Kuw'Imana igenekerezo rya 30 kigarama 2018, harabaye igiteramo c'indirimbo za Noeli kuri Paruwase Katedrale Regina Mundi. Ico giteramo cahuriranye n'ihimbazwa ry'umusi mukuru w'Umuryango Mweranda, caremeshejwe ahanini n'abana bakiri bato cane bavuza indirimbo za Noeli n'amazaburi kuri piyano canke baziririmba umwe umwe. Abo bahinga bari baje bava mu migwi itandundukanye y'abaririmbiramana bo mu gisagara ca Bujumbura, nko mu Nyakabiga, kuri Saint Michel, Katedrale Régina Mundi, hamwe no kw'isengero y'abapatiri b'aba dominikano mu Kinanira. Ico giteramo catanguwe n'igisabisho c'inyinjizo, aho aba-Kristu batumiriwe gusabira imiryango iri mu ngorane zitandukanye. 

Ibisomwa vyeranda vyaranze ico giteramo vyasomwe n'utwana dutoyi. Igisomwa ca mbere cavuye mu gitabu c'Inkuru Nziza ya Yezu Kristu yanditswe na Luka (Luk.1,26-38). Igisomwa ca kabiri cavuye mu Nkuru Nziza yanditswe na Luka nyene (Luk.2.8-20).

Abari aho warabona ko batangariye ubuhinga abo bana berekanye. N'abo mu mugwi w'urwaruka rw'abaririmbiramana «Jeunesse Régina Mundi» bo kuri Kadedrale Régina Mundi, hamwe na «Uno corde» bo muri Paruwase ya Ngagara, ntibari batanzwe kuremesha igiteramo.

Patiri mukuru wa Paruwase Cathédrale Régina Mundi, Patiri Félix Fupi inyuma y'igiteramo yaragaragaje akanyamuneza aho yamenyesheje ko bitangaje ingene abo bana biga n'ingoga, kuko n'abatanguye kwimenyereza vuba berekanye ubuhinga butangaje. Patiri mukuru yaramenyesheje kandi ko bihimbaye kubona n'abamaze igihe kinini berekana ko ku mwaka ku mwaka hari ubuhinga bushasha bungutse. Yagize ati: "Nihweje aba bana mbona kazoza". Yarashimye kandi ibirori iyo migwi yerekanye, aramenyesha ko n'aho abaririmvyi bayihurikiyemwo baremesha abakristu mu nkuka z'imisa za misi yose, mu gihe c'igiteramo nk'iki barerekana ubuhinga busumbirije.

Patiri Félix Fupi yaribukije ko Ekleziya ifise ubuhinga bwo kuririmba yiharije, kandi ko intumbero y'ico giteramo atari iy'ugutoza amafaranga, ahubwo ari ugufasha abakristu gukirurutsa umutima n'ugukomeza ukwemera. Yarangije ashimira abitanze bose mu gutegura ico giteramo, yongera arashimira n'abavyeyi baha uruhusha abana babo ngo baze kuririmba, bakanabaherekeza, kuko izo nyigisho ari ntangere no mu vyerekeye ukwubaka kamere ka muntu.

Grâce-Divine GAHIMBARE, Katedrale Regina Mundi