Abari batumiwe ngo baze kwumviriza no kwunganira ico cegeranyo baramenyesheje ko banezerejwe n’uko ivyashikirijwe n’umusaserdoti yari arongoye abakoze icegeranyo bakoranye ubwizigirwa, kuko ngo nk’ivyiyumviro bari bashikirije yavyumvisemwo; ukuvyunganira rero bikaba vyagiriwe mu bikorwa vyo mu migwi

Umwepiskopi Mukuru wa Diyoseze Nkuru ya Bujumbura, Nyenicubahiro Musenyeri Gerevazi Banshimiyubusa, yarakoranije mw'ihwaniro ry'imisi ibiri abaserukira abandi mu bagize umuryango wa Diyoseze, ku wa kabiri no ku wa gatatu ku magenekerezo ya 19 na 20 Ndamukiza 2022.

Iryo hwaniro ryo ku rwego rwa Diyoseze ryabereye mu nyubakwa y'amahwaniro iri ku musozi Siyoni mu Gikungu mu kigo c'ababikira. Ryari iry'ukwihweza  n'ukwunganira icegeranyo c'ivyiyumviro vyatororokanijwe mu bakristu bo mu maparuwase agize iyo Diyoseze no mu gihugu c'Imana muri rusangi, mu ntumbero ugutegura inama nsangizangendo igira iya 16 y'Abepiskopi bo kw'isi yose izobera i Roma mu mwaka w'2023 wimirije.

Iyo nama yatumiwemwo abaserukira abandi mu mibano y'abasaserdoti n'abihebeye Imana, eka mbere n'abalayike baserukiye imigwi itandukanye igize umuryango wa Diyoseze. Ikaba ari inama isanzwe itegekanijwe muri rwa rukurikirane rw'ibikorwa bitegura iyo nama nsangizangendo y'Abepiskopi bo kw'isi yose izobera i Roma.

Nyenicubahiro Musenyeri Gerevazi Banshimiyubusa, mu kwugurura icese no mu guhagararira ibikorwa vy'iryo hwaniro, yabanje kumenyesha abaritumiwemwo ko igikorwa cabo atari ic'ugukosora ibiri muri ico cegeranyo, ahubwo ko ari ukuvyumviriza, nk'uko vyagira bishikirizwe n'umusaserdoti yashizwe ubutumwa bw'ugutororokanya ivyiyumviro vy'igihugu c'Imana, be n'ukuzirikana ico Mutima w'Imana yobongorera ngo bavyunganire, gutyo ngo bizorungikwe ku rwego rw'igihugu ririmwo ibishobora kuba ishimikiro ry'ivyubaka koko Ekleziya-muryango.

Na we Patiri Dieudonné Niyibizi, asanzwe ari na we yari ayoboye umugwi w'abakoze ico cegeranyo, ni weyashikirije ivyari bikigize. Yabanje kuvuga imigwi itandukanye y'igihugu c'Imana co muri Diyoseze Nkuru ya Bujumbura yashikirije ivyiyumviro vyayo ku kuntu abantu bo muri iyo Diyoseze bagenda bagana Kristu bongera bajana hagati yabo.

Yagize ati: «Murumva ko ubwo buryo bakozemwo be n’ukwo kuntu bagiye barahura  ko bituma dutegera ko vy’ukuri ugusangira urugendo kwabaye muri iyo migwi yose.» Araheza amenyesha ko ivyegeranyo vy’imigwi yashikirije ivyiyumviro vyayo bishika kwuri 155, harimwo n’ivyatanzwe n’abarongoye amashengero 8, be n’abantu 10 bashikirije ivyiyumviro vyabo babicishije ku muhora ngurukanabumenyi wari watanzwe n’uwo musaserdoti.

Uwo musaserdoti ariko akaba yamenyesheje ko bigoye kumenya igitigiri nyezina c’abitavye isangizangendo, kuko ngo umugwi wakoze icegeranyo wakoreye ku bindi vyegeranyo vy’imigwi itandukanye igize umuryango wa Diyoseze, be n’iy’abo muri yandi madini 8 atari gushobora kumenya abakoranye uko bangana. «Igikuru ni uko twicaranye, si uko twakoze icegeranyo canditswe uku canke kuriya», ni kwo yavuze.

