Abana bahuriye kuri ico kirimba ca Bikira Mariya ni abo muri paruwase zigize intara z'ubutumwa za Gihosha na Mikaheli Mweranda, bakaba baciye bashikana amashikanwa begeranije ku bw'abana bagenzi babo babayeho mu buzima bugoye kandi bataramenya Yezu Kristu

Ku musi w'Imana igenekerezo rya 03 Nzero 2021, aho muri Ekleziya hahimbazwa umusi mukuru wa Epifaniya, ukumenyekana kw'Umukama Yezu Kristu, no muri Diyoseze Nkuru ya Bujumbura uwo musi mukuru warahimbajwe, mu bawuhimbaje hakaba harimwo n'abana bari mu mugwi w'imikangara y'Imana bari mu ntara z'ubutumwa zo mu gisagara ca Bujumbura, ari zo intara y'ubutumwa ya Gihosha, be n'iyitiriwe Mikaheli Mweranda. Abo bose bakaba bahuriye ku kirimba c'Umuvyayi Bikira Mariya kiri ku musozi Siyoni mu Gikungu, kugira ngo bigine uwo musi mukuru.

Mu kwigina uwo musi mukuru wa Epifaniya, ari wo w'ukumenyekana kw'Umukama Yezu Kristu, abo bana bari mu mugwi w'imikangara y'Imana yo mu gisagara ca Bujumbura bahereye ku nkuka y'imisa yatangujwe n'urugendo rweranda, aho paruwase imwe imwe yose mu zigize izo ntara z'ubutumwa za Gihosha na Mikaheli Mweranda na zo nyene zari zaserukiwe muri urwo rugendo.

Muri urwo rugendo nyene, abana b'imikangara y'Imana bakaba bagira imbere, hanyuma abasaseredoti bagakurikira, inyuma hakaba hari Umwepiskopi Mukuru wa Diyoseze Nkuru ya Bujumbura, Nyenicubahiro Musenyeri Gerevazi Banshimiyubusa, ari na we yarongoye iyo Nkuka ya misa.

Urugendo ruheza, imisa yarinjiye, maze umusaserdoti ahagarariye ico kirimba ca Bikira Mariya co ku musozi Siyoni mu Gikungu aba ari we ashikiriza ijambo ry'ikaze, araheza yakira abari aho, yongera aha n'ikaze Umwepiskopi ngo arongore ico gisabisho c'Inkuka y'imisa.

Ariko imbere y'uko abandanya n'imisa, Musenyeri Gerevazi Banshimiyubusa na we nyene yabanje gushikiriza ijambo, abanza kwakira imikangara y'Imana yari yahuriye aho. Ni na ho hamenyekana mu bana bari aho, abo paruwase zabarungitse nk'imikangara y'Imana.

Iyo mikangara yarahamagawe, paruwase kuri paruwase. Amaparuwase yari yaserukiwe n'iyo mikangara akaba ari aya Gihosha, Kamenge, Kivoga-Tenga, Kinama, Ngagara, Buterere, Maramvya, Gatumba, Katedrale Regina Mundi, sMikaheli Mweranda, Buyenzi, Nyakabiga, Mutima w'Ubwitonzi, Kinindo, Musaga, Kanyosha, Ruziba, n'izo mu bwibutsamana bw'abapolisi n'abasirikare.

Ahejeje kubakira, Umwepiskopi Mukuru yaciye abibutsa ko ukumenyekana kwa Yezu ari umuco uje uboneshereza amakungu yose. Yagiriyeko abibutsa ko uyu mwaka bahimbajemwo Epifaniya ari umwaka udasanzwe, kuko ngo ari umwaka wugurura imyaka itanu itegura yubile y'umwakaka y'imyaka 50 ubutumwa bw'imikangara y'Imana buzoba bumaze bushitse mu Burundi; ni ukuvuga ko iyo yubile izohimbazwa mu mwaka w'2025.

