Patiri Yohani Mariya Vyukusenge yaherejwe imisa, yarabipfurije umubano mwiza no gufashanya n'abandi mu kwiteza imbere, nk'uko ngo umweranda Ogustino yabikora na bagenzi biwe

Ku wa gatanu ingenekerezo rya 28 Myandagaro 2020, wari umusi muri Ekleziya Katolika hari haramutse hahimbazwa umweranda Ogustino. Mu mubano rukristu mutoyi witiriwe uwo mweranda Ogustino na hi, umubano wo muri Paruwase Munanira, kuri uwo musi bakaba baririrwanye akanyamuneza nta ngere, kuko bahimbaza kandi bakambaza uwo mweranda. Muri uwo mubano nyene, Patiri Yohani Mariya Vyukusenge akaba ari we yahereje inkuka ya misa, muri rumwe mu ngo zigize uwo mubano.

Umubano rukristu muto wiyiriwe Ogustino mweranda wo muri Paruwase Munanira uherereye mu gacimbiri Njenje, ku mutumba Nyarunazi. Muri iyo nkuka y'imisa, Patiri Yohani Mariya Vyukusenge yasiguye ko abo bakristu bagize uwo mubano bahisemwo neza mu gutorana uwo mweranda ngo ababere umuvunyi.

Ku bijanye n'ukuba barahisemwo guhimbariza uwo musi mukuru wabo aho uwo mubano mutoya uba na ho, ngo birafise akamaro nta ngere mu gukomeza ukwemera. Akaba yarabipfurije umubano mwiza no gufashanya n'abandi mu kwiteza imbere, nk'uko ngo umweranda Ogustino yabikora na bagenzi biwe. Yasozereye asaba abari aho kwama bagerageza guca mu makanda y'uwo mweranda, nko kugerageza gutahura ivy'Imana no guhanura abariko bagendera mu kabi.

Inyuma y'inkuka ya misa, abakristu bahurikiye muri uwo mubano baciye baja mu gatutu, maze bariginana mu gusangira amasaka.
Mw'ijambo ry'uwurongoye uwo mubano, Umushingantahe Renova Nsabiyumva, yarakengurutse cane ku ntambwe bagezeko muri uwo mubano. Yamenyesheje ko uwo mugenzo w'uguhimbariza mu mihana yabo umuvunyi w'uwo mubano ari ikintu c'ingirakamaro, kuko ngo n'abandi bari mu yindi mibano bituma bitunganya neza, gutyo ngo ijambo ry'Imana rigasasagara hose. Akaba yasavye abari aho ko bohurumbira umubano wabo.

Ezéchiel Nimbona, Paruwase Munanira

Ivyiyumviro

Rondera

Urutonde rw'Imisa

Mwoba mufise ico mubaza?

Tanga