Patiri Dieudonné Niyibizi yaramenyesheje kandi n'abari bagize umugwi wakoze ico cegeranyo, be n'uburyo bakozemwo ivyo bari basabwe uko bwari bumeze. Yavuze ko impfunyapfunyo y’ico cegeranyo yakozwe n’abantu 11 bagizwe n’abapfasoni 5 be n’abashingantahe 6, harimwo abihebeye Imana, abalayike, be n’uwo musaserdoti nyene yari abayoboye.

Ngo bamaze imisi hafi 20 bariko baregeranya ivyo igihugu c’Imana co muri Diyoseze cabashikirije, babisoma ngo barabe ico Mutima-Mweranda yabwiye ico gihugu c’Imana, bongera babishira mu nyandiko yo mu rurimi rw’igifaransa.

Abatumiwe muri iryo hwaniro, imbere y'uko binjira mu gikorwa nyezina c’ukwihweza n’ukwunganira icegeranyo cakozwe n'uwo mugwi, baragize ico bavuga ku bimaze kuranguka. Mu bagize ico bashikirije harimwo Patiri Félix Fupi, Patiri mukuru wa Paruwase Katedrale Regina Mundi. Yatanguye ashimira uwo mugwi w’abantu 11 ku gikorwa wakoze, ku bwiwe abona ko kitari coroshe.

Yabandanyije avuga ko anezerewe n’uko yumvirije ivyashikirijwe n’uwo musaserdoti yari arongoye abakoze icegeranyo, Patiri Félix Fupi abona ko uwo mugwi wakoranye ubwizigirwa, kuko ngo nk’ivyiyumviro umugwi yarimwo washikirije yavyumvisemwo. Ariko kandi ngo yaboneyeho n’ukuhamenyera n’ibindi vyiyumviro vyinshi vyubaka Ekleziya-Muryango wewe atari yashoboye gushoka yiyumvira, ariko akaba yasanze abandi barabivuze, ico wewe yise akunguko mu vy’ugushikiriza ivyiyumviro. Yarashimye kandi n’uko igihugu c’Imana kitavuze ibimeze neza gusa, ariko ko cubahutse no kudoma urutoki no ku vyokosorwa.

Tubibutse ko iyo nama nsangizangendo igira iya 16 y'Abepiskopi i Roma, ukwo kuntu iriko irategurwa ari ko vyasabwe na Nyenubweranda Papa Fransisko, aho mu mwaka uheze w'2021 yahamagariye abakristu bose kuja hamwe n'abungere babo ngo bafashanye kuyitegura, kugira ngo basangizanye ingene bogenda bagana Kristu bongera bagendana hagati yabo (synode sur la synodalité).

Iciyumviro ngenderwako c’iyo nama nsangizangendo y’Abepiskopi kigira kiti: «Kugira ngo habe Ekleziya irangwa n'ukuja inama nsangizangendo: Isangiramutima, ukugira uruhara mu muryango n'ubutumwa». Intumbero y'iyo nama ikaba ari iy'ukwihweza ukuntu Ekleziya igenda nk'umuryango, be n'ukuntu ukwo kujana kwiserura mu buzima mu bantu bose, aba-Katolika n'abatari aba-Katolika.

Muri Diyoseze Nkuru ya Bujumbura, integuro y'iyo nama yatanguye muri Gitugutu 2021, ivyiyumviro bitororokanywa mu ntango z'umwaka w'2022. Umugwi wakoze icegeranyo wakoranye kuva mu gice ca kabiri c'ukwezi kwa Ruhuhuma, uhabwa ukwezi kumwe.

Ubu rero ivyiyumviro vyatororokanijwe bikongera bigapfunyapfunywa ni vyo biriko bishikirizwa abaserukira abandi muri Diyoseze, ngo birungikwe ku rwego rw'igihugu vyihwejwe neza, vyanunganiwe.

Mu nyuma hazokirikira ivyo ku rwego rw'umugabane, maze ibikorwa nyezina vy'inama nsangizangendo y'Abepiskopi igira iya 16 bizoshikirizwe muri iyo nama nsangizangendo  nkurup izosasa izosasa muri Gitugutu 2023, i Roma, kuko Papa Fransisko atashatse ko iyo nama iba iy'Abepiskopi gusa, ahubwo iy'igihugu c'Imana cose.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga