Ku musi wa gatandatu igenekerezo rya 1 Gitugutu  ku musozi  wa Siyoni Gikungu  niho haba urubanza rwo gusozera umwaka w`amayubile y`ibikorwa vya Papa vyo kumenyesha hose Inkuru Nziza ya Yezu Kristu n`iyugurugwa ry`Umwaka wa Yubile y`Imyaka 125 Inkuru Nziza imenyekanye Mu  gihugu c`Uburundi.  

Urwo rubanza rukaba rwatangujwe n`inkuka ya misa yatanguye igihe c`isaha zine zo mu gatondo  irongowe na Nyenicubahiro  Musenyeri Yohakimu Ntahondereye arongoye Inama y`Abepiscopi Katolika b`i Burundi  akongera akaba  n`Umwungere wa Diyoseze ya Muyinga ari kumwe n`intumwa ya Papa mu Burundi kumwe  n`abungere bagize Inama y`Abepiscopi basanzwe barongoye ayandi ma Diyoseze duhereye ku Mwungere Mukuru wa Diyoseze Nkuru  ya Bujumbura, Nyenicubahiro Musenyeri Gervais Banshimiyubusa .

Bari kumwe n`abungere b`inararibonye : Nyenicubahiro Musenyeri Evariste Ngoyagoye, Musenyeri Simoni Ntamwana hamwe na Musenyeri Stanislas Kaburungu. Hari haje   kandi n’ivyegera   vy`abungere n`abanyamabanga babo, abasacerdoti baje baserukira abandi, abihebeye Imana baserukira imiryango itandukanye n`isinzi ry`abakristu  baje baserukira ama Diyoseze  atandukanye agize Ekleziya katolika y’i Burundi.

Mu banyacubahiro mu ndongozi  z`igihugu biteye iteka urwo rubanza, twovuga nk `Umushikiranganji wa mbere w`iGihugu c`Uburundi, Nyenicubahiro Gervais Ndirakobuca n`Umupfasoni wiwe, icegera c`Inama nshingamateka , Umupfasoni Sabine Ntakarutimana, abahoze  barongoye igihugu c`Uburundi, Nyenicubahiro   Domitien Ndayizeye n`Umupfasoni wiwe hamwe na Nyenicubahiro Sylvestre Ntibantunganya.

Nyenicubahiro  Musenyeri Yohakimu Ntahondereye arongoye Inama y`Abepiscopi Katolika b`i Burundi  akongera akaba  n`Umwungere wa Diyoseze ya Muyinga , yarashimye ingene iyo Nkuru Nziza yagiye iramenyekana kuva ku Bamisiyonari bambere gushika uno musi. Uwo mwungere nyene  yarashize ahabona ivyamwa vyibonekeza bikomoka kw’iryo menyakana ry’Inkuru Nziza ko atari agaseseshwa  rumuri kuko mu gihe abamisiyonari bashika ata na Diyoseze nimwe yari ihari .

Aca abandanya agira ati : « ubu Diyoseze  zigeze ku Munani, nta baserdoti b`imvukira bari bahari ariko uno musi  muri rusangi Diyosese imwe imwe abasacerdoti  bakaba bababa  ijana na mirongo ibiri, igitigiri c`aba Kristu cagumye congerekana,  Diyoseze imw’imwe  ikaba irimwo muri rusangi aba Kristu bababa umuriyoni. » Uwo mwungere aca ashimangira ko ukwemera kw`aba Kristu balayike kwagiye kurongerekana haba ku misore n`inkumi canke ku bubatse izabo, imihari n`imigwi  ikaba ari myinshi ku rwaruka  canke ku bakuze. 

Mukwerekana ingendo bagiye kwisunga mugukomeza ukwemera  yagize ati : «  Ni ugushinga indinganizo zituma abantu bava mu kivunga kugira ntihagire uwinyegeza mu kwaha kw`uwundi canke inyuma y`uwundi , bubahuke baje ahabona bafate ingingo bo nyene bavuge bati Yezu nanje ndamukundire  »,  maze ukwemera kw`umukristu wese  ntiguherere mu kuja mw`isengero gusa kumwe n`abandi,  ariko kuje no mungingo afata mu mirimo yiwe ya  misi yose,  azifate  nk`umukristu .  Aca abandanya avuga ko arico gituma hagiye gukomezwa cane  imibano mito mito rukristu , kugirisha amanama imigwi mito mito, abasangiye imyuga bakigishirizwa hamwe kugira wa mwambiro w`Inkuru Nziza ushike mu biranga ubuzima bw`abantu bose.

Père Fréderic Limo, Patiri mukuru wa Paruwase Buyenzi yaserukiye abamisiyonari bambere ba Afrika baje kumenyesha Inkuru Nziza mu Burundi yarashimye ibikorwa  baranguye , arashima ukuntu Ekkeziya yagiye irakura mu mpande zose.  Uwo musacerdoti aca agirako asaba abakristu bose  , umwe wese ku giti ciwe  ko ahamagariwe  kubandanya ico gikorwa co kumesha Inkuru Nziza ahari kugira Yezu Kristu abandanye amenyekana mu mihingo yose y`isi.

Nyenicubahiro Sylvestre Ntibantunganya , yahoze arongoye igihugu  c`Uburundi, yaserukiye aba Krsitu bose, yarashimye uruhara abamisiyonari bambere bagize rwo kumenyesha Inkuru Nziza. Uwo mwubahwa nyene yarashimye ingene  Inkuru Nziza yahinduye Uburundi aca agirako asaba abarongoye Ekkleziya y’i Burundi ko iyo ntambwe igezweko itosubira inyuma ariko ko bobandanya boga kuri iyo ntambwe.

Mwomenya ko Inkuru Nziza  yatanguye gusamirizwa  mu Burundi mu mwaka w’i 1898  i Muyaga. Diyoseze yambere ikaba yatanguriye i Mugera mu mwaka w’i 1922 naho nyene ntiyari bwitwe diyoseze, yari icitwa intara y’ubutumwa igihe  Musenyeri  Julien-Louis GORJU yagenwa agaca ashinga icicaro ciwe i Mugera muri Diyoseze Nkuru ya Gitega.Itariki 10 z’ukwezi Munyonyo 1959 akaba ariho yashizwe ku rugero  rwo kuka Diyoseze Nkuru n’icicaro gikuru c’Ekleziya y’i Burundi.