimwo bamwe batemera.» Na none Yezu kuva mu ntango yari azi abatemera n’uwari kumugusrisha. Arongera ati: «Ni co gituma ndababwiye ko ata woza iwanje, Data atabimuhaye.» Kuva ubwo, benshi mu bigishwa biwe baciye biyonjorora, ntibaba bakimugendanira.

Yezu rero abwira bamwe cumi na babiri ati: «Namwe, mushaka kwigira?» Simoni Petero aramwishura ati: «Mukama, turi bwirukire nde wundi? Ko ari wewe ufise amajambo y’ubuzima budahera. Tweho twaremeye kandi turazi ko uri Umweranda w’Imana.»