Umushingantahe Philippe Nzobonariba ni umwe mu bacikacumu yashinze intahe ku kuntu yahatswe akatari gake kwicwa, intahe yiwe ikaba yari ishingiye ahanini ku wo atazibagira kuko yamurokora kandi batari basangiye ubwoko, hari mu mwaka w’1974

Paruwase yitiriwe abamaratiri b'i Buganda yo mu Gasura, inyuma ya Paruwase za Kivoga na Muramvya mu gikorwa c’ukwubaka ikibano ciza biciye mu kwibuka no gusabira abahitanywe n’indyane n’intambara Uburundi bwaciyemwo kuva bwikukiye, abakristu bo muri iyo Paruwase, ku w’Imana igenekerezo rya 26 Ruheshi 2022, na bo nyene barafashe akanya ko kwibuka no gusabira mu Nkuka y’imisa ababo bagandaguwe bo ku mitumba itandukanye yo mu gace iyo Paruwase ishikanako imbibe.

Uwo musi wahimbajwe ku busabe bw’abakristu bo muri iyo Paruwase yo mu gasura, babicishije kuri Patiri mukuru wabo, inkuka y’imisa be n’iyindi migirwa yayiherekeje bikaba vyari bihagarariwe na Musenyeri Anatole Ruberinyange, afadikanije n’abasaserdoti barangurira ubutumwa mu gisata ca Diyoseze kijejwe ubutungane n’amahoro, CDJP-Bujumbura.

Mu batumire harimwo kandi n’Umunyamabanga w’ico gisata mu nama y’Abepiskopi Katolika b’i Burundi, Patiri Charles Karorero, kumwe n’umushingantahe Philippe Nzobonariba, imvukira y’iyo Paruwase akaba n’umwe mu bacikacumu bo mu Gasura, be na Aimé-Pascal Nduwimana, umuprotestanti na we nyene w’imvukira y’iyo zone, ayoboye ishirahamwe ryiwa MAC ry’ukubabarana, «Ministère Africaine de la Compassion» mu gifaransa.

Indirimbo zuzuye impanuro nyinshi, ivyese n’utundi dukino birimwo amajambo y’ubutumwa bw’ukurekuriranira n’ugusubiza hamwe ni zo zaranga ihimbazwa ry’uwo musi, zishikirijwe n’imboneza z’amahoro zigizwe n’abakristu bo muri iyo Paruwase na zone ya Gasura, inyuma y’inkuka y’ugusabira ababo. Baririmba bati: «Nimube abanyakigongwe, nk’uko So wanyu wo mw’ijuru ari Umunyakigongwe!»

Umunyamabanga w’igisata CDJP-Bujumbura, Patiri Anicet Shumbusho, mw’ijambo yashikirije, ni we yamenyesheje ko uwo musi watunganijwe ku busabe bw’abanya-Gasura ubwabo. Yavuze ko Patiri mukuru wa Paruwase Gasura, kuva hahimbajwe umusi nk’uwo muri Paruwase ya Kivoga, mu nyuma na ho ugahimbazwa muri Paruwase ya Muramvya, yagumanye inyota, kandi iyo nyota yarayivuze, ko iyo Paruwase yagumye ifise inyota yo guhimbaza na yo umusi nk’uwo, kugira ngo abanya Gasura baronke na bo akaryo ko gusabira ababo.

Patiri Anicet Shumbusho yagiriyeko amenyesha n’icivugo abakristu bo nyene bishingiye. Yagize ati: «Iki civugo ngo "Twibuke, dusabire abahitanywe n’intambara, turengere ivyatubabaje, turekurire abatugiriye nabi, kugira ngo twubake ikibano ciza", ni icivugo catorewe hano.» Araheza amenyesha ko mu gisata c’Ubutungane n’Amahoro bobo baje baherekeza paruwase, ariko iba ari yo ivyitunganyiriza.

Ubwo busabe bwaremejwe kandi na Patiri mukuru wa Paruwase Gasura, Patiri Pierre Claver Ntahondereye, mbere akaba yaranagiriyeko amenyesha n’ico ico ciyumviro cavuyeko. Yavuze ko icatumye biyumvira uwo musi ari uko ngaho muri zone gasura haciye indyane nyinshi guhera Uburundi bucikukira, mbere n’ubu ngo amatati akaba akiriho. Ngo harapfuye abantu besnhi cane. Yamenyesheje ko abasabiwe ari abahisi bashika ku 1025. Ngo ni abo amazina yabo yashoboye kumenyekana, kuko ngo hari n’iyindi miryango itashimye kumenyesha abayo, kubera ko yoyo itarakira igikomere.

Ku mitumba itandatu na yo igize iyo zone Gasura, uwo musaserdoti, afatiye hamwe iyasinzikajwe n’urwimo rwo mu myaka ya za 1972 be n’iyahungabanijwe n’intambara n’ubwicanyi bw’ihorihori bwabaye mu myaka ya za 1993, yamenyesheje ko imitumba yasinzikaye cane ari itatu, benshi mu bishwe bakaba ngo bazize ihorihori rivuye ku bari barabuze ababo mu mwaka w’1972 bataye ishavu ku bo mu bwoko bagiriza ko ari bwo bwabiciye. Kuri iyo mitumba, abatapfuye ngo barataye baromoka, barahunga. Mu guhamagarira ababuze kugira umutima wuzuye ikigongwe nk’uwa Yezu, akaba yagiriyeko ahoza ababuze.

