Nyenicubahiro Musenyeri Gerevazi, aho yariko yatira abasaserdoti 11 bashasha muri Paruwase Musaga, yaribukije ukuntu abakristu baguma bamusaba ku bwinshi gushinga paruwase nshasha iwabo, ivyo na vyo ngo bikaba bisaba ko haboneka abasaserdoti benshi, mu gihe Ekleziya y'i Bujumbura ikibakenye

Akanyamuneza kari kose ku bakristu bo muri Diyoseze Nkuru ya Bujumbura, ku wa Gatandatu igenekerezo rya 9 Mukakaro 2022, aho Nyenicubahiro Musenyeri Gerevazi Banshimiyubusa, Umwepiskopi Mukuru w’iyo Diyoseze, yari aramutse yatira ku rwego rwa Diyoseze abasaserdoti 11 bashasha, mu nkuka y'imisa yabereye muri paruwase yitiriwe Anna Mweranda, mu kigo c’abapatiri b’Abadominikano kiri muri karitiye Kinanira-IV.

Mu kwigina abo basaserdoti bashasha ni na ho uwo Mwepiskopi yaheza akamenyesha ko ukwunguka abasaserdoti bashasha muri iyo Diyoseze bizofasha gushika ku gitigiri c’amaparuwase 50 cipfuzwa. Muri ivyo birori, uwo Mwepiskopi yaratiye kandi n’abadiyakoni 11 bashasha, yongera aratanga n’ibice vy’ubusomyi n’ubuhereji bugana ubusaserdoti-busuku ku baseminari bari bashikiriye iyo ntambwe.

Abasaserdoti ba Diyoseze be n’abamisiyonari barangurira ubutumwa muri iyo Diyoseze bari bahashitse ku bwinshi kuza kwifatanya n’abavyeyi n’imiryango y’abo bari baramutse batirwa muri ayo mabanga. Eka mbere n’abihebeye Imana n’abakristu basanzwe bari baje ku bwinshi kubashigikira.

Inyigisho y'Umwepiskopi Mukuru yashimikiye kuri iri jambo ngo: «Ivyimburwa ni vyinshi, yamara abakozi ni bake; sabe rero nyen'umurima  arungike abakozi benshi mu vyimburwa vyiwe.» Umwepiskopi yatanguye  amenyesha ko inkomoko y'ubusaserdoti iva ku mpuhwe Imana ifitiye abantu.

Yagize ati: «Umwungere mwiza yarihweje intama zitagira umwungere, zirushe kandi zijonjogoye.» Yarongeye ati: «Umusaserdoti aza nk'inyishu kuri izo mpuhwe z'Imana, ivyo rero bigaca bituma aronka ubutumwa budasanzwe kuri bamwe n'abandi, kugira ngo igihugu c'Imana kibandanye gitunganyirizwa nk'uko Imana ibishaka.»

Yasozereye ahamagarira igihugu c’Imana cari aho gusenga basaba abasaderdoti, kuko ngo Nyen’ivyimburwa ari we amenya abakozi bakenewe, kandi babereye ico gikorwa.

Mu wundi mwanya w’ibirori ni ho Nyenicubahiro Musenyeri Gerevazi Banshimiyubusa yaheza agashikiriza icipfuzo ciwe, ko ari ic’ukubona Diyoseze arongoye ishitse ku gitigiri c’amaparuwase 50 akenewe, bivanye n’ubwinshi bw’abasaba ko Paruwase zokwongerezwa.

Yamenyesheje ko hakenewe amaparuwase menshi, kanatsinda ngo aho aca hose baguma bamusaba paruwase. Yasavye abari aho kugenda mu bakristu kurondera aboba abasaserdoti, kugira ngo haboneke benshi kandi beranda, kuko ngo Ekleziya iracabakenye. Yagize ati: «N'imiburiburi habe paruwase 50 muri Diyoseze yose ya Bujumbura.»

