Diyoseze >

Abasaserdoti bacu >

Mu muryango w'abasaleziyano bo mu kigo «Don Bosco» Buterere, akanyamuneza k'ukugabana umusaserdoti n'umudiyakoni bashasha

Mu muryango w'Abasaleziyano baba mu kigo citiriwe umweranda Yohani Bosco bita «Don Bosco» co mu Buterere, kuri uyu wa Mungu birirwanye akanyamuneza k'ukugabana umusaserdoti mushasha, Patiri Pierre Claver Bucindika, n'umudiyakoni Jean Marie Hitimana, batiwe muri ayo mabanga ku muhezagiro wa Nyenicubahiro Musenyeri Yohani Ntagwarara, yari arongoye inkuka y'imisa.

Ivyo birori vyari vyitabwe ahanini n'abasaserdoti n'abandi bihebeye Imana bo muri uwo muryango, n'abakristu bagizwe n'abavyeyi b'amaraso ba Patiri Pierre Claver Bucindika n'aba Diyakoni Jean Marie Hitimana, n'incuti n'abagenzi b'abo batiwe muri ayo mabanga, n'abanyeshure bigeze kwigishwa n'uwo musaserdoti mushasha n'abakristu bo muri iyo Paruwase.

Muri iyo Nkuka y'imisa, uwo mwepiskopi yarasiguye ijambo ry'Imana yamurikiye ivyo birori, akaba yashimikiye cane ku Nkuru Nziza ya Yezu Yristu yanditswe na Matayo, ivuga aho yari mu nzira irora i Yeruzalemu, abantu isinzi baba mu bisagara vyegereye agahinga yarimwo bakaza bamusangayo, na we bikamutera ikigongwe, kuko ngo bari bameze nk'intama zitagira Umwungere, maze akabigisha ivy'ubwami bw'ijuru, akongera agakiza abarwaye babo.

Uwo Mwepiskopi, amaze kuvuga ko uwihebeye Imana yihebera Imana ku bw'Imana no ku bw'ubukiriro bwa bene wabo, ico kigongwe Yezu yagiriye iryo shengero ni na co yafatiyeko mu kubwira Diyakoni Pierre Claver Bucindika uko ibanga rimuraririye rimeze (muri uwo mwanya, Pierre Claver yari akiri umudiyakoni). 

Musenyeri Yohani Ntagwarara, afatiye kuri ico kigongwe Yezu yumviye abaje bamugana, yabanje kuvuga ku busaserdoti bw'Umwana w'ikinege w'Imana,ko iyo Mana yabumusangije na yo ngo Ubwami bwayo bukwire hose. Yaravuze kandi n'ukuntu Yezu arangura ubwo butumwa, ko mu kubukorana urukundo akunda se, atembera ibisagara vyose, yongera yigisha mu masinagoga. Ngo ntaguma hamwe ngo bahamusange,ahubwo ngo asanga abantu iyo bari. Ngo abanza kwigisha Ubwami bw'ijuru, n'ingene abantu bobugendera, mu nyuma na ho agakora, mu gukiza abarwaye.

Mu kuvuga aho ubusaserdoti bw'abantu na bwo bukomoka, uwo Mwepiskopi yaravuze ko Yezu yahavuye atora mu bo yigishije, abazomufasha kwigisha abandi. «Mu kwigisha abantu, utegerezwa kumenya ivyo bakeneye, n'ibibazo bafise; utegerezwa kubegera,kubumviriza, kubamenya, hanyuma umenye n'ico wobafasha cobabera umuco Umukama Yezu yadusigaranye, kugira ngo ntibagendere mu mwijima w'ukutamenya», ni ko yasiguye ubutumwa bw'umusaserdoti yatiwe.

«Yezu akiza abantu ibibafutanya ku mubiri, ngo yerekane ko ashobora no kubakiza no ku mutima», ni ko yabandanije avuga,uwo Mwepiskopi. Araheza rero ubwo butumwa abwerekeza kuri uwo yagomba aronke ubusaserdoti: «Yezu ntashaka ko ukora ibitangaro nk'uko yabikora, ashaka riho ko uzorekura ibicumuro vy'abantu, ku bubasha uhava uronka, abantu baremurukirwe, bumve amahoro; ashaka ko ufasha abantu kwuzura n'Imana no kwuzura hagati yabo.» Yongeye ati: «Umusaserdoti ategerezwa kugira umutima w'impuhwe, w'ikigongwe, ku bo atumweko!»

Yasozereye amumenyesha ko n'ubu intama zijonjogoye n'ubu zikiriho, kubera ivyo bumva, ivyo babona n'ivyo babayemwo, maze amusaba kurangurana umutima w'impuhwe, w'ikigongwe, ku bo atumweko, abegere, abafashe, basubize umutima mu nda, mu nyigisho no mu masakramentu. Yaramuhumurije avuga ko mu gusigwa amavuta y'ubutore, Umukama azomuha inema zose zikenewe ngo azoshobore kurangura ubwo butumwa.

Araheza rero Musenyeri Yohani Ntagwarara aratira izo ntore z'Imana. Ahejeje kwatira Faratiri Jean Marie Hitimana mu budiyakoni, ni ho yashikiriza Diyakoni Pierre Claver Bucindika na we isakramentu ry'ubusaserdoti, yongera aramwaturirako igisabisho c'ubusaserdoti: «Turagusavye, Muvyeyi, Mushoboravyose, uhe uyu musavyi wawe ari aha, iteka ry'ubusaseredoti; subira umuvyagizemwo Mutima-Mweranda, aronke, Mana yacu, iryo banga ry'ibibagabaga rikomoka kuri wewe, ahindure imigenzo y'abantu mu kubabera akarorero keza [...], abantu bose bacike igihugu ceranda c'Imana!»