Mu gihe na ho urwo rubanza ruhuriranye n’uko muri iyo Paruwase basanzwe bafise umugambi w’ukwubaka ingoro nshasha yagutse y’Imana, kuko iyo Paruwase ikiri nshasha, uwo musaserdoti yavuze ko bagiye n’inama nshingwabutumwa bagasanga batokwihutira kwubaka isengero igizwe n’impome batabanje kwubaka iy’imitima. Kukaba nka ko ngo ananya-gasura batari bake barasanzaye: uri abahunze, uri n’abari mu Gasura ariko bakomeretse, bakomerekejwe na bagenzi babo kandi bari abakristu, hatibagiwe n’abagiriye nabi abandi, ubu na bo bagumanye igikomere, kuko bakeneye kubohoka.

Haranashinzwe n’intahe za bamwe mu bacikacumu, nka Philippe Nzobonariba. Yabanje kuvuga ukuntu yahatswe kwicwa kane kose, Imana ikamurokora. Intahe yiwe ariko yari ishingiye ahanini ku gihe yarokorwa n’uwo batari basangiye ubwoko. Aribuka mu mwaka w’1974 (aho icuka kibi ngo cari camaze kuza), ngo yari ahejeje umwaka w’12 w’amashure yisumbuye, maze umusi umwe ngo aja abona abantu bamusumiriye, bakamunyuruza, bakamujana i Mbuye kumupfungirayo.

Umutama yitwa Bigumaguma, umucamanza, yahora aza akamara ngaho indwi yose aje gushikiriza imaza, ngo ni we yabonye apfunzwe, maze akamurekuza, kuko ngo atumva icamuzanye aho, ubona ko ngo yari azinanye cane n’abavyeyi biwe. Mbere ngo yaranamutekereye n’agafaranga yahavuye yifashisha mu kubandanya kwiga. Ubu Philippe Nzobonariba ngo afitaniye imigenderanire myiza n’abasigwa b’uwo mutama.

Mu ntahe yiwe aheraheza agira ati: «Murumva rero ko nk’uwo ari inkingi y’ubuntu. Ivyo iri mu vyantumvye bingora kuvuga ngo "buriya bwoko ni bubi".» Ku bwiwe ngo umuntu aba mubi ku gatwe kiwe, kuko nk’uwaramutse akora ikibi adatinya kujaniranya na mwenewabo, mu gihe akimubujije.

Ku boba bibaza ko igikorwa nk’ico c’ukwibuka n’ugusabira abahitanywe n’izo ndyane ari ukuzura akaboze, Musenyeri Anatole Ruberinyange yarasiguye ahubwo igituma ari ica nkenerwa. Yagize ati: «Dushaka kwubaka ikibano ciza, umuvukano; twibuke ivyabaye, turekurire abatugiriye nabi, abafise ibikomere bitandukanye tubakande bakire, hanyuma dushire imbere ikibano ciza!»

Mbere Musenyeri Anatole Ruberinyange yaranasavye ko bene ico gikorwa ngo cari gikwiye ahubwo gushigikirwa na bose, ata n’umwe avuyemwo, abantu bakibuka barondera kwiyubaka no gusangira inzira y’iterambere ahandi ho ngo utwo twigoro twohava tuba imfagusa.

Iyo nsiguro yaranashigikiwe n’uwuyoboye ishirahamwe MAC ry’ukubabarana, umushingantahe Aimé-Pascal Nduwimana, umukristu w'umuprotestanti. Nk’imvukira yo mu Gasura, yarakengurutse ico gikorwa caranguwe na Ekleziya Katolika muri zone avukamwo, yongera aratekerera abari aho impanuro. Yaremeje ko ibikorwa nk’ivyo vy’ukwibuka amabi yabaye muri kahise bifise ico vyofasha urunganwe rw’ubu n’uruzoza.

Ku bwiwe ngo n’ubwo ubwo butumwa butangwa n’Ekleziya wogira ngo buriko bubwirwa abamaze imyaka myinshi cane, ariko ngo mu vy’ukuri buranakenewe n’abacaruka, batazi ivyabaye, batabonye intambara. Ati: «Ni ngombwa ko tubasomeza inkongoro y’amahoro, y’ukwumvikana, y’urukundo!»

Mwomenya ko mw’ihimbazwa ry’uwo musi hanamenyeshejwe ko no mu gisata CEJP kijejwe ubutungane n’amahoro mu Nama y’Abepiskopi Katolika b’i Burundi, umusi nk’uwo uzotunganywa no ku rwego rw’igihugu, kuko ngo baterwa intege n’imboneza z’amahoro zimaze gutera iyo ntambwe y’ukurekuriranira ziyemeje gufasha n’abandi mu kububahura ngo na bo batere intambwe y’ugukira ku mutima.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga