Vikariya >

Buhonga >

Paruwase Mubimbi yarashikirijwe icese patiri mukuru mushasha, Patiri Laurent Nkurabanka

Imbere y'uko inkuka y'imisa itangura icese, Musenyeri Anatole Ruberinyange yabanje guha ikaze Nyeniteka Emmanuel Sinzohagera, arongoye inama nkenguzamateka y'igihugu c'Uburundi yari yateye iteka ivyo birori. Uwo mushitsi w'iteka, mw'ijambo yashikirije, yaramenyesheje ko leta na Ekeleziya buzuzanya muri vyinshi, ko mbere ari no muri iyo ntumbero Leta itazokwigera yirengagiza igikorwa na kimwe ca Ekeleziya, kuko izirikana ibikorwa Ekeleziya irangurira abanyagihugu mu kubaho neza.

Akaba yaraboneyeho gusaba abakristu bari aho gushishikara, nk'uko ngo basanzwe bamenyereye kubikora mu gutanga impanuro nziza no mu gufasha abakiristu mu kwubaka imitima n'imibiri yabo. Ni n'aho nyene yafatiye mu gusaba Ekleziya ko yobandanya yigisha urwaruka n'abavyeyi ku bijanye n'indero ndundi n'indero rukiristu, bakamenya ko abakiristu bahamagarirwa gukundana. Na none ngo turi abigishwa ba Yezu Kiristu. Mu bo yasabiye ko bokundwa, mbere bakanubahwa, hakaba harimwo n'indongozi z'igihugu.

Mu nsiguro y'ijambo ry'Imana yatanzwe na Musenyeri Anatole Ruberinyange, afatiye ku bisomwa vyeranda vy'uwo musi, na cane cane inkuru nziza ivuga ivy'abaronse amatarenta ngo bacururize shebuja, yamenyesheje abari aho ko Imana yabahaye amatarenta abakwiye, umwe umwe ku rugero rwiwe. Yongera amenyesha patiri mukuru mushasha, eka mbere n'abandi basaserdoti bari aho, ko baronse amatarenta, kandi ko babwirizwa kuyacuruza, bakunguka. Yongera atumirira umuryango w'abakiristu guteza imbere ingabirano Imana yabahaye, kuko ngo ivyo bafise vyose ari Imana yabibahaye, bwaba ubuzima, ubwenge, eka ivyo batunze vyose.

Yabandanyije amenyesha umuryango w'abakiristu ko patiri mukuru aje ngo basangire kwubaka umuryango w'Imana. Yagize ati: "Uyu patiri mukuru tubashikirije ni umwungere bwegu, ajejwe kwigisha, gutagatifuza no kuyobora, afadikanije n'abandi basaserdoti. Ngo azobagaburira ijambo ry'Imana, atange inyigisho nkomezakwemera; yongere akomeze n'indero rukiristu. Ikindi, ngo azokundisha umuryango w'abakiristu ijambo ry'Imana, aremeshe abari ku mpfiro, n'ibindi vyose biri mu ntumbero yo gukorera Imana n'abo yaremye.

Na we patiri Laurent Nkurabanka, mw'ijambo ryiwe, yarashimye iteka atewe ry'ukuba patiri mukuru w'iyo paruwase, yongera arakengurukira kandi na Musenyeri icegegera c'Umwepiskopi mukuru wa Diyoseze yamushikirije amabanga yo kurongora Paruwase. Araheza amenyesha ko, we na bagenzi biwe babiri bagiye gusangira ubutumwa, ari bo Patiri Justin Nsengiyumva na Patiri Chanelle Nsengiyumva, bemeye kandi bakiriye mu bugamburutsi bwinshi amabanga bashikirijwe.

Abakiristu-basangwa na bo yabasavye gushigikirana mu kwubaka Paruwase yabo, yongera abemerera ko azanye ingoga, umutima n'ugushaka, maze ivyo vyose, babishize hamwe n'ubushake bwabo, n'umutima wabo, ngo akaba yizeye ko bizokunda bagateza imbere imitima n'imibiri yabo, maze ivyamwa biheze vyiserure muri paruwase yabo. Ku bwiwe ngo amahoro, umutekano, ubumwe, n'indero runtu ngo bizoheza bishinge imizi, maze ubwami bw'Imana busasagare hose, harimwo na komine yabo, intara yabo, igihugu cabo, eka mbere n'isi yose.

Tubamenyeshe ko patiri Laurent Nkurabanka yahora ari patiri mukuru wa paruwase Rugazi, yavyawe n'iyo paruwase Mubimbi nyene. Akaba aje gusubirira nyakwigendera patiri Athanase Nsabimana aheruka kwitaba Imana.

 Jean Marie Haburukundo, Paruwase Mubimbi

Mu mumugwi umwe

Aleluya, aleluya.

Umukama yavuze ati: «Ewe Toma, wemeye kuko umbonye.

Hahiriwe abazokwemera ata co barinze kubona.»

Aleluya.

 

Ivyo dusoma mu Nkuru Nziza ya Yezu Kristu nk’uko yashikirijwe na Yohani (20, 19-31)

Imisi umunani iheze, Yezu araza

Ku mugoroba w’uyo musi ari wo mubarwa wa mbere w’indwi, mu nzu yarimwo abigishwa, bari bakinze inzugi ku gutinya Abayuda. Niho rero Yezu yaza, ahagarara hagati muri bo, ababwira ati: «Nimugire amahoro!» Avuze atyo, abereka ibiganza vyiwe n’urubavu rwiwe. Abatumwa ngo babone Umukama, barahimbarwa.

Yongera ababwira ati: «Nimugire amahoro! Kumwe Data yantuma, nanje ni ko ndabatumye.» Ababwiye ivyo, arabahuha ati : « Nimuronke Mutima Mweranda. Abo muzorekurira ibicumuro, bazoba babirekuriwe, abo muzobigumizako na bo, bizobagumako.»

Aho Yezu yaza, Toma, umwe wo muri bamwe Cumi na babiri, ari we bita Didimo, ntiyari muri bo. Abandi bigishwa bamubwiye bati: «Twabonye Umukama», abishura ati: «Ntiboneye mu biganza vyiwe intoboro za ya misumari, ngo nshire urutoke mu ntoboro zayo, n’urushi mu rubavu rwiwe, sinzokwemera.»

Imisi umunani iheze, abigishwa basubira guteranira muri ya nzu, na Toma bari kumwe. Yezu araza, inzugi zugaye, ahagarara hagati muri bo ati: «Nimugire amahoro!» Hanyuma abwira Toma ati: «Shira urutoke ngaha: ng’ibi ibiganza vyanje; zana urushi rwawe kandi urushire mu rubavu rwanje: ureke rero kuba ikigaba, ariko wemere.»

Toma amwishura ati: «Mukama wanje, Mana yanje!» Yezu na We amwishura ati: «Ewe Toma, wemeye kuko umbonye: hahiriwe abazokwemera ata co barinze kubona.»

Hari n’ibindi bimenyetso vyinshi bitanditswe muri iki gitabu Yezu yagiriye imbere y’abigishwa biwe. Ivyo rero vyanditswe ngo mwemere ko Yezu ari Kristu Umwana w’Imana, kugira kandi ngo muvyemeye, muronke ubuzima kw’izina ryiwe.