Ibisata >

OPM >

OPM-Bujumbura mu ndemesha z'Imikangara y'Imana zo mu ntara z'ubutumwa zo mu gisagara ca Bujumbura inama y'ugutegura umusi mukuru wa Epifaniya

Iyo nama yahuje batatu batatu muri bari mu migwi y'indemesha z'Imikangara y'Imana zo mu ntara z'ubutumwa zitiriwe Mikaheli Mweranda na Gihosha, baje bava mu maparuwase atandukanye agize izo ntara z'ubutumwa zibiri. Yatangujwe n'igisabisho be n'ukuzirikana kw'ijambo ry'Imana ryavuye mu Nkuru Nziza ya Yezu Kristu yanditswe na Matayo (Mat.2:1-12), aho umusaseredoti w'Umukama yasiguye ico ari co Epifaniya.

Inyuma y'ukwo kuzirikana iryo jambo ry'Imana, patiri Antoine Sabushatse yaciye akurikiza kandi kwibutsa ico ari co "Imikangara y'Imana" n'ubutumwa bw'imikangara y'Imana, yongera aributsa kahise k'ubwo butumwa, ko bwatanguriye mu gihugu c'Ubufaransa, butangujwe n'umwepiskopi Karoli Firbin Janson. Aho mu ntango, uwo mugwi ngo ryari nk'ishirahamwe yise "Igikorwa ceranda c'abana".

Na ho mu Burundi, ubwo butumwa ngo bwahashitse buzanywe na Nyenicubahiro Musenyeri Mikaheli Ntuyahaga, ari na we ngo yahinduye izina ry'uwo mugwi, arikura mu gifaransa, arishira mu Kirundi, agaca atora izina "Imikangara y'Imana".

Ngo mu kuvuga "Umukangara", uwo mwepiskopi ngo yafatiye ku mvugo y'aho ha mbere, aho ngo "abakangara" baba ari abasore bategurirwa ku kirimba c'umwami, kugira ngo arwanye n'umwansi w'igihugu bazomurwanirire. Ngo ni aho rero uwo Mwepiskopi na we ngo yaciye afatira aho nyene, maze abona ko urwo rwaruka rwoba urwo kurwanira Kristu, rurwanya umwansi shetani.

Nk'uko intumbero nyamukuru y'iyo nama yari iy'ukwitegurira umusi mukuru wa Epifaniya, patiri Antoine Sabushatse yaciye aja mw'ido n'ido ry'ivyihwezwa muri iyo nama. Ariko habanje kubaho ukurabira hamwe uko ubutumwa busanzwe bugenda muri paruwase imwe imwe, nimba imikangara y'Imana yose yoba ironka inyigisho nk'uko bikwiye, canke ironka imisa n'ibiburiburi rimwe mu kwezi, canke kandi nimba abaririmvyi b'Inyenyeri batwara akanyamuneza k'Umukiza yatuvukiye.

Aho na ho amaparuwase nka yose ku yari yitavye iyo nama yaravuze ko ibikorwa vyagenze neza. Mu kuvyemeza, abafashe amajambo bagiye baravuga mbere ko hari n'aho ubutumwa bwabo butaherera mu nyigisho z'ukwemera gusa, ahubwo ko ngo iyo haba hageze mu ci, wasanga baca babafasha iyo mikangara y'Imana mu kuyigisha inyifato runtu na rukiristu.

Ariko kandi ngo vyose ntivyaba vyera ngo de, kuko ngo hariho n'ahandi wasanga hibonekeza abavyeyi baba batarategera neza ico gikorwa c'imikangara y'Imana. Ivyo ngo bikaba vyaca bibera intambamyi indemesha z'Imikangara y'Imana zaba zirangurira ubutumwa muri iyo paruwase vyaba bishikiye.

Ngaha uturorero twatanzwe ni utwo muri paruwase yo mu Ruziba kumwe, be no mu bwibutsamana bw'igipolisi, muri paruwase yabwo yitiriwe Kristu Umwami yo mu Ngagara. Mbere nko muri paruwase Gihosha hoho, izo ndemesha z'Imikangara y'Imana zaramenyesheje ko ziri mu nteguro y'ukuhashinga uwo mugwi, kuko ngo utahahora. 

Mwomenya ko muri iyo nama baciye bavaho bapfundikiye hamwe umusi bazogarukirako, ngo banoganze neza ivyo batashoboye gushikako. Mwomenya kandi ko no mu ntara y'ubutumwa ya Buhonga, inama nk'iyo yabaye bukeye bwaho, ku ndemesha z'Imikangara y'Imana yaho.

Mu mumugwi umwe

Aleluya, aleluya.

Umukiza wacu Yezu Kristu yaratsinze urupfu;

yarabonesheje ubuzima n’umuco,

mu kudushikiriza Inkuru nziza.

Aleluya.

Ivyo dusoma mu Nkuru nziza ya Yezu Kristu nk’uko yashikirijwe na Luka (11, 15-26)

Muri irya misi, Yezu yari yirukanye ishetani ngo ive mu muntu w’ikiragi. Mugabo bamwe mu bari aho bagira bati: «Yirukana amashetani kubwa Belizebuli, umwami w’amashetani.» Abandi na bo, kugira ngo bamugeze, bamubwira bati: «Twereke ikimenyetso kivuye mw’ijuru.»

We rero yari azi ico biyumvira, ababwira ati: «Ubwami bwose budashira hamwe buzohona, amazu na yo agwaneko. Ko mugize ngo nirukana amashetani kubwa Belizebuli, none shetani niyaba iriko irirwanya, ubwami bwayo buzorama bute? Ngasangwa nanje nirukana amashetani kubwa Belizebuli, abana banyu bayirukanisha iki? Ni co gituma bazobabera bo nyene abacamanza. Yamara ngasangwa nirukana amashetani ku bubasha bw’Imana, Ubwami bw’Imana bwabashikiriye.

Iyo umugabo akomeye, ari n’umuheto, akararira urugo rwiwe, ivyiwe ntakibikakaza. Ariko haramutse haje uwumurusha inguvu akamutsinda, aca amwaka wa muheto yari yishimiye, kandi ivyo amwambuye agaca abitanga.

Uwo tudashize hamwe aranyaka, uwo twimburira kubiri arasesagura.

Iyo shetani y’ibiterasoni ivuye mu muntu, irayerera mu bunoge, irondera aho yoruhukira, ariko ntihabone. Iraheza rero ikavuga iti: Nza kwisubirira mu nzu yanje navuyemwo. Igarutse, isanga ata nkomakomyi, isukuye kandi isikuye. Ikagenda noneho kuzana ibindi bishetani indwi biyisumwa ububi; vyinjiye bikayigumanamwo, maze bikunyuka, ububi wa muntu bukaruta ubwa mbere.»