Twaregereye abavyeyi ba Patiri Pierre Claver Bucindika, se na nyina, baratubwira ukuntu bamushigikiye mu kwinjira mu muhamagaro wiwe. Jean Berchimas Manirabogoye, se wiwe, akaba mbere n'uwigeze kuba umwigisha kw'Iseminari, yavuze ko bari n'umunezero udasanzwe, kuko ngo iryo sango bari baripfuje kuribona bakiri bazima. Yavuze ko indero rukristu bamureresheje bayikesha iyo na bo barereshejwe, kuko ngo na bo bakuriye mu muryango rukristu. Ni aho rero ngo ivyo uwo mwana yabakenerako vyose ngo ashobore gukurikirana inyigisho mw'iseminari, babimuronsa bavyishimiye.

Intahe y'uwo se wa Patiri Pierre Claver Bucindika yunganiwe n'iya nyina, Umupfasoni Béatrice Nibigira : «[Umwana wacu] yaragize iciyumviro, turacakira; tumugumiza mu gisabisho!» Eka mbere ngo no mu gihe uwo mwana yaba yumvise intege nke zimufashe, na we nyene ngo yaraterereza igisabisho, maze ngo bakanashira uwo mutwaro no mu migwi y'ubutumwa barimwo, ngo bamufashe kumusabira. Araheza mbere amenyesha ko abo babafashije mu gisabisho banasidukanye n'iyonka kuza kumushigikira. Akaba yiyemeje kumuragiza igisabisho akunda cane ca Mama Faustine mweranda asabira abasaserdoti, kugira ngo Imana imurinde ibitero vya sekibi.

Eka n'uwo musaserdoti, n'akanyamuneza kenshi, na we yaratubwiye uko yiyumva, yongera aremeza ko yashigikiwe n'abo bavyeyi basanzwe ari abakristu. Yabanje kutwiganira ukuntu yinjiye muri uwo muhamagaro, n'ukuntu abasaserdoti b'Abasaleziyano bamukoze ku mutima.

Iciyumviro ngo yarakigumanye, mu nyuma ngo aragirirwa ubuntu bw'ukurerwa n'Abasaleziyano, kuri «Lycée Don Bosco» y'i Ngozi. Ukuntu babafata, we na bagenzi biwe, ngo ni vyo vyatumye yumva abakunze. Ikindi, ngo mu buzima bwiwe yagiye araronka abagenzi beza, bamutera intege. Ariko kandi ngo yarumva impungenge ko iryo banga rimurengeye, gusa abasaserdoti bamukurira bakamuremesha, bamwibutsa ko Umukama adatora abakomeye, ahubwo akomeza abo yitoreye. «Ubutumwa bundindiriye, ndaremye, kuko ndazi ko atari jewe nzoba ndabwikoresha, nzoba ndabukorera Umukama, kandi igihe cose ndamugamburukiye, ntashobora kuntererana!» Akaba asaba Umukama ko yomuha inkomezi, ngo ntazomukoze isoni.

Patiri Pierre Claver Bucindika rero abaye umusaserdoti w'Umusaleziyano agira uwa 16 w'Umurundi yatiwe muri iryo banga. Akaba yaciye amenyeshwa ko agiye kubandanyiriza ubutumwa mu gihugu c'Ubuganda. Mwomenya ko ivyo birori vyo mu Buterere vyahuriranye n'ihimbazwa ry'isabukuru y'imyaka 205 y'ukwibuka ivuka ry'uwatanguje uwo muryango, umweranda «Don Bosco», be n'igihe uwo musaserdoti n'uwo mudiyakoni bagira indagano zabo za mbere.

Mu mumugwi umwe

Aleluya. Yezu Kristu, Wewe cabona c’intahemuka, ari Wewe mfura y’abazuka mu bapfuye, uradukunda ukadukiza ibicumuro mu maraso yawe. Aleluya.

Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 60-69)

Muri irya misi,

Bumvise aya majambo Yezu yavuze ati: «Uwurya umubiri wanje akanywa n’amaraso yanje arafise ubuzima budahera.», benshi mu bigishwa biwe bavuga bati: «lyo mvugo iratugumiye, ni nde yoyemera?» Yezu yamara aca aramenya mu mutima wiwe ko abigishwa biwe bavyidogera, arababwira ati: «Ivyo birabatirimutsa? Hari akantu nimwabona Umwana w’umuntu aduze iyo ahora… Umutima ni wo ubeshaho, umubiri nta co umara. Amajambo nababwiye ni umutima n’ubuzima. Yamara muri mwebwe, harimwo bamwe batemera.» Na none Yezu kuva mu ntango yari azi abatemera n’uwari kumugusrisha. Arongera ati: «Ni co gituma ndababwiye ko ata woza iwanje, Data atabimuhaye.» Kuva ubwo, benshi mu bigishwa biwe baciye biyonjorora, ntibaba bakimugendanira.

Yezu rero abwira bamwe cumi na babiri ati: «Namwe, mushaka kwigira?» Simoni Petero aramwishura ati: «Mukama, turi bwirukire nde wundi? Ko ari wewe ufise amajambo y’ubuzima budahera. Tweho twaremeye kandi turazi ko uri Umweranda w’Imana.»