Ni mu ntumbero y’ukwifatanya n’abakristu b’i Lyon Ekleziya y’i Burundi yatunganije iyo ndwi ngo bigine uwo mwigeme yagira aterwe iteka ry’ugushirwa mu mugwi w’abahimbazwa kuko ari we yatanguje igikorwa ca Papa co gukwiza hose Inkuru Nziza

Ku wa Gatandatu igenekerezo rya 21 Rusama 2022 ni ho hasozerwa indwi yahariwe inyigisho n’ugusenga ku bw’umwigeme Paulina Maria Jaricot bwaca aterwa iteka na Ekleziya ry’ukumushira mu mugwi w’abahimbazwa. Ibikorwa vyo muri iyo ndwi bikaba vyabereye ku musozi Siyoni wo mu Gikungu.

Umwigeme Paulina Maria Jaricot, ari na we yatanguje igikorwa ca Papa co gukwiza hose Inkuru Nziza, ku w’Imana igenekerezo rya 23 Rusama 2022 ni ho yashizwe mu murwi w’abahimbazwa, mu birori vyabereye mu gihugu c’ubufaransa, mu gisagara ca Lyon.

Ni muri iyo ntumbero y’ukwifatanya n’abakristu b’i Lyon Ekleziya y’i Burundi yatunganije iyo ndwi yahariwe inyigisho n’ugusenga ku bw’uwo mwigeme yagira aterwe iteka ry’ugushirwa mu mugwi w’abahimbazwa.

Iyo ndwi yari yatanguye ku musi wa mbere igenekerezo rya 16 Rusama 2022, kuva ku gihe c’isaha icumi na zibiri n’igice (18h30), ku nyigisho zama zitanguzwa n’igisabisho c’ukuninahaza Imana be n’ic’ishapule y’abamisiyonari.

Umusi wose wari ufise icivugo cawo, ariko vyose bikaba vyavuga kuri Paulina Mariya Jaricot kandi kuva ku musi wa mbere gushika ku munsi wa gatandatu inyigisho yaza yuzuza iy’ubwa mbere.

Inyigisho zatanzwe muri iyo ndwi zose hamwe zari zishimikiye ku buzima bwa Mariya Paulina Jaricot kuva akivuka gushika yiyumvemwo umuhamagaro wo kumenyesha Inkuru Nziza, ku muhamagaro w’uwo mwigeme, be no ku gikorwa ca Papa co gukwiza hose ukwemera.

Izo nyigisho kandi zarashimikiye no ku buzima nderamutima bw’umwigeme Paulina Mariya Jaricot, ku vyamwa vy’umuhamagaro wiwe, kuri Paulina Mariya Jaricot nk’umwigema w’Ekleziya, be no ku nyota y’ugukwiza hose urukundo rw’Imana  nk’igikorwa ngobwa ca Paulina Mariya Jaricot.

Umwe mu bakristu bakurikiranye izo nyigisho yaratwiganiye ico yungutse muri iyo ndwi. Yavuze ko kimwe mu vyamukoze ku mutima ari ukuntu uwo mwigeme Paulina Mariya Jaricot.

Ku bw’uwo mukristu, ngo n’ubwo umwigeme Paulina Mariya Jaricot yavuka mu muryango ukize, atabiravye, ko ahubwo yemeye guca bugufi, agakena, akemera guheba vyose ngo yihebere Yezu mu vyiza yakoze vyo gukunda abandi, kumwe n’umutima w’ikigongwe yari afise. Uwo mukristu akaba adakekeranya ko ivyo ari vyo vyatumye uwo mwigeme aja mu mugwi w’abahimbazwa.

Bonté Divine Mugisha, OPM-Bujumbura

Ivyiyumviro

Rondera

Urutonde rw'Imisa

Mwoba mufise ico mubaza?

Tanga