Musenyeri Gerevazi Banshimiyubusa yaribukije kandi n'ihangiro ry'ubwo butumwa, ko ritumirira abo abo bana ko bokwiyumva nk'abatumwa ba Yezu mu Burundi no kw'isi yose, kandi ko ari abagenzi ba Yezu. Vyongeye kandi ngo bategerezwa kumuronderera n'abandi bagenzi biwe.

Ahejeje kwakira abo bana, uwo Mwepiskopi Mukuru yaciye ayobora inkuka yimisa. Mu nsiguro yatanze, yagarutse ku nsiguro y'umusi mukuru wa Epifaniya, ko ari umusi mukuru w'imikangara y'Imana, umusi kandi uza umenyesha Yezu neza na neza ko ari umwe yari yavukiye mu bukene, akavukira ahantu hadasa neza, ariko uyu musi abami batunze, bafise vyose, bakaba baje kumuraba.

Musenyeri Gerevazi banshimiyubusa yasavye abari aho ko mu vyo babayemwo vyose, abo bamajusi bobabera akarorero. Ngo abo bamajusi bobabera akarorero mu kubona ko n'aho bari batunze, babona ko bafise vyose, batagumije amaso mu vy'isi, ahubwo ko baravye n'ivyo hejuru, ari na ho baciye babona Inyenyeri ibamenyesha Inkuru Nziza.

N'abari ngaho mu Gikungu rero, nk'abakritsu, ngo barakwiye kubafatirako akarorero mu kutagumiza amaso ku vy'isi, ariko n'ivyijuru bakavyitwararika, kugira ngo baharanire ubuhirwe budahera. Ngo barabaye kandi akarorero mu gushikanira babihimbariwe uwo Mwami w'abami yari yavukiye mu bukene, kandi bakamushikanira ivyo bazanye babikuye ku mutima, batiteze ivyo abasubiriza mu nkoko, kuko na we nyene yari yavukiye mu bukene.

Ngo barababereye kandi akarorero ko kuja baramenya guhinduka iyo bavuye gusenga. Kuko ngo abo bamajusi bamaze kuronka umuco, ngo baciye bahindukira, baheba guca mu nziza mbi yo kwa Herodi bari bazananyemwo mu ntango.

Kuba urugendo bagize rwari urugendo rwamurikiwe n'Inyenyeri iri kw'ijuru na ho, ariko iyo Nyenyeri ngo ikaba yaramurika ikibanza kiri kw'isi, maze ikabereka ko Imana iri kw'isi, ngo ni ikimenyetso c'uko Imana iguma ikeneye ko abantu bayibona aha nyene kw'isi. Ngo boheza bakayibona muri barya bantu bato bato, barya barenganywa, barya bafunzwe.

Uwo mwepiskopi akaba yasozereye agaruka ku butumwa bw'imikangara y'Imana, ko ari ubwo gufasha bana bagowe, bataramenya Kristu. Abo na bo ngo ngo bakaba babafasha mu buryo butatu: kugaburira abandi bana bagowe, batagira ikibagaburira; kubasabira ku bavyeyi babo ngo bagire ico babahaye bashira abo bana bagowe; no guca mu mihana ngo babegeranirize agafashanyo ko gufasha abo bana bagowe. Araheza atera akamo iyo mikangara ko yoja iragirira agasabisho abo bandi bana bagowe, bataramenya Yezu Kristu.

Mwomenya ko mu gihe c'ihereza, abana batatu baserukiye abandi, ikimenyetso cibutsa babamajusi batatu, Gasupari, Barutazaro na Melchior bashikanira akana Yezu. Inyuma y'aho, n'abandi bana bakaba baciye bashikana amashikanwa begeranije, aho buri paruwase yose yaserukirwa n'abana batutu bikoreye ibiseke. Inkuka y'imisa iheze, bakaba baciye baja kwishikana ku Muvyeyi Bikira Mariya, aho bagize urugendo bagana agasengero ka Bikira Mariya.

Bonté Divine Mugisha, ku bw'ibiro ndemeshabutumwa bw'ibikorwa vya Papa muri Dioseze Nkuru ya Bujumbura 

Ivyiyumviro

Rondera

Urutonde rw'Imisa