Yasiguye ko Umubiri ari ikibanza c'ibonekero ry'umuntu, rimutandukanya n'ibindi bintu canke n'abandi bantu.
Ku vy'uko umubiri wacu ari ingoro ya Mutima-Mweranda na ho, yaratumiriye abari muri iryo hwaniro gusukura ingoro y'Imana muri bo, kuko ngo umuntu iyo amaze kumenya ko ari Ingoro y'Imana, igihe atayisukuye, hakajamwo imicafu myishi, iyo Ngoro iheza ntibe ikinogera Umukama. Bakavavanura n'ibicumuro bibatandukanya n'Imana.
Yaranavuze umuti w'igicumuro, ko ari ukwigaya, maze umuntu akacirega. Maze Imana, Yo isanzwe ari Munyakigorwe, ikamuharira, na we akigira inama y'ukuvavanura n'ivyahora bimukwegera muri ico gicumuro. Ni na ho rero ngo imibiri yabo bokwumva ko bakwiye riho kuyininaharisha Imana na ntaryo mu kuja mu nkuka ya Misa kenshi no mu gisabisho.
Yasozereye atekerera ibibazo bibiri abari aho, kugira ngo babandanye bashitsa izo nyigisho mu mitima yabo:
«Ni ibihe nkora bigambura umubiri wanje n'umutima wanje? Ingingo nokwifatira ni iyihe kugira ngo mbeho mfise amahoro, kandi ntekaniwe?»Na we uwatanze inyigisho ya kabiri, yashimikiye ku kuntu urwaruka rwo mu Kanyosha rwokurikira Yezu, ikaba yatanzwe ku civugo kigira kiti:
«Nkurikira!» Ariane Kezimana, uwihebeye Imana wo mu muryango
«Se Gwimi» (izina risigura
«Nkurikira», mu nyigisho yatanze, yishimikije ijambo ry'Imana ryo mu Nkuru Nziza ya Yezu Kristu yanditswe na Matayo ivuga aho Yezu yahamagara umusore yari atunze ati:
«Nkurikira» (Mat.19:21).
Muri iyo nyigisho, Ariane Kezimana yaribukije imihamagaro ibiri izwi muri Ekleziya: Ukwihebera Imana, be n'ukwubaka rukristu. Ariko muri iyo mihamagaro yose, yavuze ko ico umuntu atumirirwa ari ukuba mweranda.
Uwo mwigisha akaba yarakebuye abari aho, abahamagarira guheba ingeso mbi zoba zibaboshe, canke zibabuza guhura na Yezu no kumukurikira. Ikindi yabamenyesheje ni uko uwugendera mu nzira nziza abwirizwa kwanka igicumuro. Gutyo ngo ni ho aba ariko arakurikira Yezu.
Ariane Kezimana akaba yarahamagariye urwo rwaruka guheba ingeso mbi zoba zahora zirubuza kugabana ivyiza vy'Imana.
Inyigisho z'uwo musi zasozerewe n'inkuka ya misa yaherejwe na Patiri Lambert Chrysostome Nishimagizwe, umwibutsamana w'imihari n'imigwi y'ubutumwa muri Paruwase Kanyosha.
Edmond Ndayisenga, Paruwase Kanyosha