Nos Paroisses >

Vicariat de Muramvya >

Paruwase nshasha ya Gasura yaraye ivutse : hanura mudatinya

«Basaseredoti ngira nshinge iyi Paruwase ya Gasura, nk'abandi basaseredoti bose, muze mwame mwibuka ko mu butumwa mushinzwe, ubutumwa bwa mbere ari ubw'ukuba umuhanuzi», ubwo ni bumwe mu butumwa Nyenicubahiro Musenyeri Gerevazi Banshimiyubusa, Umwepiskopi wa Diyoseze Nkuru ya Bujumbura, yashikirije abasaserdoti bari mu Nkuka y'Imisa y'ugushinga n'ugutanguza Paruwase nshasha ya Gasura, muri Vikariya ya Muramvya, aho hari kuri uyu w'Imana igenekerezo rya 29 Nyakanga 2019.

Mu birori vyari vyatewe iteka n'abakristu isinzi baje kwigina itanguzwa rya Paruwase nshasha yabo, eka n'abandi batumire batandukanye, barimwo n'abajejwe intwaro mu gihugu c'Uburundi, bari baje gushigikira abo bakristu, ni ho Umwungere wa Diyoseze ya Bujumbura yogosha abakristu yifashishije Ijambo ry'Imana ryo kw'idominika ya 26 mu mwaka-C.

Musenyeri Gerevasi Banshimiyubusa, muri iyo nyigisho, yasavye abasaserdoti ko bokwama na ntaryo bibuka ko aho bahamagarirwa ubutumwa bw'ugutagatifuza igihugu c'Imana, ari kandi n'abahanuzi. Musenyeri Gerevazi yaribukije abo basaserdoti ko ibihe isi irimwo ari ibihe bibakaburira gushira ubwoba, bakemera kurangura ubwo butumwa bataravye ibibaca ivutu, kuko ngo abahanuzi biyitirira Imana itagira izina bashobora gushwiragiza intama Umukama yashinze aba batumwa biwe. 

Musenyeri Gerevazi Banshimiyubusa yaciye ashimangira iryo jambo ry'Imana mu kubwira abari aho ati: «Iryo ni ryo jambo numva nobashikiriza, mwebwe mwese bakristu basangwa ba Gasura, muri iki gihe mpimbawe n'ugushikana ngaha iwanyu ikirenge canje ca mbere, ndabazaniye akaganuke ka Paruwase nshasha». Yaboneyeho kumenyesha ko Paruwase Gasura yaragijwe Abamaritiri b'i Buganda beranda ngo bayibere abavunyi.

Akaba yarasavye ko umw'umwe muri bo yumvise ico Imana yari yabayagiye uwo musi yozigama amabwirizwa y'Imana yose, gutyo, ku bw'ubuntu bw'Imana, ubusho n'Umwungere, baze bahurire bose mw'ijuru bari bahejeje kwumva mu Nkuru Nziza ya Yezu Kristu yanditswe na Luka, iryo umutunzi yahomvye, umworo Lazaro na we akarironka (Luka 16,19-31).

Yasozereye atumirira abasaserdoti kuzorangura ubutumwa bwabo bw'abahanuzi nk'uko Ekleziya, imurikiwe na Mutima w'Imana, ibitegereza. Abakristu ba Paruwase Gasura na bo yabibukije ko ukuba Paruwase ari ukwemera kuronka ubutumwa, kugira ngo abantu babane mu mahoro mazima, ashimikiye ku butungane butunganiriza bose, no ku rukundo rwugukurukiye bose kandi rwamana ikigongwe, kandi ko umw'umwe wese mu myaka agezemwo no mu mabanga afise, yoshingira intahe Kristu adatinya, mu bihe vyoroshe no mu bihe bigoye.

Murumva ko iyi nyigisho ije gukomeza ubutumwa bw'umukristu wese na cane cane abarongoye abandi muri Ekleziya, bwo kubabarana bagahanurana, umwe n'uwundi, mu kibano no ku rwego rw'igihugu. Ni ibanga ry'umukristu wese. 

Iyo nyigisho yose muyisanga ngaha. 

Michel Nibitanga, CEDICOM 

Dans la même rubrique