Na we uwaserukiye abatiwe mu busaserdoti, Patiri Dieudonné Bizimungu, imvukira yo muri Paruwase Musaga, yarakengurukiye Imana yabateye iryo teka ridasanzwe ryo kubatora mu bandi, yongera arakengurukira n’Umwepiskopi Mukuru yababaye hafi, akabitwararika muri vyose, be n’abasaserdoti bakuru babo bababereye akarorero keza bakongera bakabafasha mu vyo bari bakeneye vyose.

Yarakengurutse kandi ibikorwa vyo mu biro kwa Papa bisabira abari mu nzira y'itorwa. Yarashimiye kandi n’abavyeyi babo babibarutse bakongera bakabafata mu mugongo, bakanabasabira. Eka n'abakristu bagize ico baterera bose yarabashimiye, umwe wese ku ntererano yiwe.

Irindi jambo ryashikirijwe ni iry’umuvyeyi yaserukiye abandi. Yarakeje cane Ekleziya ku ngabire yari ihejeje kuronka kuri uyo musi. Yarakengurukiye Imana ku vyo yakoze vyose, akengurukira n’Umwepiskopi ku buvyeyi bwiwe bwashigikiye abana babo. Abavyeyi na bo bagenzi biwe yarabakengurukiye ku ndero runtu na rukristu bahaye abana babo. Na Leta yarayishimiye ku kuntu ishigikira Ekleziya Katolika.

Uwo muvyeyi yasozereye ijambo ryiwe yipfuriza amagara meza abo basaserdoti bashasha bakomere kw'ibanga ibashinze, gukurikirwa no kuremeshwa n’ababakurira muri iryo banga. Ariko kandi yaranasavye na Leta ngo ibashigikire mu kubaha umwidegemvyo mu butumwa bashinzwe.

Umusaserdoti yaserukiye abapatiri bera b’abamisiyonari ba Afrika na we, mw’ijambo yashikirije yarashimiye cane Imana kubona baronse umusaserdoti mushasha mu muryango wabo. Yarakengurukiye Umwepiskopi Mukuru ku nyigisho yatanze mu nkuka ya misa, mbere aca ashikiriza n’igisabo ciwe c’uko iyo nyigisho yohanahanwa ku mbuga ngurukanabumenyi ngo abakristu baje barayizirikanako kenshi. Uwundi yakengurukiye ni Patiri Mukuru wa Paroisse Anna Mweranda ku kuntu yafashe mu mugongo patiri mushasha Landry mu muhamagaro wiwe.

Mu gihe Umwepiskopi Mukuru wa Diyoseze Nkuru ya Bujumbura amenyesha ko hakenewe abasaserdoti bokwira amaparuwase 50, mwomenya ko gushika ubu iyo Diyoseze ikigizwe n’amaparuwase 39 gusa.

Mbere mu ntango z’uyu mwaka nyene w’2022, hari ku wa Gatatu mweranda muri Ndamukiza, uwo Mwepiskopi Mukuru akaba yari yagaragaje agahimbare yatewe n’abasaserdoti bashoboye kugendera neza ibanga ryabo ry’ubusaserdoti mu kiringo c’imyaka myinshi cane, mbere n’ubu bageze mu za bukuru, ngo bakaba babisazanye.

Mu bo yari yakeje ico gihe harimwo abari barumije imyaka 80 bavutse, be n’abari bakwije iyirenga 50 bari mw’ibanga ry’ubusaserdoti, n’abandi batari bake bayababa. Ico gihe ntiyibagiye no gutera intege n’izindi zinganwe z’abasaserdoti zikiri nto, gushika ku batiwe vuba gusumba abandi.

Ubu na ho mu kwatira abo bashasha 11 akaba yasavye abakristu kwama na ntaryo bitwararike kuja barasaba ngo Umukama ashishikare kwitorera abasaserdoti benshi arungika mu muriman wiwe, abo baronkejwe na bo bakabasabira ubweranda, kuko ngo barinze bamera nabi, n’abakristu vyotuma bafutana.

Caritas Kamelo, Paruwase Musaga

Ivyiyumviro

Rondera

Urutonde rw'Imisa

Mwoba mufise ico mubaza?

Tanga