Inyuma y'aho imwe mu nyubakwa za Paruwase Ruziba yaheruka guhura n'igihuhusi c'umuyaga gihitiye mu karere ikaguruka, maze abakristu bo muri iyo Paruwase bakayisanura mu kuyiduza impome zabomotse, kuri uyu wa gatandatu igenekerezo rya 22 Ntwarante na ho bari basidukanye n'iyonka mu bikorwa vy'ukubandanya bayisanura. Abasaseredoti b'Umukama baranguriraho ubutumwa muri iyo Paruwase Ruziba, bari kumwe n'uwuheruka gutorerwa kurongora inama nkuru ya Paruwase, bakaba barafashe iya mbere mu bikorwa vy'amaboko.

Ibikorwa vy'uwo musi vyaranzwe ahanini n'ukuringaniza imbere muri iyo nzu, ugushingamwo inkingi, n'ukuvanga isima n'urucekebuye, ivyo bita béton mu gifaransa, kugira ngo bakore inkingi z'ukuyikomeza mu rwinjiriro no hagati mu mpome. Ibikorwa vyari bitegekanijwe vyose vyararanguwe, mberebakaba baciye biha n'irindi sango ry'ugusubira kuhahwanira ku wa gatandatu ukurikira, aho na ho ngo bakaba bazogirako basakara, bakoresheje amabati n'ivyuma biriko biteranirizwa aho nyene.               

Ibikorwa vy'uwo musi biheze, uwurongoye inama nkuru ya Paruwase, Damien CIZA, yarafashe akanya, maze arashikiriza ijambo ry'ugukengurukira abavyitavye. Yaboneyeho gusaba abakristu kwitanga ku rugero rushimishije, na rirya ngo paruwase ifise n'iyindi migambi myinshi iriko iratunganya, ubona ko ikiri no mu ntango. Yagize ati: Â«Ukwemera kwacu nikwame kurangwa n'ibikogwa! Dufashijwe na Mutima-Mweranda, twubake Paruwase yacu, duhereye mu mibano mito mito».

Tubamenyeshe ko iyo nzu iriko isanurwa mu gihe hari n'uwundi mugambi munini utegekanijwe, uwo na wo ukaba ari umugambi w'ukwagura ingoro y'Imana, kugira ngo hatorwe umuti w'ikibazo c'abakristu basengera hanze bivanye n'ubwinshi bwabo. Iyo Paruwase iherutse kandi no gutumako imodoka y'ukwunguruza abasaserdoti, imodoka yaguriwe mu bihugu vyo hanze.

Emmanuel HARIMENSHI