Mu gihe uwo musi mukuru wari kandi uw’ugusabira Nyenubweranda Papa, umusubirizi w’umutumwa Petero, iyo ntumwa ya papa mu Burundi yabanje kwibutsa amakuba abatumwa Petero na Paulo baciyemwo, be n’ukuntu Ekleziya ya mbere yo mu gihe cabo yaja irabasabira

Umusi mukuru wa Petero na paulo Beranda abatumwa n’inkingi z’Ekleziya uw’ugusabira Nyenubweranda Papa warahimbajwe muri uyu mwaka w’2022 nk’uko vyama buri mwaka. Muri Diyoseze Nkuru ya Bujumbura, uwo musi mukuru wahimbajwe ku wa Gatatu igenekerezo rya 29 Ruheshi mu maparuwase, na ho ku rwego rwa Diyoseze uhimbazwa bukeye bwaho ku wa Kane igenekerezo rya 30 Ruheshi, nk’uko vyari vyasabwe n’Umwepiskopi Mukuru w’iyo Diyoseze, abigiye inama n’intumwa ya papa mu Burundi.

Ku rwego rwa Diyoseze Nkuru ya Bujumbura, uwo musi mukuru wahirimbajwe mu gisabisho c’inkuka y’imisa caherejwe kw’isengero ya paruwase-mvyeyi y’iyo Diyoseze, paruwase Katedrale Regina Mundi, ku gihe c’isaha icumi n’imwe n’igice (17h30), kirongowe n’iyo ntumwa ya Papa mu Burundi, Nyenicubahiro Musenyeri Dieudonné Datonou.

Ico gisabisho caherejwe mu bumwe bw’umuryango wa Diyoseze wari waje gushigikira abungere bawo, abepiskopi bakuru b’iyo Diyoseze, ari bo uwusanzwe ari uwuyiramutswa, Nyenicubahiro Musenyeri Gerevazi Banshimiyubusa, be n’uw’inararibonye, Nyenicubahiro Musenyeri Evariste Ngoyagoye. Cari citabiriwe n’abakristu isinzi, baba abasaserdoti, abihebeye Imana n’abalayike.

Mw’ijambo ry’ikaze ryashikirijwe na Nyenicubahiro Musenyeri Gerevazi Banshimiyubusa,  amaze kwibutsa abari aho ko baje kwiheka kuri abo batumwa n’inkingi z’Ekleziya, Petero na paulo Beranda, ngo bashikirize ibisabisho vyabo vy’ugusabira umusubirizi wabo na Ekleziya yose yaragijwe, yaboneyeho kumenyesha ko haja kubaho n’umugirwa w’igisabisho c’umuhezagiro wa indurjensiya, cashikirijwe n’iyo ntumwa ya Papa nyene.

Insiguro y’uwo musi mukuru n’ico wigisha abakristu yatanzwe n’uwo yari ayoboye inkuka y’imisa. Nyenicubahiro Musenyeri Dieudonné Datonou yavuze ko uguhimbaza umusi mukuru wa Petero na Paulo Beranda, abatumwa, biha akaryo abakristu Katolika ko gutangarira ubutwari bwabaranze mu gushingira intahe Kristu badatinya amakuba baja baracamwo, gushika n’aho baseserwa amaraso yabo ku bwa Kristu no ku bw’ukumenyekanisha inkuru nziza y’urukiza rw’Imana. Ngo ni n’akaryo kandi k’ugusabira mu buryo bw’umwihariko umusubirizi w’izo nkingi z’Ekleziya, ari we Papa, be n’igihugu ceranda c’Imana yaragijwe.

Yibutsa ko abo batumwa baciye mu bitoroshe, ariko aho hose bakaja baratabarwa n’ijuru, kuko nka Simoni Petero yari yararaganiwe ngo: «Ndabikubariye, uri Petero, no kuri iryo buye nzokwubakako Ekleziya yanje, n’ingabo za shetani ntizizoyisenyura», yaribukije ubuzima bugoye abo batumwa baciyemwo, be n’uko aho hose baja baraherekezwa n’igisabisho c’abemera, Ekleziya ya mbere y’abatumwa, n’ubwo ngo vyarangiye bishwe, bagapfira Umukama.

Petero ngo yagiye arakubitwa n’abari abakuru, mbere no gupfungwa agapfungwa ku kadenderezo, ariko ngo ntiyacika inkokora. Eka n’umutumwa Paulo ngo yarashira ubuzima bwiwe mu kaga akatari gake, mu ngendo z’ubutumwa yaja arafata. Uri aho yahakwa kuzama mu mazi agiye kumenyesha Inkuru Nziza mu ma Ekleziya yo mu ntara zo hakurya y’ibahari, uri n’aho yahakwa kugwa mu minwe y’abagizi ba nabi mu nzira yo mu bugaragwa. Aho hose abo batumwa ngo ntibahengeshanije gushingira intahe Kristu badatinya, bashigikiwe n’igisabisho, gushika ku munota wabo wa nyuma.

Iyo ntumwa ya Papa mu Burundi rero, n’ukwizera kwinshi yerekanye, yaravuze ko ivyashikiye abo batumwa, ata wokekeranya ko n’Ekleziya y’ubu bija birayishikira: ngo abungere bayo barahamwa akatari gake, mbere n’intama baragijwe zigahungabanywa.

Araheza agararagaza umwizero wiwe ati: «Nimba abatumwa n’abandi bungere b’Ekleziya bagiye barashobora kumenyesha Inkuru Nziza y’urukiza rw’Imana uko ibihe vyagiye birakurikirana, si uko batabuze ibibagora bagiye baracamwo; ahubwo ni uko bahabwa ubukomezi n’uwabatumye, We atananirwa». Yarongeye ati: «Si petero gusa umumalayika w’Imana yabohoye mw’ibohero ngo abandanye amenyesha Inkuru nziza, ahubwo ni Ekleziya yose yagiye iratabarwa n’ijuru, mu myaka n’imyaka.»

Abakristu b’i Bujumbura, nk’uko bari bahejeje kubisabwa na Nyenicubahiro Musenyeri Dieudonné Datonou, barashikirije igisabisho cabo mu mwanya w’ibisabisho rusangi. Kuri Nyenbweranda Papa Fransisko, baramusabiye ko amagara yiwe yosubira gukomera, ngo ashobore kubandanya ingendo z’ubutumwa. Barasabiye n’abahevye ivyabo bose ngo baje gukora mu murima w’Umukama, ngo Imana ibakomeze mw’ibanga yabatoreye. Intara zose z’isi bazisabiye amahoro, abakuru bazo na bo babasabira kwama mu ngingo bafata babanza kwihweza ko zizanira Imana ininahazwa.

Tubamenyeshe ko ihimbazwa ry’uwo musi mukuru wa Petero na Paulo, abatumwa n’inkingi z’Ekleziya, ari umusi mukuru umaze imyaka myinshi cane uhimbazwa, kuva mu kinjana ca kane. Ihimbazwa ryawo muri uyu mwaka w’2022 MURI Diyoseze Nkuru ya Bujumbura rikaba ryabaye ku butumire bw’Umwepiskopi wayo, agiye inama n’intumwa ya Papa mu Burundi.

Michel Nibitanga, CEDICOM

Ivyiyumviro

Rondera

Urutonde rw'Imisa

Mwoba mufise ico mubaza?

Tanga