Mu muryango
w’abigeme b’Umugabekazi w’ikigongwe muri Afrika, mu mubano wo mu Kanyosha, ku
wa gatandatu igenekerezo rya 22 Nzero 2022, baririrwanye akanyamuneza k’ukubona
bungutse uwundi mubikira, Mama Mariya Josette Nininahazwe, yashikirije indagano
ziwe za mbere z’ukwihebera Imana zamwinjije muri uwo muryango.
Ibirori vyabereye mu nkuka y’imisa yaherejwe muri Paruwase Umuvyeyi w’Ikigongwe yo mu
Kanyosha, irongowe na Nyenicubahiro Musenyeri Evariste Ngoyagoye, Umwepiskopi
Mukuru w’inararibonye wa Diyoseze Nkuru ya Bujumbura, yaserukiye Umwepiskopi
Mukuru.
Kw’izina ry’Umukama,
umurezi w’abigeme b’Umugabekazi w’ikigongwe bo mu Kanyosha yarahamagaye uwo
yashikiriza indagano ziwe za mbere ati: «Novise Josette Nininahazwe», na we
aritaba, adugije ukuboko, ati: «Sabwe, Mukama, ndarengutse, kuko umpamagaye!»
Hanyuma aregera
imbere, arashikiriza icipfuzo ciwe, indagano ziwe za mbere, azishikiriza imbere
y’uwo Mwepiskopi: «Nipfuza guhereza ubuzima bwanje mu kwitangana urukundo,
mfasha abo bose babikeneye, na cane cane abantu bato bato nsanzwe nkunda mu
kwemera, nk’abana b’Imana». Araheza arashikirizwa ibimenyetso biranga umubikira
yinjiye muri uwo muryango, araronswa n’akazina k’uwihebeye Imana, Mama Mariya Josette
Nininahazwe.
Josette
Nininahazwe, umwana agira uwa gatandatu muri munani b’umushingantahe Honoré Bangirinama
n’umupfasoni Liberata Nzikobanyanka, izo ndagano z’ukwihebera Imana mu kuyihereza
ubuzima bwiwe ngo afashe abantu bato bato, uwo mutima ntabuze aho yawukuye,
kuko iyo Mana nyene ngo yamukuye mu bibazo vyinshi, haba mu buzima bwo mu
buhungiro aho yari mu gihugu ca Tanzaniya, canke mu bihe vy’indwara ziyoberanye
aho yari mw'inovisiya mu gihugu ca Republika iharanira Demokrasi ya Congo. Kumbe
aho hose ngo Imana yariko imutegura ngo azoshobore kuyibera umutumwa w’intayegayega.
Intahe yiwe
tuyishingirwa na se wiwe, aho atuyagira ukuntu umuhamagaro wahushijwe n’umuhungu
wiwe, wahavuye utoranwa n’uwo mukobwa wiwe, Mama Josette Nininahazwe: «[Uyu
mwana yaragize ingorane], ariko Imana yariko iramutegura. Uyu mwana yarahuye n’ibigeragezo
bidasanzwe, ku buryo kuba uyu musi ari ngaha, ari igitangaro Imana yamukoreye!».
Intahe idasanzwe
y’ubuzima bwa Mama Mariya Josette Nininahazwe
Josette
Nininahazwe, imvukira ya Diyoseze Nkuru ya Bujumbura, yavutse mu mwaka w’1992, muri
Paruwase Mutumba, ku mutumba wa Mubone. Ariko kubera ko yavutse mu bihe vy’intambara
igihugu c’Uburundi carimwo, yaciye ahungishirizwa mu gihugu ca Tanzaniya akiri
umwana muto cane. Aho mu buhungiro ngo bahamaze imyaka umunani. Ariko aho hose
ngo barakundishijwe Imana n’ishure. Ni na ho uwo mwana yatanguriye amashure y’intango,
kw’ishure rya Ruguhu, mw’ikambi y’impunzi y’i Mtabila.
Intambara
ihagaritswe, umuryango wiwe warahungutse, maze Josette Nininahazwe, amashure ayabandanyiriza
mu Gitaza, ayisumbuye na yo ayiga mu gisagara ca Bujumbura, mu Kanyosha, kw’ishure
ryisumbuye ryitwa «Complexe Scolaire de Kanyosha», ayarangiza mu mwaka wa 2015.
Ivyigwa vy’ukwitegurira ubuzima bw’ukwihebera Imana na vyo yabitanguriye i
Buyengero muri Diyoseze ya Bururi, mu mwaka w’2016.
Ikindi
kigeragezo yahuye na co ni ico mu gihe yari agiye kwinjira mw’inovisiya y’i
Bukavu, mu gihugu ca Republika iharanira Demokrasi ya Kongo, mu mwaka w’2019. Nk’uko
umuvyeyi wiwe yabandanije abimenyesha, aho i Bukavu, Novise Josette Nininahazwe
yaraharwariye indwara mu muryango babonye nk’akayoberabahinga. Se wiwe mbere
ayitazira «Négatif».
Ngo Novise Josette
Nininahazwe yaratashe imuhira, ariko mu muryango kubera ko ata kindi bari bafise
bakora, baramushize mu gisabisho, kumwe n’umuryango wa Paruwase, maze Umukama
aramutabara, arakira. N’ugutangara kwinshi, ngo barasubira baramurungika, bati:
«Genda, utubere ijisho ku Mana!» Kuva ico gihe ngo ntiyasubiye kurwara.
Mama Mariya Josette
Nininahazwe rero arihebeye Imana, mbere aranatoye n’icivugo azogendera mu
buzima bwiwe bwihevyi, ati: «Nta kinanira Imana». Ku bwiwe, ico civugo ngo
gikomoka ku kuntu umuntu usanga agenda ahura n’ibimugora, aduga yongera
amanuka. Ngo ni ho abonera neza ko vy’ukuri Umukama ari kumwe na we, n’ubwo aba
atarigera amubona n’amaso. Araheza aravuga n’uko yiyumva ku ntambwe ateye,
agira ati: «Mukama nuninahazwe, kuko unyeretse iciza muri kano kanya, ntari nzi
kuri jewe, kandi ntari niteze kubona!»
Uwo mubikira
mushasha rero, Mama Mariya Josette Nininahazwe, agiye gufashanya na bagenzi we gufasha
abafise ibibazo bitandukanye, nkuko ubutumwa bw’umuryango yihebereyemwo Imana
buri. Mwomenya ko uwo muryango w’abigeme b’Umugabekazi w’ikigongwe bo mu Kanyosha
yinjiriyemwo usanzwe ufasha abana bagendana ubumuga bo mu kigo «Isange» co mu Gisyo,
ivuriro ryitiriwe Rossello mweranda yatanguje uwo muryango, be n’ishure
ryitiriwe Umuvyeyi w’Ikigongwe ryo mu Kanyosha.
Michel
Nibitanga, CEDICOM
Aleluya. Kristu yarazutse; umuco wiwe waratuboneshereje, twebwe yacunguje atnaraso yiwe. Aleluya.
Ivyo dusoma mu Nkuru Nziza ya Yezu Kristu nk’uko yashikirijwe na Yohani (6, 52-59)
Muri irya misi,
Abayuda baja mu gaharira, bavuga bati: «Uwo ashobora ate kuduha umubiri
wiwe ngo tuwufungure?» Yezu arababwira rero ati: «Ni ukuri ni ukuri
ndabibabwiye: mudafunguye umubiri w’Umwana w’umuntu, ntimunywe n’amaraso yiwe,
nta buzima muzogira. Uwufungura umubiri wanje akanywa n’amaraso yanje, arafise
ubuzima budahera. Nanje rero nzomuzura ku musi w’imperuka. Na none umubiri
wanje ni imfungurwa y’ukuri, amaraso yanje na yo ni inyobwa y’ukuri. Uwufungura
umubiri wanje akanywa n’amaraso yanje, aba muri jewe, nanje nkaba muri we.
Nk’uko Data Nyenubuzima yantumye ari we ambeshaho, ni ko n’uwumfunguye ndamuha
ubuzima. Uyo rero ni wo mukate wamanutse uva mw’ijuru. Ntumeze nk’umwe basokuru
banyu bafunguye, hanyuma bagapfa. Uwuzofungura uyo mukate azoramba mu myaka
yose.»
Ivyo Yezu yabivuze yigishiriza mw’isinagoga i Kafaranawumi. Â