Iryo hwaniro ryari ryitabiriwe n'urwaruka ruvuye mu mihingo itandukanye ya hano mugisagara ca Bujumbura, no mu madini atandukanye, mu batanze inyigisho hakaba harimwo na Pasitori Mariko kagisye

Umuryango «Chemin Neuf» wo muri Paruwase yitiriwe Yohani Batista Mweranda, ku magenekerezo ya 7, 8 na 9 Myandagaro uno mwaka turimwo, waratunganije ihwaniro ry'urwaruka ryiswe «Ici festival». Iryo hwaniro ryabereye muri ico kigo c'uwo muryango nyene, rikaba ryahuje urwaruka rwinshi ruvuye mu mihingo itandukanye.

Iryo hwaniro ryari ryitabiriwe n'urwaruka ruri mu rugero rw'imyaka iri hagati ya 18 na 30, ruvuye mu mihingo itandukanye ya hano mugisagara ca Bujumbura, no mu madini atandukanye. Mama Nina Batungwanayo, umwe mu batunganije iryo hwaniro, yaratuyagiye ihangiro ryaryo. Yavuze ko ari uguhuza urwaruka mu kuruyagira uburyo rwokwigenza mu buto bwarwo.

Inyigisho ya mbere yatanzwe n'inkumi Axelle Shikana, aho yigishije ku kwakira Mutima-Mweranda. Inyigisho ya kabiri na yo yatanzwe na Patiri Georges Scolastique. Yigishije ku gukira ku Mutima, inyigisho yiwe akaba yayitanze ku wa gatandantu.

Na we Pasitori Mariko kagisye, umutumire muri iryo hwaniro, inyigisho wewe yatanze yari ifatiye ku migenderanire urwaruka rutegerezwa kugiriranira n'Imana kuruta ibindi vyose. Yarumenyesha ko rutegerezwa gusubiza hamwe n'Imana mu kwakira isakramentu ry'ikigongwe kenshi gashoboka, kuko ngo ubiravye neza usanga ari rwo rukunda kugwa mu bicumuro cane kuruta abandi.

Muri iryo hwaniro harabayeho kandi n'ugushinga intahe zitandukanye. Abo twaganiriye bakaba baratumenyesheje ko izo nyigisho zabazaniye ihinduka mu mibereho yabo, kandi ko zatumye bamenya uburyo bobaho bari kumwe n'Imana.

Mwomenya ko bene iryo hwaniro ryama riba ku mwaka ku mwaka, mu gihe c'ici, ari na co gituma ryiswe «Ici festival». Iry'uno mwaka rikaba rigira irya kane.

Emmanuel ndagijimana, Paruwase Gihosha

Ivyiyumviro

Rondera

Urutonde rw'Imisa

Mwoba mufise ico mubaza?

Tanga